¹ Kulingana na huduma kwa ajili ya aamini, ividzo muno kwangu kuandikira. ² Nina manya dzulu ya chadi chenu, irio na dzivunya kwa atu a Makedonia. Naandira kukala Akaya idzikala tayari hangu mwaka uviochira. Hamu yenu idziabuma moyo anjao kuhenda. ³ Vikara, nidzia huma ndugu ili kukala kudzivunya kwehu dzulu ya mwimwi kusikale kwa bule, na ili kukala munga kala tayari here nirivyo gomba munga kala. ⁴ Vinjine, kala mitu yoyosi wa Makedonia achidza vamwenga nami nakuatikiza kamudza kala tayari, hungaona haya-si gomba chochosi dzulu ya mwimwi kwa kukala ngumbau muno kahi za mwimwi. ⁵ Vivyo naona ya kala muhimu kuavoya ndugu kudza kwenu na kuhenda mipango mapema kwa ajili ya zawadi. Ii ni vivyo ili kukala zikale tayari here baraka, na sii here chitu chidzicho amuriwa. ⁶ Azo ni riri; Mutu anyale vitepe unda vina vitepe, na yoyosi anyalaye kwa lengo ra baraka pye yunda vuna baraka. ⁷ Basi na chila mumwenga alavye here arivyo panga moyoni mwakwe. Basi naye asilavye kwa kushononeka hebu kwa kulazimiswa. Kwa kukala ni kumuhenza yuyahu alavyaye kwa raha. ⁸ Na Mulungu unaweza konjezera chila baraka kwa ajili yenu, ili kukala, chila wakati, kahi za mautu gosi, muweze kupatagosini mugalondago. Iii indakala ili kukala muweze konjeza cila hendo ridzo. ⁹ Ni here irivyo andikwa; "Yudzi gavya gavya ushahawe na kulavya kwa achiya. Nachiye ina dumu kare na kare" ¹⁰ Naye yuna lavya mbeyu kwa munyali na mukahe kwa ajili ya chakurya, pye yuna lavya na konjeza mbeyu yenu kwa ajili ya kunyala. Iye yunda onjeza mavuno ga hachi yenu. ¹¹ Munda hendwa ashaha kwa chila hali ili kukala muweze kukala ambazi. Iii indareha shukurani kwa Mulungu kuchirira siswi. ¹² Kwa kuhenda huduma ii si tu inagusa mahitaji ga aamini. Pye ni konjeza kahi za mahendo manji ga shukurani kwa Mulungu. ¹³ Kwa sababu ya kupimwa kwenu na kumanyikana kwa huduma ii pye munda munula Mulungu kwa usikizi kwa kukubali kwenu injili ya Kiristo. Pye munda munula Mulungu kwa mbazi za vipawa vyenu kwao na kwa chila mumwenga. ¹⁴ Ana pola namwi na anavoya kwa ajili yenu. Anahenda vivi kwa sababu ya neema bomu ya Mulungu iriyo dzulu yenu. ¹⁵ Shukurani zi kale kwa Mulungu kwa chipawache chisicho elezeka!