¹ Wa kano kali nikakhavira Yeso yacha yinjelekha we eyinyanja ya Galilaya, neyili niyo eyinyanja ya Tiberia. ² Ne olukhumulo olukali lwamulondakho, sikila valola amayiya kayali nakholele valia vali avalwale. ³ Ne Yeso wanina khu lukulu, ne wekhala khu vwene khulia nende aveki vave. ⁴ Ne epasaka, omulukha kwa Avayawudi, kwali kukana okhwola. ⁵ Wa Yeso yakunamula echimoni chiche, ne walola emikanda emikali kialechanga wali, yasungila Filipo ari, Khwalakula hena esiakhulia, sia vandu vano valalia? ⁶ Ne lino yalisunga okhumupima: sikila yali omwene wumanyile lia alakhola. ⁷ Ne Filipo wamuchiva ari, Ata khukhava nende esiakhulia sia echi dinari echimia chivili sesinyala okhuvola tawe, wa vuli omundu anyala okhunyolalakho sikhava sititi. ⁸ Mulala khu veki vave, Andreya, omusiani wanga Simoni Petero, wasungila Yeso ari, ⁹ Khuwo nende omusiani omuraka hano, wuli nende emikati kirano kie eshayiri nende eching'eni echinditi chivili: nikakhali funo nisina khu vandu vano vosi? ¹⁰ Ne Yeso wamusungila ari, Yikhasia avandu hasi. Khwaliwo novunyasi ovunyingi avundu wene yawo. Kho avandu vekhala hasi, khu savu vali ahembi echelefu chirano. ¹¹ Ne Yeso wavukula emikati; ne wayali niyakhopa orio muno, yakavila aveki , ne aveki navo vakavila valia vali nivekhale hasi; khandi wakhola ario khu ching'eni avandu valia anga vanyala. ¹² Wavali nivakhekura, yasungila aveki vave ari, Vungelesia halala ofutonye fusikale, esindu siosi sikhativakho tawe. ¹³ Khu kario vasolola fwosi halala, ne vechusia ofukapu elikhumi na fuvili fwo ofupande fwe emikati kie eshayiri, kiali nekisikale kichule khandi kivirile valia vali nivalile. ¹⁴ Kho avandu valia, wavalola amayiya ka Yeso yali nakholile, vasunga vari, Mukang'ali wuno nomung'osi wulia walecha musivala. ¹⁵ Khu kario anga Yeso yamanya echinganakani chavo ari valecha vamuvukule naamani, vamukhole okhuva omwami, yela warekukha khandi wacha yeng'ene musikulu. ^{18 16} Ne weyingolove yali niyakhola,aveki vave vakhomolokha vacha khunyanja, ¹⁷ Ne venjila muliaro, ne vacha vambukha oluveka lwa Kapernaumu. Ne vulano esilima siali siakhatila, ne Yeso yali asili okhwicha ninavo. Ne eyinyanja yachaka okhwikovola sikila anga eyimboo eyingali yali neyilawuchanga. ¹⁹ Kho wavali nivakhafuka eliaro vakhacha khuli echimaili chitaru nohomba chinne, valola Yeso alakendanga khu nyanja, ne wayali nakana okhwola khu liaro: ne navo vavenguwa. ²⁰ Nikakhali yavasungila ari, Nisie; mukhavenguwa tawe. ²¹ Kho nivamwiyamila okhwinjila muliaro: ne avwene vusa yawo eliaro liali liolile musivala sia vachichangamo. ²² Eyindalo yali neyilondakho, wa avandu vali nivasinjile yinjelekha wundi we eyinyanja, wavalola vari sikhwaliwo nende eliaro lindi awenawo tawe, okhurusiakho lilia lia aveki vave valimo, Yeso siyali nachile na avekivave muliaro tawe, nikakhali aveki vave vali vachile vong'ene; ²³ ( Kakhava vari amaro kandi kechawo okhurula Tiberia ahembi nende avundu wavaliila esiakhulia, wo Omwami yali