¹ Kwa vivyo hurivyokala kahuweza kuvumurira zaidi haaza were ni vidzo kusala kura Athene hachi yehu. ² Huchimuhuma Timotheo mwenehu na mtumishi wa Mulungu kahi za injili ya Kirisito, kuajenga na kuaenjiza moyo kahi za imani yenu. ³ Hahenda gaga ili vasikale na sababu ya yeyosi kuteteleka kuchirira kwa mateso gaga, kwa kukala mwimwi enye munamanya hatsagulwa kwa ajili ya riri. ⁴ Kwa jeri, wakati vokala vamwenga namwi, namwambira chimbere kukala huvevi kupata mateso nagago gomborera here mumanyamavyo. ⁵ Kwa sababu ii nirivokala siweza kuvumurira kahiri namuhuma mutu ili niweze kumanya dzulu ya imani yenu. Nikwenda mujeza wakala waajeza kare na kazi yehu ikakala ni bule. ⁶ Ela Timotheo wakala kwehu kula kwenu achihurehera habari mbidzo dzulu ya imani na uhenzo wenu. Wahambira kukala muna habari mbidzo yehu, na kukala muna pola ya kuhona here vyo ambavyo nasi hunapola ya kumona mwimwi. ⁷ Kwa sababu ii ndgugu henjizwa moyo sana na mwimwi kwa sababu ya imani yenu kahi za taabu na mateso gehu gosi. ⁸ Kwa wakati uu hunaishi, muchima imara kwa Bwana. ⁹ Kwani ni shukurani zirizo humuve Mulungu kwa ajili yenu, kwa furaha yosi huriyonayo mbere za Mulungu dzulu yehu? ¹⁰ Hunavoya sana, usiku na mtsana ili huweze kuzona nyuso zenu na kuaonjezera chidzichopungua kahi za imani yenu. ¹¹ Mulungu wehu na Baba mwenye, na Bwana wehu Jeso ahulongoze njira yehu hufike kwenu. ¹² Na Bwana amuhende monjezeke na muzidi kahi za henzo, muchihenzana na kuahenza atu osi, here huahenderavyo mwimwi. ¹³ Na ahende vivi kuiimisa mioyo yenu ikale bila lawama kahi za atakatifu mbere za Mulungu wehu na Baba yehu kahi za udziro wa Bwana Jeso vamwenga na atakatifu an kwakwe.