¹ Khwa malaika wa kanisa ra sardi andika: Maneno ga yuya aghwiriraye ziratu Roho fungahe za mulungu na nyenye zi fungahe.Namanya mahendogo.Una sifa ya kukala umoyo, lakini umaiti. ² Lamuka na ugaimarishe gadzigosala, ambago gahehi na kufwa, khwa sababu sonere mahendogo kukala gadzikamulika matsoni ha mulungu wangu. ³ Khwa vivyo, kumbukira garatu urigogahochera na kusikira.Gatii na utubu.Lakini usiholamuka, nindadza here mhwevi na kundamanya saa hiyo nindiyokudza dzuluyo. ⁴ Lakini kunamadzina machache ga atu kahi za sardi kavhadzachafua nguo zao.Vhandaenenda hamhwenga nami, vhachikala vhavala nguo nyeruhe, khwa sababu vhanasitahili. ⁵ Iye ashindaye andavikhwa mavazi meruhe,na kamare sindarifuta dzinare kahi za chitabu cha uzima na nindaritaja dzinare mbere ya baba na mbere za malaika. ⁶ Na ariye na sikiro, asikire viratu Roho agaambiravyo makanisa. ⁷ Khwa malaika wa kanisa ra Filadefia andika: maneno ga ariye mutakatifu na jeri ariye na funguo za Daudi, ni kufugula na kakuna afugulaye, achifunga kakuna awezaye kufugula. ⁸ Namanya ambacho udzichihenda. Lola nidzikhwikira mberezo muyango uriofugulwa ambao kakuna awezaye kuufugula. Namanya una nguvu chidogo, lakini udziritii neno rangu na kudzarikana dzina rangu. ⁹ Lola! Vhosi vhario a sinagogi ra shetani, vhara vhambao vhavho ni ayahudi na kumbe sevho, badalaye vhanakenga.Nindavhahenda vhadze vasujudu mbere za magulugo na vhandamanya kukala nakuhenza. ¹⁰ Khwa kukala udzitunza amuri yangu khwa uvumirivu wa uhakika, nindakurinda pia kahi za saayo ya kujezwa ambayo inadza kahi za urimwengu wosi, kuvhajeza vhara vhosi vhaishio kahi za tsi. ¹¹ Nadza haraka ghwirira sana chiratu urichonacho ili asikaleho mutu wa kuihala tajiyo. ¹² Nindamuhenda iye ashindaye kukala nguzo kahi za hekalu ra mulungu wangu, na kandambola nze kamare.Nindarandika khwakhwe dzina ra mulungu wangu, dzina ra mudzi wa mulungu wangu [Yerusalemu mbisha utimao tsini kula mulunguni khwa mulungu wangu], na dzina rangu risha. ¹³ Iye ariye na sikiro na asikire ambacho Roho ananena khwa makanisa. ¹⁴ Khwa malaika wa kanisa ra laondikia andika:manenoge ariye Amina, wakutegemewa na shahidi mwaminifu, mutawala dzulu ya uumbaji wa mulungu. ¹⁵ Namanya ambacho udzihenda, na khwamba uwe kupeho wala moho, natamani kukala undekala peho au moho! ¹⁶ Vivyo, khwa sababu uwe u vuguvugu, si moho walapeho,nindakuhahika wombole mulomoni mhwangu. ¹⁷ Khwa kukala unaamba,mimi ni tajiri, nidzikala na mali nyinji na simala chochosi! Lakini uwe kumanya kukala uwe uduni sana,wakuhuzunikirwa, masikini chipofu na huhu. ¹⁸ Sikiza ushauri khwangu :Gula khwangu dhahabu iriyosafishwa khwa moho ili upate kukala tajiri,na nguo nyeruheza kung'alang'ala ili udzivike mhwenye na usonyese aibu ya huhuro na mafuhaga kuhaka kahi za matsogo uwezekona. ¹⁹ Chila ni muhenzaye, namwerekeza na kuvhafundisha jinsi ivhapasavyo kuishi; khwa vivyo kala mujeri na utubu. ²⁰ Lola naema muyangoni ninabisha.Yeyosi asikiraye sauti yangu na kufugula muyango nindadza na khwenjira nyumbani mhwakwe na kurya chakurya naye na iye hamwenga nami. ²¹ Iye ashindaye, nindamupa haki ya kusagala tsini hamhwenga nami dzulu ya chihi changu cha enzi, here vira mimi nirivyo shinda na kukala tsini hamhwenga na baba wangu dzulu ya chihiche cha enzi. ²² Iye ariye na sikiro, na asikize ambacho Roho anagaambira makanisa.