1 Yeso yarekukha wacha mulukulu lwa Oliveti. 2 Ne nivwakhasia mavwivwi wela wecha khandi mwitempeli, ne avandu vosi vecha wayali; ne naye wekhala hasi, ne wavasomia. 3 Ne avandiki nende Avafarisayo varera wayali omukhasi wavava nivamutilile muvutamba; ne wavali nivakhamura mumusee akarikari, 4 Vamusungila vari, Omwami, omukhasi wuno atililwe muvutamba, musikholwa siene. 5 Vulano Musa yakhulaka mwilaka ari, wuno keyekha akhupwe amakina: nikakhali ewe nawe walasunganga orisina? 6 Eliene lino valisunga, okhwenya okhumureka, kho vave nende lia vamuyalilakho. Nikakhali Yeso yenama hasi, ne khu sitere sisie wachaka okhwandika khwilova, wakwa anga wukhavawulile tawe. 7 Kho anga vachililila okhumureva, yekunamula, ne wavasungila ari, Wulia wukhali novwoni mwinywe tawe, lekha ave wokhuranga okhumulasa elikina. 8 Ne wela wenama hasi, ne wandika hasi khwilova. 11 9 Ne valia anga vawulila elieneli, vachaka okhwikhalakila mumioyo kiavo, vachaka okhucha vuli mulala sia mulala, okhuchakila khu wali omukhulundu mwene, okhwola khu wali wokhumalilikha: ne Yeso wasikala yeng'ene, nende omukhasi wali nasisinjile mumusee akarikari. 10 Wa Yeso yakunamukha, ne walola avandu vosi sivaliwo tawe nikakhali omukhasi wulia, Yeso wamusungila ari, Mukhasi ewe, vavele hena valia vakhusitakile? avulawo omundu yesi wukhukhalakile ewe? Naye wasunga ari, Omwami avulawo omundu yesi. Ne Yeso wamusungila ari, Esie siesi sinakhukhalakila ewe tawe: chaa, ne okhela wakhola ovwoni khandi tawe. 12 Ne Yeso wavalakayila khandi, nasunga ari, Esie nisie ovulafu vwe esivala: wulia walanonda salakenda musilima tawe, nikakhali alava novulafu vwo ovulamu. 13 Ne Avafarisayo khu kariovamusungila vari, Ewe wamwene wikholelanga ovuloli; kho ovuloli vuvwo sevuli vwang'ali tawe. 14 Yeso wavachiva wavasungila ari, Ekhava ninerusianga ovuloli, ovung'ali vuvele vari ovuloli vwanje nivwavwene: sikila namanya wanarula, nende wanachichanga; nikakhali enywe semunyala mwasunga wanarulanga nende wanachichanga tawe. 15 Enywe mukhalakilanga omundu okhulondokhana nende omuvili; Nesie sekhalakilanga omundu yesi tawe. 16 Khandi nikava ekhalaka, okhukhalaka khwanje nikhwa ng'ali: sikila sendi sieng'ene tawe, nikakhali Nisie nende Papa wanduma esie. 17 Khandi kayandikwa mulilaka lienyu, vari ovuloli vwa avandu vavili nivwang'ali. 18 Esie nisie mulala wulia walerusianga ovuloli, nende Papa wanduma esie niye walarusia ovuloli vwanje. 19 Ne vamungila vari, Papa wuwo wuvele hena? Yeso wavachiva, Enywe somumanyile esie, nohomba Papawanje tawe: muva nimwamanya, andi mwamanya Papa wanje yesi. 20 Amakhuwa kano Yeso yakalakayila mwivikhilo, anga yali mwitempeli: ne avulawo omundu yesi wenya okhumutila tawe, sikila eyisa yiye yali yisili okhwola. 21 Ne Yeso khandi wela wavasungila ari, Esie narulawo enjee, ne nomukhave, ne nomufwile muvwoni vwenyu: wanachichanga, enywe somunyala mwechayo tawe. 22 Ne Avayawudi vasunga vari, Alacha yeyire? sikila wusungile ari, Wanachichanga enywe semunyala mwechayo tawe. 23 Yeso wavasungila ari, Enywe nivokhurula hasai; Esie niwokhurula yikulu: enywe nivomusivala muno; Esie sendi womusivala muno tawe. 24 Khu kario Esie namusungile enywe, endi mwalafwila muvwoni vwenyu: sikila nomukhasuvila muri Esie nisie, mwalafwila muvwoni vwenyu. 25 Ne navo vamusungila vari, Ewe niwina? Ne Yeso wavasungila ari, Embele mulala wulia wemusungile okhurula mukhuranga. 26 Nivele nende amakhuwa amanyingi kokhuvasungila nende kokhuvakhalakila enywe: nikakhali wulia wanduma esie niwang'ali; ne nalakayinga esivala ofundu fulia fwembulile okhurula khuniye. 27 Sevamanya vari yavalakayilanga kali ka Papa tawe. 28 Ne Yeso wavasungila ari, Wamwalava nimwakhachingula Omwana wo omundu, niwo wamwalamanya muri Esie nisie, khandi Esie senikholelanga siosi tawe; nikakhali anga Papa wanje yasomia, niwo anga endakayanga ofundu funo. 29 Ne wulia wanduma wuvele ninasie: Papa sewayandekha esie sieng'ene tawe; sikila ekholanga vuli lwosi ofundu fulia fwokhumuyanjisia. 