niyakhopa orio muno:) ²⁴ Khu kario wa avandu valola vari Yeso siyaliwo tawe, nohomba aveki vave, kho vosi venjila mumaro, ne vecha Kapernaumu, nivakhava Yeso. ²⁵ Ne anga vali nivakhamunyola oluveka lundi lwe eyinyanja, vamusungila vari, Rabi, wichile oriena yino? ²⁶ Yeso wavachiva ne wasunga ari, Kang'ali, kang'ali namusungilanga enywe, Mwalakhavanga esie, sikila semulolile amayiya tawe, nikakhali sikila mwalile emikati, ne mwekura. ²⁷ Mukhakhalavanila esiakhulia sili siokhwinonokha tawe, nikakhali khu siakhulia siokhumenya muvulamu vwa mindali sio Omwana wo omundu alamuwelesia enywe:sikila niye wa Nyasaye Papa yarakho omuwuru kukwe ²⁸ Ne navo vamusungila vari, Khukhole sina, kho fwesi khukhole emilimo kia Nyasaye? ²⁹ Yeso wavachiva ne wavasungila ari, Kino nikio emilimo kia Nyasaye, vari muve musuvila wulia wayaruma. ³⁰ Khu kario vamusungila vari, ni simanyikhilo sina sie ewe walakhwekesia, khutukhe okhulola, ne khukhusuvile? Walakhola sina? ³¹ Papa vefu valia manna musiangalamwe; anga kandikwa, Yavelesia esiakhulia okhurula mwikulu sio okhulia. ³² Ne Yeso wavasungila ari, Kang'ali, kang'ali, namusungilanga enywe, Sali Musa niye wamwelesia esiakhulia okhurula mwikulu tawe; nikakhali Papa wanje alamuwelesia enywe esiakhulia sia ng'ali okhurula mwikulu. ³³ Sikila esiakhulia sia Nyasaye ni wulia wecha hasi okhurula mwikulu, ne yelesianga esivala ovulamu. ³⁴ Ne navo vamusungila vari, Omwami, vuli lwosi khwelesie esiakhulia sino. ³⁵ Ne Yeso wavasungila ari, Nisie esiakhulia sio ovulamu: wulia walecha khwisie salivakho neyinjala tawe; ne wulia walasuvila esie salivakho novulesio tawe. ³⁶ Nikakhali emusungile enywe, Khandi enywe mundolile esie, ne semwalasuvilanga tawe. ³⁷ Valia vosi va Papa alambelesia valecha khwisie; ne wulia yesi walecha khwisie sinamulekha elwanyi tawe. ³⁸ Sikila esie sinayecha hasi hano okhurula mwikulu, okhukhola elienya lianje tawe, nikakhali elienya lia wulia wanduma esie. ³⁹ Ne lino nilio elienya lia Papa wanduma esie vari khu kosi ka yambelesia ekhatifiakho esindu siosi tawe, nikakhali esivusie khandi eyindalo yokhumalilikha. ⁴⁰ Ne lino nilio elienya lia wulia wanduma esie, vari vuli sia mulala walalola Omwana, ne amusuvile, atukhe okhuva novulamu vwa mindali: ne Esie emba namuvusia khandi eyindalo yokhumalilikha. ⁴¹ Avayawudi niwo waveng'ulung'unya, sikila yasunga ari, Nisie esiakhulia siecha hasi okhurula mwikulu. ⁴² Ne vasunga vari, wuno sali Yeso, omwana wa Yusufu, papa wuwe nende mayi wuwe sikhwavamanya? kakhava kariena walasunganga ari, Necha hasi okhurula mwikulu? ⁴³ Yeso khu kario wavachiva wavasungila ari, Mukheng'ulung'unya mwavene tawe. ⁴⁴ Avulawo omundu wunyala wecha khwisie, okhurusiakho Papa wanduma esie okhumukhwesa tawe: ne Esie nemuvusie khandi eyindalo yokhumalilikha. ⁴⁵ Kayandikwa muvang'osi vari, Ne vosi nivasomisiwe nende Nyasaye. Khu kario vuli omundu wuva niyawulila, ne ave wayeka okhurula khu Papa, alecha khwisie. ⁴⁶ Ne sikali vari wuwo omundu