¹ Wakano kali nikakhavira Yeso yakenda mu Galilaya: sikila siyayenya okhucha Evuyuda tawe, esifune vari Avayawudi vamukhavanga vamwire. ² Omulukha kwa amatili kwa Avayawudi kwali kukana okhwola. ³ Khu kario wandaye vave vamusungila vari, Rula yino, ochee Evuyuda, kho aveki vavo vosi valole emilimo kie ewe walakholanga. ⁴ Sikila avulawo omundu wukholanga ofundu niyekisile, ne omwene alenyanga amanyikhane avulafu tawe. Kavavari ewe okholanga ofundu funo avulafu, khoche wilolesie khusivala. ⁵ Sikila vakhava vawandaye vave sivali nelisuvila muniye tawe. ⁶ Niwo wa Yeso yavasungila ari, eyisa Yanje yisili okhwola: nikakhali enywe eyisa yenyu yiwo vuli lwosi. ⁷ Esivala sesinyala siamuviyila enywe tawe; nikakhali esie siayambiyila, sikila esikholilanga ovuloli, endi emilimo kiesikholanga nemivi. ⁸ Enywe chee mumulukha kuno: Esie sinachichanga mumulukha kuno tawe: sikila eyisa yanje yisili okhwola muvwichufu. ⁹ Wayali niyakhavasungila amakhuwa kano, watasa okhwikhala Galilaya. ¹⁰ Nikakhali wa avawandaye vave vali nivakhacha, ne niwo wayesi yarekukha wacha mumulukha, ne siyacha nalolekhana tawe, nikakhali anga walekisanga. ¹¹ Ne niwo wa Avayawudi vamukhava mumulukha, nivareva vari, Wuvele hena? ¹² Ne khwaliwo nokhumonyamonya muvandu okhulondokhana ninaye: sikila valala vasunga vari, Nomundu omulayi: ne avandi vasunga vari, Tawe; nikakhali aveyanga avandu. ¹³ Kakhava kario avulawo omundu wamulakayakho avulafu tawe sikila varia Avayawudi. ¹⁴ Vulano womulukha kwali nikwakhembiya okhwola akarikari Yeso yacha wenjila mwitembeli, ne wasomia. ¹⁵ Ne Avayawudi vawuuka, nivasunga vari, Omundu wuno yamanya ariena echinukta, mani siwasoma tawe? ¹⁶ Yeso wavachiva, ne wavasungila ari, Amekesio kano sikali akanje tawe, nikakhali nikawulia wanduma esie. ¹⁷ Omundu yesi niyenya okhukhola elienya lilie, ava alamanya amekesio, nikava ka Nyasaye nohomba nemba ninalakayanga akanje samwene. ¹⁸ Wulia wulakayanga akake omwene yeyenyelanga oluyali: nikakhali wulia walakhava oluyali lwa wulia wanduma esie, omwene wulia alava wang'ali, ne sewatakhamo ovulunjikhi tawe. ¹⁹ Musa siyamwelesia enywe elilaka, ne avulawo khwinywe watila elilaka? Sikila sina mwalakhavanga okhunjira? ²⁰ Avandu vachiva ne vasunga vari, Ewe wuvule nesisieno: wina walakhavanga okhukhwira? ²¹ Yeso wavachiva, ne wavasungila ari, Nikholile omulimo mulala, ne enywe muwukile. ²² Khu kario Musa yamuwelesia enywe esisevo; (ne sikali vari esisevo siali sia Musa tawe, nikakhali siali sia avapapa;) ne enywe khuyindalo ye sabato musevanga omundu. ²³ Kava musevanga omundu eyindalo ye sabato, kho elilaka lia Musa lilekhe okhufunakwa, eliruma nilia sina ninasie, sikila niwonie omundu omuvili kwosi khuyindalo ye sabato? ²⁴ Okhukhalaka okhulondokhana anga omundu alalolekhananga tawe, nikakhali khalaka elikhalaka muvulunji. ²⁵ Ne valala khu khu vandu va Yerusalemi vasunga vari, Wuno sali niye, wavalakhavanga okhwira? ²⁶ Nikakhali, lola, anga alalakayanga nende ovusicha, ne livulawo liosi lia valalakaya khuniye tawe. Avami vanyala okhuva vamanyile muvikholwa vari wuno niye Kristo? ²⁷ Kakhava kario khwamanya omundu wuno