¹ Nichisikira sauti bomu icheha kula khwenye sehemu ya hatakatifu na ichamba khwa vharatu Malaika afungahe, “Enda na ukamhwage dzulu ya dunia mabakuli mafungahe ga ghadhabu ya Mulungu.” ² Malaika wa khwanza wekhwenda achimhwaga bakulire kahi za dunia, jeha mai na genye maumivu mabomu ge kudza khwa atu enye alama ya munyama, khwa vharatu ambavho vheabudu sanamuye. ³ Malaika wa hiri wemhwaga bakulire kahi za bahari, ichikala here milatso yam utu ariyefwa na chila chiumbe cha moyo kahi za bahari chichifwa. ⁴ Malaika wa hahu achimhwaga bakulire. Kahi za miho ya madzi na kahi za matso ga madzi, zichikala milatso. ⁵ Nichisikira Malaika wa madzi achamba, “Uwe umutakatifu uriyeho na uriyekalako mutakatifu- khwa sababu udzizireha hukumu zizi. ⁶ Khwa sababu vhemhwaga milatso ya aamini na manabii, udzivhapa vhavho kunwa milatso, ndo vhasitahilicho.” ⁷ Naisikira madhabahu ichijibu, “Ndio! Bwana Mulungu mhwenye kutawala dzulu ya vyosi, hukumuzo ni jeri na za hachi.” ⁸ Malaika wa ne achimhwaga kula khwenye bakulire dzulu ya dzua, na richipewa ruhusa kocha atu khwa moho. ⁹ Vheochwa khwa dzoho renye kutisha, na vhachirikufuru neno ra Mulungu, mhwenye nguvu dzulu ya mabigo gosi kavhatubure wala kumupa iye utukufu. ¹⁰ Malaika wa tsano achimhwaga kula khwenye bakulire kahi za chihi cha enzi cha munyama, na dziza richiufinika ufalumewe. Vhachisaga meno kahi za maumivu makali. ¹¹ Vhachimuhukana Mulungu wa Mulunguni khwa sababu ya maumivu gao na jeha gao, na bado vheenderera kutokutubu khwa chiratu vharichohenda. ¹² Malaika wa tandahu achimhwaga kula khwenye bakulire kahi za muho mubomu, Frati, na madzi ge kachuuma ili kuweza khwandaa njira khwa afalume vhandokudza kula mashariki. ¹³ Nichoona roho tahu chafu zirizoonekana here chulwa vhombolao nze ya mulomo wa yuyatu joka, yuyatu munyama, na yuyatu nabii wa ulongo. ¹⁴ Ni roho za upepo zihendazo ishara na miujiza. Vhekala vhachenda khwa afalume a dunia yosi ili kuweza kuvhakusanya hamhwenga khwa viha kahi za siku kuu ya Mulungu, mhwenye nguvu zosi. ¹⁵ (“Lola ninadza here mhwevi! Baha iye adumuye kahi za kucheza, atunzaye mavazige ili asiweze khwenda nze huhu na kuiona aibuye.”) ¹⁶ Vhevhareha hamhwenga kahi za sehemu yehewayo kahi za chiebrania Amagedoni. ¹⁷ Malaika wa fungahe wemhwaga kula khwenye bakulire kahi za anga. Kisha sauti bomu ichisikirika kula hatakatifu na kula khwenye chihi cha enzi, ichamba, “Isira!” ¹⁸ Khwekala na mianga ya mhwanga wa lumete, ngurumo, visindo vya lumete, na tetemeko ra kutisha- tetemeko bomu ra tsi ambaro kavidzawahi konekana duniani hangu anadamu vhakaleko duniani, vivyo ni tetemeko bomu zaidi. ¹⁹ Mudzi mubomu wegavika kahi za sehemu tahu, na midzi ya mataifa ichighwa. Kisha Mulungu achimukumbukiza Babeli mubomu, na achiupa mudzi uo chikombe chirichokala chidzodzala divai kula khwenye ghadhabuye iriyo kali. ²⁰ Chila chisiwa chichangamika na mirima kayoonekanire keheri. ²¹ Mvula bomu ya mawe, ichikala na uziho wa talanta, ichitima kula Mulunguni dzulu ya atu, na vhachimulaani Mulungu khwa mabigo ga mvula ya mawe khwa sababu riro bigo rekala rii sana.