¹ Mumhwenga wa Malaika afungahe ariyekala na vitasa afungahe vhekudza na achiniambira, “Nzoo nindakonyesa hukumu ya kahaba mubomu akalaye dzulu ya madzi manji. ² ambaye afalume a tsi vhehenda mambo ga uzinifu naye na dzulu ya mhvinyo wa uzinifu we vhakalao duniani vherevywa.” ³ Malaika achinihala kahi za roho mpaka nyikani, na achimona mwanamuche asegere dzulu ya munyama mutune ariyekala adzodzala madzina ga mahukano. Munyama wekala na vitswa vifungahe na pembe kumi. ⁴ Mhwanamuche wevishwa nguo ya zambarau na tune na kupambwa khwaa dhahabu, mawe ga thamani, na lulu. Wekala aghwirira mukononimwhwake chikombe cha dhahabu chiricho kala chidzodzala vitu vyamatsukizo ga uchafu wa usharatiwe. ⁵ Dzulu ya paji ra usowe ridzandikhwa dzina ra siri, “BABELI MUBOMU, MAME WA MAKAHABA NA WA VITU VYA MATSUKIZO GA TSI.” ⁶ Nichona kukala mhwanamuche iye wekala area khwa milatso ya aumini na ya vhariofa khwa ajili ya Jesu. Wakati nirihomhwona nekala na mushangao mubomu. ⁷ Lakini Malaika achinambira, “Khwa noni unashangaa? Nindakhweleza maana ya mhwanamuche na munyama amuhalaye (munyama iye vitswa vifungahe na ziratu pembe kumi.) ⁸ Munyama uriyemhwona wekalaho lakini kaho keheri, lakini yu tayari khwenda kula khwa bopo risiro na mwisho. Kisha andenderera na uharibifu khwa vharatu vhakalao dzulu ya tsi, vharatu ambao madzina gao kagandikirwe khwenye chitabu cha uzima, Hangu mhwanzo khwikwa misingi ya urimhwengu- vhandashangaa vhadihomona munyama ariyekalaho kukala kaho sasa, lakini yu hehi na kudza. ⁹ Mhweho uu ni khwa ajili ya akili zirizo na hekima. Vitswa vifungahe ni mirima mfungahe ambayo mhwanamuche wekala dzulu ye. ¹⁰ Nayo pia ni afalume afungahe. Afalume atsano vhadzehwa mumhwenga yuhaho, na munjine kadzanghwe kudza, wakati andiho kudza, andakala khwa muda mufuhi tu. ¹¹ Munyama ariyekalaho, lakini sasa kaho, iye pia ni mufalume wa nane, lakini ni mumhwenga wa vharatu afalume afungahe, na iye mhwenye anenda khwenye uharibifuwe. ¹² Ziratu pembe kumi urizozona ni afalume kumi ambao kavhadzahochera ufalume, lakini vhandahochera mamulaka here afalume khwa saa mhwenga hamhwenga na munyama. ¹³ Vhavha vhana shauri mhwenga na vhandamupa nguvu zao na mamulaka yuyatu munyama. ¹⁴ Vhandahenda viha kahi yao na mhwana n'gonzi. Lakini mhwana n'gonzi andavhashinda khwa sababu ni Bwana wa mabwana na mufalume wa afalume, na vhario naye ni vharatu vhario ehewa, vhariotsagulwa, na vhario aminifu.” ¹⁵ Malaika achinambira, “Garatu madzi udzigogaona, haho adzihosagala yuyatu kahaba ni atu, makutano, mataifa na lugha. ¹⁶ Ziratu pembe kumi urizozona zizo na yuyatu munyama vhandamutsukirirwa yuyatu kahaba. Nao vhandamuhenda kukala hacheye na huhu, vhandamurya mhwiriwe, na vhandasha khwa moho. ¹⁷ Maana Mulungu weika mioyoni mhwao kubeba kusudire khwa makubaliano ga kumupa munyama nguvu zao kumutawala mupaka maneno ga Mulungu gandihotimira. ¹⁸ Yuyatu mhwanamuche uriyemwona ni mudzi uratu mubomu, utawalao dzulu ya ufalume wa tsi.