¹ Kwa kukala mwimwi enye, ndugu, munamanya ko kudza kwehu kwenu kakukalire kwa bule. ² Munamanya kukala vavo chaho habudzika na ahuhendera mautu ga aibu ko Filipi, here mumanyavyo, hakala na ujasiri wa kahi za Mulungu kusumurira injili ya Mulungu kuchirira kwa tabu nyinji. ³ Kwa kukala maaro ga kwehu kagalaira na ui, wala kahiza ulongo. ⁴ Ela dza virahu hurivyokubali ni Mulungu na kuhewa injili ndo hugombavyo, hunagomba si kwakufurahisha atu, ela kumufurahisha Mulungu iye hacheye nde aipimaye mioyo yehu. ⁵ Kwa kukala kahuhumirire maneno ga kudzihendzeza wakati wosi, here mumanyavyo na kuhumira maneno here sababu kwa tamaa, Mulungu ni shahidi wehu. ⁶ Hebu kahuyeyere sifa kwa atu, hebu kula kwenu na kwa anjine. Hungeuza kukubaliwa here ahumwi a Kirisito. ⁷ Ela hakala apore kahi yenu here mayo abumavyo moyo anaye mwenye. ⁸ Kwa njira ii hakala na uhenzo kwenu. Hakala tayari kuava si tu neno ra Mulungu hacheye ela hata na maisha gehu enye. Kwa kukala mwakala ahenzwi ehu. ⁹ Kwa kukala enehu, munakumbukira kazi na taabu yehu. Usiku na mtsana hakala huchihenda kazi ili husidze hukamumerera yeyosi wakati uo haahubirira neno ra Mulungu. ¹⁰ Namwi mumashahidi, na Mulungu naye, ni kwa utakatifu wa aina yani, hachi, na bila lawama hurivyoenenda enye mbere zenu muriomuamini. ¹¹ Vivyo hivyo munamanya ni kwa namna yani kwa chila mumwenga wenu here baba, arivyo kwa anae. ¹² Hurivyoahimiza na kuainjiza moyo hashuhudia kukala mwahenzekana kwenenda here urivyo mwiho wenu kwa Mulungu, ariyeaiha kwa ufalumewe na utukufu wa kwakwe. ¹³ Kwa sababu iyo pia, hunamshukuru Mulungu chila wakati, kwa kukala murivyo vokera kula kwehu ujumbe wa Mulungu muriousikira mwavokera si here neno ra anadamu ela mwavokera here jeri irivyo, neno ra Mulungu ni neno riri ambaro rinahenda kazi kahi ya mwimwi mwaminio. ¹⁴ Kwa vivyo mwimwi enehu mutue makanisa ga Mulungu garigo kahiza uyahudi kahi za Kirisito Jesu, kwa kukala mwimwi namwi mwateswa kahi za mambo kula kwa atu enu, here irivyo kala kula kwa ayahudi. ¹⁵ Were ni ayahudi ariomulaga Bwana Jesu vamwenga na manabii. Ni ayahudi ohuzola hombolenze kamufurahisha Mulungu kisha ni mahadui kwa atu osi. ¹⁶ Ahuzulia husigombe na atu anjine asiokala ayahudi asidze akaokolwa; ndo kukala anaenderera na dambi zao, mwishowe utsungu wa Mulungu ukudza dzulu yao. ¹⁷ Swiswi ndugu hakala hudzirichana namwi kwa muda mufuhi, si kazi za roho. Hahenda kwa uwezo wehu na kwa mzigo mbomu hone nyuso zenu. ¹⁸ Kwa kukala hahenza kudza kwenu, mimi Paulo, kwa mara mwenga na pia injine, ela shetani wahuzulia. ¹⁹ Kwa kukala kudzamini kwehu ni tuani, au furaha, au tadzi ya kudzivunira mbere za Bwana wehu Jeso wakati wa kudza kwakwe? Je mwino si zaidi ya arivyokala anjine? ²⁰ Kwa kukala mwimwi ni utukufu na furaha.