warulanga: nikakhli wa Kristo alecha, avulawo omundu walamanya wava narulile tawe. ²⁸ Niwo anga Yeso yalangilisia wayali nalasomianga mwitempeli, nasunga ari, Enywe mwesi mwayamanya esie, khandi mwamanya wendulanga: ne senichile samwene tawe, nikakhali wulia wundumile esie niwang'ali, wenywe mukhamanyile tawe. ²⁹ Nikakhali esie namumanya: sikila esie naarula khuniye, ne niye wanduma esie. ³⁰ Niwo anga vakhava okhumutila: nikakhali avulawo omundu wamutilakho emikhono tawe, sikila eyisa yiye yali yikhwola tawe. ³¹ Ne avandu avanyingi khu valiwo vamusuvila, ne vasunga vari, Wa Kristo alecha, alakhola amayiya amakali kavira kano ko omundu wuno yakhakhola? ³² Avafarisayo vawulila vari avandu valemonyanga khu makhuwa kene kano okhulondokhana ninaye; ne Avafarisayo nende avasalisi avemilisi varuma avasikari vache vamutile. ³³ Ne Yeso wavasungila ari, Embele vusa ninanywe khu sikha sititi, ne enje khu wulia wanduma esie. ³⁴ Mwalakhava esie, ne semwalanyola tawe: ne wemba nendi, evweneyo enywe semunyala mwechayo tawe. ³⁵ Niwo Wavayawudi vachaka okhurevana avene khu vene, ni hena walenyanga okhucha, wefwe khwalalekha okhumunyola? alacha khu valia vasalanila mu Vesivala, ne asomie Vesivala? ³⁶ Ne lilakaya sina lia alakaye nasunga ari, Mwalakhava, ne semwalanyola tawe: ne wemba nendi, evweneyo enywe semunyala mwechayo tawe? ³⁷ Muyindalo yokhumalilikha, eyindalo yene eyingali yo omulukha, Yeso yasinjila ne walangilisia yikulu, nasunga ari, Khwavawo nende omundu yesi wuli novulesio, lekha yeche khwisie, ne anywe. ³⁸ Wulia yesi walasuvila esie, khuli anga amandiko kasunganga, echisevele che emichela kia amachi kovulamu kialekha okhurula muniye. ³⁹ (Nikakhali yalakaya khu Roo, wa valia vava nivamusuvile vecha okhunyola: sikila Roo Omuchenukhu yava asili okhuhanwa; sikila Yeso yali asili okhuchingulwa muluyali tawe. ⁴⁰ Avandu avanyingi khukario, anga vawulila elilakaya lino, vasunga vari, Khu kang'ali wuno no Omung'osi. ⁴¹ Avandi vasunga vari, Wuno niye Kristo. Nikakhali avandi vasunga vari, Kristo alarulila Galilaya kweli? ⁴² Amandiko sikasunga kari, Kristo alarulila khu lwivulo lwa Daudi, khandi okhurulila mwitokho lia Bethlehemu, wa Daudi yali? ⁴³ Khu kario khwavawo nelikavukhana muvandu sikila niye. ⁴⁴ Khandi valala khu nivo venya okhumutila; nikakhali avulawo omundu yesi wamutilakho emikhono tawe. ⁴⁵ Ne niwo wavasikari vecha khu avasalisi avemilisi nende khu Vafarisayo; ne vavasungila vari, Sikila sina mukhamurerile tawe? ⁴⁶ Avasikari vavachiva vari, Avulawo omundu wunyala walakaya khuli omundu wuno tawe. ^{49 47} Ne Avafarisayo vavachiva vari, Ata mwesi muveyilwe? ⁴⁸ Khukhowo nende omwami yesi nohomba khu Avafarisayo wusuvile muniye? Nikakhali avandu vano vakhamanyile elilaka tawe valamwa. ⁵⁰ Nikodemu wavasungila ari, ( wulia wecha khu Yeso musilo, nali mulala khu nivo,) ⁵¹ Elilaka liefu likhalakilanga omundu yesi, nelisili okhumuwulilisia, nende nelikhamanyile liakholile? ⁵² Vamuchiva ne vamusungila vari, Ewe wesi wakhava wa Galilaya? Khavilisia ne olole: sikila avulawo omung'osi yesi warulakho Galilaya tawe. ⁵³ Ne vuli omundu warekukha nacha munju yiye.