yesi walola Papa tawe, nakhali wulia wuli wa Nyasaye, niye walola Papa. ⁴⁷ Kang'ali, kang'ali, Namusungilanga enywe, wulia walasuvila esie wuno ovulamu vwa mindali. ⁴⁸ Nisie esiakhulia sio ovulamu. ⁴⁹ Papa venyu valia manna nivali musiangalamwe, ne vaafwa. ⁵⁰ Sino nisio esiakhulia siekha hasi okhurula mwikulu, sio omundu anyala wasilia ne alekhe okhufwa. ⁵¹ Nisie esiakhulia sio ovulamu siekha hasi okhurula mwikulu: omundu yesi walalia esiakhulia sino, alamenya mindali: ne esiakhulia sianamwelesia nomuvili kwanje, kwa narusia sikila ovulamu vwe esivala. ⁵² Avayawudi khu kario vachaka okhuyingania avene khu vene, nivasunga vari, Omundu wuno anyala wakhuwelesia ariena efwe omuvili kukwe khulie? ⁵³ Ne Yeso wavasungila ari,, Kang'ali, kang'ali, Namusungilanga enywe, Okhurusiakho mulie omuvili kwo Omwana wo omundu, ne munywe amavanga kake, semwalava novulamu mwinywe tawe. ⁵⁴ Wulia yesi walalia omuvili kwanje, ne anywe amavanga kanje, alava novulamu vwa mindali; ne Nasie emba namuvusia eyindalo yokhumalilikha. ⁵⁵ Sikila omuvili kwanje nesiakhulia sia ng'ali, ne amavanga kanje nesinywachi sia ng'ali. ⁵⁶ Wulichanga omuvili kwanje, ne anywe amavanga kanje, amenyanga mwisie, ne Nasie muniye. ⁵⁷ Anga Papa wumenyanga yanduma esie, ne Esie emenyanga sikila Papa: kho yesi walandia esie, ata yesi alamenya sikila esie. ⁵⁸ Esino nisio esiakhulia siekha hasi okhurula mwikulu, sesili anga sia papa venyu valia manna, ne vaafwa tawe: wulia walalia esiakhulia sino alamenyaovulamu vwa mindali. ⁵⁹ Amakhuwa kano yakalakaya musinakoki, wayali nalasomianga Kapernaumu. ⁶⁰ Khu kario avanyingi khu veki vave, anga valiwulila, vasunga vari, lialakaye lino nelikhuwa elitinyu,wina wunyala? ⁶¹ Wa Yeso yamanya okhung'ulung'unya khwavo khu liene lino, yavasungila ari, Elino liakhamwisikirasia? ⁶² Ne kalava kariena wa mwalalola Omwana wo omundu nachaka okhucha yikulu wayali khale? ⁶³ Roo niye wulamusianga; omuvili khuvulakho ovukhala vwosi tawe: amakhuwa kanamusungilanga enywe, niko roo, khandi nivwo ovulamu ⁶⁴ Nikakhali vamo valala mwinywe vakhalasuvilanga tawe. Sikila Yeso yamanya okhurula mukhuranga vali vanga wina vakhasuvila tawe, nende wulia walecha okhumuchama. ⁶⁵ Ne wasunga ari, Khu kario niko kanamusungila endi, avulawo omundu wunyala okhwicha khwisie, okhurusiakho anyalilwe nende Papa wanje ⁶⁶ Okhurulila awene yawo avanyingi khu veki vave wakalukha yinyuma, ne sevayela vakenda ninaye khandi tawe. ⁶⁷ Ne niwo wa Yeso yasungila vali elikhumi ne vavili ari, Mwesi mwalenyanga okhucha? ⁶⁸ Ne Simoni Petero wamuchiva ari, Omwami, ni wina wakhwalachakho? niwe wuli namakhuwa kovulamu vwa mindali. ⁶⁹ Ne efwe khwasuvila khandi khuvele ng'ali khuri ewe wuvele Kristo wulia, Omwana wa Nyasaye wumenyanga ⁷⁰ Yeso wavachiva ari, Sinamurovola enywe elikhumi nende vavili, ne mulala khwinywe nomusuku? ⁷¹ Yalakayanga khu Yuda Isikarioti omwana wa Simoni: sikila yali niye walecha okhumuchama, nali mulala khu valia elikhumi nende vavili.