¹ Mwishowe ngugu hunainjizana moyo na kuavoya kwa jeso Kirisito. Here murivyovokera maelezo kula kwehu here muhenzekanavyo kwenenda na kumuhenzeza Mulungu, kwa njira iyo pia mwenende na kuhenda zaidi. ² Kwa kukala munamanya na maerekezo gavigo hurigomupa kuchirira Bwana Jeso. ³ Kwa kukala gaga ndo mahenzo ga Mulungu, usafi wenu, kukala muzditenge na zinaa. ⁴ Kukala chila mumwenga wehu yunamanya kuwika mwiriwe mwenye kahi za utakatifu na heshima. ⁵ Kwa ajili ya tamaa za mwiri here atu asiomumanya Mulungu. ⁶ Vasikale na mutu yoyosi andievuka mivaka na kumukosera nduguye kwa jambo riri kwa kukala Bwana ndiye mwenye kuriva chisasi kwa mambo gosi gaga, here hurivyo aonya na kuashuhudia chimbere. ⁷ Kwa kukala Bwana kahihire kwa ukolo ela kwa utakatifu. ⁸ Kwa vivyo arikahalaye riri kaakahala atu ela anamukahala Mulungu aavaye Rohowe mtakatifu. ⁹ Kuhusu uhenzo wa ndugu, kavana haja ya mutu yoyosi kuandikira, kwa kukala mudzifundishwa na Mulungu kuhenzana mwimwi kwa mwimwi. ¹⁰ Hakika mwahenda gaga gosi kwa enehu ario kuko Makedonia yosi ela hunaavoya ndugu, muhende hata na zaidi. ¹¹ Hunaavoya musagaleto, vasivo hoyo na mutu. Chila mutu alole mamboge na kuhenda kazi na mikono yenu, here hurivyomuagiza. ¹² Henda gaga ili uweze kukala tototo na heshima kwa ao arionze ya imani ili musivungukirwe na rorosi. ¹³ Himwi enehu, kahenzi mukose kumanya dzulu ya ao ariolala, ili musidze mukashonononeka here anjine asio na uhakika dzulu ya muda udzao. ¹⁴ Ichikala hunaamini kukala Jeso wafa na achifufuka kahiri vivyo hivyo Mulungu yundaareha vamwenga na Jeso ao ariolala mauti kazi za iye. ¹⁵ Kwa ajili ya gago hunaambira mwimwi kwa neno ra Bwana, kukala sisi hurio moyo, hundakaokalavo wakati wa kudza kwakwe Bwana hakika hundaatangulia ao ariolala mauti. ¹⁶ Kwa kukala mwenye yundatserera kula menguni. Yundakudza na sauti bomu, vamwenga na sauti ya malaika mubomu vamwenga na parapanda ya Mulungu, na ao ariofa kahi za Kirisito andafufuka kwanza. ¹⁷ Kisha swiswi hurio moyo, huriosala, hundaungana menguni vamwenga kahi za nao kumuvokera Bwana hewani kwa njira ii hundakala na bwana kare na kare. ¹⁸ Kwa vivyo mufarijiane mwimwi kwa mwimwi kwa gaga maneno.