¹ Ne anga Yeso yali nalaviranga, yalola omundu wali omuvofu okhurula okhwivulwa khukhwe. ² Ne aveki vave vamureva, nivasunga vari, Omwami, ni wina wakhola ovwoni, omundu wuno, nohomba avevusi vave, kakila wevulwa nali omuvofu? ³ Yeso wavachiva ari, omundu wuno siwakhola ovwoni, nohomba avevusi vave tawe: nikakhali vari kho emilimo kia Nyasaye kitukhe okhulolekhanila muniye. ⁴ Kenyekhana ekhole emilimo kia wulia wanduma esie, eyindalo neyisili: esilo sialechanga, womundu akhalakhola emilimo tawe. ⁵ Esie nesichililila okhuva musivala, Esie nisie ovulafu vwe esivala. ⁶ Wa Yeso yali niyakhasunga ario, yafucha amare khilova, na walomba elitoyi lia amaree, ne wavakha elitoyi lieneli muchimoni cho omundu omuvofu wulia, ⁷ Ne wamusungila ari, Chaa, osave mwitisi lia Silowamu, (mukhukalukhasia livele vari, Ruma.) Khu kario yarekukha wacha, ne wasava, ne wakalukha nalalolanga. ⁸ Khu kario avachesa, nende valia vali nivamumanya nasili omuvofu, vasunga vari, Wuno sali niye wikhalanga hasi nasava? ⁹ Avandi vasunga vari, niyee: avandi vasunga vari, Wufwanile niye: nikakhali omwene wasunga ari, Nisie omwene. ¹⁰ Khu kario vamusungila vari, Echimoni chicho chichakile okhulola chirie? ¹¹ Wachiva wasunga ari, Omundu wavalanganga vari Yeso alombile elitoyi, ne wambakha muchimoni chanje, ne wasungila ari, Chaa mwitisi lia Silowamu, ne osave: ne Enjile ne nasava, ne niwo wechimoni chanje chichakile okhulola. ¹² Ne navo vamusungila vari, Wuvele hena? Wavasungila ari, Semanyile tawe. ¹³ Wamurera khu Vafarisayo wulia wali anyuma yawo omuvofu. ¹⁴ Ne yali eyindalo yeli sabato wa Yeso yalomba elitoyi, ne wamwikula echimoni. ¹⁵ Ne khandi Avafarisayo vosi vamureva anga yali nawonile echimoni chiche. Wavasungila ari, Avukule elitoyi wara muchimoni chanje, ne nasava, ne vulano nalolanga ¹⁶ Khu kario valala khu Vafarisayo vasunga vari, Omundu wuno sali wa Nyasaye tawe, sikila salondile eyindalo yeli sabato tawe. Avandi vasunga vari, Omundu omwoni anyala ariena wakhola amayiya anga kano? Ne khwavawo nende ovwawukhani akari wavo. ¹⁷ Vela wasungila omuvofu wulia khandi vari, Newe walasunganga oriena khu mundu mwenoyo, anga akhwikule echimoni? Wasunga ari, Nomung'osi niye. ¹⁸ Nikakhali Avayawudi sivasuvila okhulondokhana ninaye tawe, vari yali omuvofu, ne vulano alalolanga, okhutukha anga valanga avevusi va wulia wali niyekukhe echimoni. ¹⁹ Ne navo vavareva, nivasunga vari, Wuno no omwana wenyu, wamwalasunganga muri yevulwa nali omuvofu? ne alaloloanga arieno vulano? ²⁰ Avevusi vave vavachiva ne vasunga vari, Khumanyile khuri wuno onmwana wefu, ne yevulwa nali omuvofu: ²¹ Nikakhali khuli anga alalolanga, efwe sokhumanyile tawe; nohomba wumuwonie echimoni chekukha, efwe sokhumanyile tawe: wuno nomundu omutukhu, mureve omwene: omwene alakaye. ²² Avevusi vave valakaya amakhuwa kano, sikila varia Avayawudi: sikila Avayawudi vali veyamane khale, vari omundu wulia yesi waleyama asunge ari avele Kristo, kenyekha vamukhume arule musinakoki. ²³ Khu kario kakila avevusi vave vasunga vari, No omundu omutukhu, murevve omwene. ²⁴ Niwo wavela khandi valanga omundu wulia wali omuvofu, ne vamusungila vari, Welesia Nyasaye oluyali: khumanyile khuri omundu wuno nomwoni. ²⁵ Wavachiva, ne wasunga ari, Akhava nali omwoni nohomba tawe, Esie semanyile tawe: esindu silala siesie emanyile, sivele vari, navelenge omuvofu ne vulano nalolanga. ²⁶ Ne vela khandi vamusungila vari, Ni sina sia akholile khwiwe? Akholile ariena kho echimoni chicho nechichaka okhulola? ²⁷ Naye wavachiva ari, semusungile khale, ne khane somuwulile tawe: ni sina khandi sia mwalenyanga okhuwulila? Mwalenyanga mwesi okhuva aveki vave? ²⁸ Niwo anga vamunyeka, ne vamusungila vari, Ewe niwe omweki uwe; nikakhali efwe khuvele aveki va Musa. ²⁹ Khwamanya khuri Nyasaye yalakaya nende Musa: nikakhali owundi wuno, sokhumamanyile wayarula tawe. ³⁰ Omundu wulia wavachiva wavasungila ari, Sina sia mwakawukanga khulikhuwa lino, vari semumanyile warulanga tawe, ne mani wumbonie echimoni. ³¹ Vulano khwakhamanya khuri Nyasaye sawulilanga avoni tawe: nikakhali kava omundu yesi wava wusikamilanga Nyasaye, ne akhola elienya lilie, omwene oyo Nyasaye amuwulilanga. ³² Okhurula esivala nesichaka kasili okhuwulilikhanakho vari omundu yesi wuwonie echimoni cho omundu wevulwa nali omuvofu tawe. ³³ Nikakhavele vari omundu wuno sali wa Nyasaye tawe, siyakhakholile liosi liosi tawe. ³⁴ Vamuchiva ne vamusungila vari, Khu kosi ewe wevulilwa muvwoni, ne wakhachaka okhukhusomia efwe? Ne vamukhuma warula. ³⁵ Yeso wawulila vari vamukhumile mukari; ne wayali niyakhamunyola, wamusungila ari, Ewe wasuvila khu Mwana wa Nyasaye? ³⁶ Wachiva ne wasunga ari, Omwami, Ni wina niye, esie endukhe khumusuvila? ³⁷ Ne Yeso wamusungila ari, Niye wewe walalonga, khandi niye walalakayanga ninawe wuno. ³⁸ Ne naye wasunga ari, Omwami, Nisuvile. Ne wamusikamila. ³⁹ Ne Yeso wasunga ari, Nayecha musivala muno sikila okhukhalakilwa, kho valia vakhalolanga tawe vatukhe okhulola; ne valia valolanga vatukhe okhuva avavofu. ⁴⁰ Ne valala khu Vafarisayo vali halala ninaye anga vawulila amakhuwa kano, ne vamusungila vari, Efwe fwesi khuvele avavofu? ⁴¹ Yeso wavasungila ari, Nimwakhavele avavofu, simwakhavele no ovwoni tawe: nikakhali vulano mwalasunganga muri, Khwalalolanga; khu kario ovwoni vwenyu vusiliwo.