¹ Jesu achiambira anafunziye kahiri, '‘Kwakala na mutu mumwenga yerekala ni tajiri na achikala yuna mutu wamwika kuimirira malize, tajiri yuyu waelezerwa kukala mutu iye yunaofuyafuya malize. ² Kwa vivyo tajiri achimwiha achimwambira, ‘Ni utu wani uno musikirai dzuluyo? Nipa hesabu ya umirizio, kwa kukala kuweza ukaimirira kahiri.'’ ³ Iye mwiminzi achidzuza moyoni mwakwe, nihendedze, maana tajiri wangu yunanivichisa kazi yangu ya umirizi? Sina mukotse wa kuweza kurima, na kuvoyavoya nona haaya. ⁴ Namanya rirahu ambaro uindarihenda ili vhondaokala zirichiswa kazi yangu ya wimirizi atu aweze kunikaribisha kwao nyumbani. ⁵ Kwa vivyo mwimirizi iye achiaha atu ariokala anadaiwa ni tajiriwe, chila mumwenga na achimwambira wa kwanza, anadaiwa chiasi chani ni tajiri wangu? ⁶ Achiamba vipimo gana mwenga vya mafuha, achimwambira ‘hala karatasio ya risiti sagala haraka upesi andika mirongo mitsano’ ⁷ Chisha achimwambira munjine wenawe unadaiwa chiasi chani? Achamba ‘Vipimo gana mwenga vya unga wa ngano.’ Achimwambira '‘Hala karatasio ya risiti andika mirongo minane.'’ ⁸ Yuyahu tajiri achimusifu mwimirizi yuyu dhalimu kwa kukala mulachu. Kwa kukala ana a urimwengu uu ni alachu na anauhumira ujanja kahiza menderezi gao kwiko arivyo ana a nuru. ⁹ Nani naambira dzihendereni asena kwa mali ya udhalimu ili vhondogwirikana muweze kukaribishwa kwenye makao ga kare na kare. ¹⁰ Ariye ni mwaminifu kwa ririro tote muno uikukala mwaminifu kwa ririro bomu pia. ¹¹ Ichikala mwimwi kamukarire aminifu kahiza mali ya udhalimu ni yuphiye andiyeamini kahiza mali ya ujeri? ¹² Na ichikala kamukarire aminifu kahiza kuhumira mali ya atu anjine ni yuphiye andiye muuha iriyo yenu enye? ¹³ Kakuka muhenzi wa kazi ariye yunaweza kuhumikira matajiri airi, kwa kukala yundamutsikirirwa mumwemga na kumuhenza munjine, au yundagwirana na yuwe na kumvhunga yuno. Kamuweza mukamuhumikira Mulungu na mali. ¹⁴ Kwa vivyo mafarisayo, ariokala anauliza pesa agasikira gosini gaga nao achimuhendera kamurye. ¹⁵ Na achiambira, ‘Mwimwi ndimwi ario munadzidai enye haki mbere za anadamu, ela mulungu yunaimanya mioyo yenu. Kwa kukala ridzironulwa ni anadamu ni tsukizo mbere za Mulungu. ¹⁶ Sheria na manabii vyakalako muhadi Johane arivhokudza. Hangu muda uo habari mbidzo za ufalme wa Mulungu zinatangazwa na chila mutu yunajeza kudzinjiza kwa mukotse. ¹⁷ Ela ni rahisi mulunguni na tsii kutsaonekana kuriko hata herufi mwenga ya sheria ikosekane. ¹⁸ Chila amurichaye muchewe na kuhala muche munjine yunahenda uzinzi, maiye amuhalaye iye ariyerichwa ni mulumewe yunazini. ¹⁹ Kwakala na mutu mumwenga tajiri ariye vala nguo za rangi ya zambarau na kitani safi na wakala na nyeni chila tsiku kwa utajiri wa kwakwe mubomu. ²⁰ Na maskini mumwenga dzinare here yunahiwa Lazaro wekwa getini kwakwe, na here yuna vironda. ²¹ Naye wakala achitamani kukushwa kuchirira kwa makombo gorogwa. Vhosi kahiza meza ya yuyahu tajiri hata kuro akudza achimulamba lamba vivyo vironda vya kwakwe. ²² Yuyahu maskini wakudza achifu na achihalwa ni malaika muhadi chifuani mwa Ibrahimu. Yuyahu tajiri naye waafa na achizikwa. ²³ Na kurahu kuzimu vhorokala yu kahiza mateso wakodola matsonge achimona Ibrahimu kwa kure na Lazaro chifuani mwakwe. ²⁴ Achirira achamba, ‘Baba Ibrahimu, nonera mbaazi, muhume Lazaro atsovye tsa ya chalache, kwa sababu nateswa kahiza moho uu. ²⁵ Ela Ibrahimu achiamba, ''Mwanangu kumbukira kukala kahiza maishago wavhokera mautu madzo, na Lazaro vivyo wapata mai. Ela vivi yuvhavha yunahurizwa moyowe na uwe unalumizwa. ²⁶ Na Zaidi ya gago kwekwa gokwe bomu na rire muno kahikahi yehu, ili arahu ahenzao kombola kuku kudza kwenu asiweze au atu a kwenu asivuke kudza kwehu.’' ²⁷ Yuyahu tajiri achiamba, '‘Nakuvoya Baba Ibrahimu, kwamba umuhume nyumbani kwa baba wangu. ²⁸ kwa kukala nina ndugu zangu atsano ili aweze kuara, kwa wasiwasi ili kwamba ao nao pia asidze vhatu vhavha vha mateso''. ²⁹ Ela Ibrahimu achiamba, ‘Kuna ano manabii. Ariche asikize ao. ³⁰ Iye tajiri achiamba sevyo, Baba Ibrahimu, ela ichikala andakwenderwa ni mutu alaaye kwa nyufu andatubu’ ³¹ Ela Ibrahimu achimwambira, ‘asivhoasikira ano Musa na manabii kandaririkana hata mutu afufukavho kahiza nyufu.