30 Anga yali nasilakayanga amakhuwa kano, avanyingi vamusuvila. 31 Ne Yeso wasungila Avayawudi valia vali nivamusuvile ari, Nikava mwalachililila mulikhuwa lianje, mwalava aveki wanje vang'ali. 32 Ne mwalamanya ovung'ali, ne ovung'ali vwalamulomba muve avalekhule. 33 Navo vamuchiva vari, Efwe nivolwivulo lwa Ibrahimu, nefwe sikhwavakho musivowo sio omundu yesi tawe: sikila sina wasunganga ori, Mwalalombekha avalekhule? 34 Yeso wavachiva ari, Kang'ali, kang'ali, namusungilanga enywe, Wulia yesi wukholanga ovwoni nomurumwa wo ovwoni. 35 Ne omurumwa samenyanga munju vuli lwosi tawe, nikakhali Omwana niye wumenyangamo vuli lwosi. 36 Khu kario nikava Omwana alakhulomba ove omulekhule, walava omukhule wa ng'ali. 37 Nimanyile endi enywe muvele vo olwivulo lwa Ibrahimu, nikakhali mwalakhavanga okhunjira, sikila elikhuwa lianje selili novwiyangu mwinywe tawe. 38 Endakayanga kalia kendolile khu Papa wanje: nenywe mukholanga komulolile khu papa wenyu 39 Vamuchiva ne vamusungila vari, Ibrahimu ni papa wefu. Yeso wavasungila ari, Muva nomuli avana va Ibrahimu, mwakhakholile emilimo kia Ibrahimu. 40 Nikakhali vulano mwalakhavanga okhunjira, omundu wumusungile ovung'ali, vwembulile okhurula khu Nyasaye: Ibrahimu siyakhola akenako tawe. 41 Enywe mukholanga evikholwa via papa wenyu. Ne navo vamusungila vari, Efwe sikhwayevulwa muvutamba tawe; khuvele nende Papa mulala, nali Nyasaye. 42 Yeso wavasunila ari, Nyasaye niyakhavele Papa wenyu, mwakhanyanjile esie: sikila Esie necha okhurula khu Nyasaye; khandi Esie sinayeruma samwene tawe, nikakhali niye yanduma esie. 43 Sikila sina mukhalamanyanga kanalakayanga kano? sikila ata semunyala mwawulilisia elikhuwa lianje tawe. 44 Enywe muvele va papa wenyu omusuku, ne enywe mwalakhola ka papa wenyu yekombanga. Yali omulimindi okhurula mukhuranga, ne sewayekhalakho muvung'ali tawe, sikila ovung'ali sevuli muniye tawe. Walakayanga ovuveyi, avechanga alalakayanga emelo yiye omwene: sikila nomuveyi khandi papa wovuveyi vwenovu. 45 Ne sikila namusungilanga enywe ovung'ali, simwalasuvilanga tawe. 46 Ni wina mwinywe wunyala okhulalakila esie okhuva no ovwoni? Ne nesunga ovung'ali, sikila sina mukhalasuvilanga? 47 Wulia wuli wa Nyasaye awulilanga amakhuwa ka Nyasaye: nenywe semukawulilanga tawe, sikila semuli va Nyasaye tawe. 48 Ne Avayawudi vamuchiva, ne vamusungila vari, Sekhusungile ovulayi vwene khuri ewe wuvele Omusamaria, ne wuvele nesisieno? 49 Yeso wavachiva ari, Esie sendi nesisieno tawe; nikakhali nelesianga Papa wanje oluyali, nenywe mwalamayasianga. 50 Ne sineyenyelanga samwene eyifuma tawe: wuwo mulala wurunilisianga khandi akhalaka. 51 Kang'ali, kang'ali, namusungilanga enywe, omundu wulia yesi walatila amakhuwa kanje, omwene wulia salilola elifwa tawe. 52 Ne Avayawudi vamusungila vari, Vulano khwakhamanya khuri ewe wuvele nesisieno. Ibrahimu wafwa, nende avang'osi; ne ewe walasunganga ori, omundu walatila amakhuwa kanje, salikonyelakho elifwa tawe. 53 Ewe wakhava omukali okhuvira papa wefu Ibrahimu, wafwa? ne avang'osi vafwa: walelolanga ori ewe niwina? 54 Yeso wavachiva ari, Esie neniyelesia oluyali, oluyali lwanje selwalava nesindu tawe: Papa wanje niye wumbelesianga esie oluyali; we enywe mwalasunganga, muri niye Nyasaye wenyu: 55 Mani simwamumanya tawe; nikakhali esie namumanya: ne nenyala nasunga endi, Esie semumanyile tawe, Nava omuveyianga enywe: nikakhali Esie namumanya, ne endilanga elikhuwa lilie. 56 Papa wenyu Ibrahimu yayanja okhulola eyindalo yanje: ne yakilola, ne wasangala. 57 Ne Avayawudi vamusungila vari, Ata wamwene okhosia emiyika amakhumi karano tawe, ne walola Ibrahimu khale? 58 Yeso wavasungila ari, Kang'ali, kang'ali, Esie namusungilanga enywe, Ibrahimu wayava nasili okhuvawo tawe, Esie naliwo. 59 Ne vavukula amakina vamukhupe ninako: nikakhali Yeso yamitiukha, ne warula mwitempeli, navira akarikari wavo, ne niwo anga yavaviramo.