¹ Wa lino liali niliavira khwaliwo nende omulukha kwa Avayawudi; ne Yeso warekukha wacha Yerusalemi. ² Vulano wayali Yerusalemi oluveka lwe esilivwa sia amachese khwaliwo ne elitisi, lia valanganga mululimi lwa Avebrania vari Betsesita, ne liali nofupanda furano. ³ Mufwene funo vali vayalisiamo olukhumulo olukali lwa avandu vali avalwale, avavofu, avalema,vafwokoya, valindanga amachi katuvulwe. ⁴ Sikila eyingelosi yekhanga khu fuse navuleve mwitisi, ne yituvula amachi: wulia walingi wokhuranga okhwinjila mumachi nikakhatuvulwa yawonanga okhurula anga yalingi. ⁵ Ne khwaliwo no omundu mulala avwene yawo, wali omulwale khumiyika amakhumi kataru na munane. ⁶ Wa Yeso yamulola nakonile, ne wanya ari wuno wakhamenyawo ario khu sikha esikali, wamusungila ari, Ewe walenyanga ove omulamu? ⁷ Omulwale wulia wamuchiva ari, Omwami, sendi nomundu hano tawe, wokhunjinikha mwitisi, amachi nikakhatuvulwa, nikakhali wembechanga nesichichanga, owundi avechanga wunyowile okhwinjilamo. ⁸ Yeso wamusungila ari, Sinjila, vukula ovulili vuvwo, ne okende. ⁹ Ne avwene na avwene omundu wulia wawona, ne wavukula ovulili vuvwe, ne wakenda: ne eyindalo yeneyi yali ye Sabato. ¹⁰ Khu kenako Avayawudi vareva wali nawonisiwe vari, Neyindalo ye sabato: okhulondokhana ne elilaka ewe sokhoyele osite ovulili vuvwo tawe. ¹¹ Wavachiva ari, Wulia wumbonie, niye wusungile esie ari, Vukula ovulili vuvwo, ne okende. ¹² Ne navo vamureva vari, Mundu sina mwenoyo wukhusungile ari, Vukula ovulili vuvwo ne okende? ¹³ Ne wulia wali nawonisiwe siyamanyilisia yali wina tawe: sikila Yeso yarulawo omwene muvwikisi, sikila khwaliwo nolukhumulo avundu wenawo. ¹⁴ Yinyuma wako Yeso yamunyola mwitembeli, ne wamusungila ari, Lola, ewe wukholekhe, omulamu: okhakhola ovwoni khandi tawe, esindu esivi siene sikhecha khwiwe tawe. ¹⁵ Ne omundu wulia warekukha wacha, ne wasungila Avayahudi ari yali Yeso, niye wali namuwoniye. ¹⁶ Ne khu kario Avayawudi niko kavamupiliakho esivi, ne nivakhava okhumwira, sikila yali wukholile ofundu funo eyindalo ye sabato. ¹⁷ Nikakhali Yeso wavachiva ari, Papa wanje asikhola emilimo okhwola yisa yino, ne siesi nakholanga. ¹⁸ Khu kario Avayawudi vatasa okhumukhava vamwire, sikila siyali nariolile lilaka lie sabato liong'ene tawe, nikakhali yela wasunga ari Nyasaye ni Papa Wuwe, niyelekhasia omwene khu Nyasaye. ¹⁹ Niwo wa Yeso yavachiva wavasungila ari, Kang'ali, kang'ali, namusungilanga enywe, Omwana sanyala okhwikholela esindu siosi tawe, nikakhali sialalolanga Papa nakhola: sikila vuli ofundu fwakhola, nifwo fwo Omwana yesi alakhola. ²⁰ Sikila Papa wayanja Omwana, ne wamwekesia ofundu fwosi fwo omwene akholanga: ne alamwekesia emilimo emikali kivirakho kino, kho muwuke. ²¹ Sikila anga Papa asisimusianga vafwile, ne avawelesia ovulamu; niwo anga Omwana yesi yelesianga ovulamu wulia wayenyile. ²² Sikila Papa sakhalakilanga omundu yesi tawe, nikakhali wayelesia okhukhalaka khwosi khu Mwana. ²³ Kho avandu vosi velesie Omwana oluyali, anga velesianga Papa oluyali. Wulia wukhelesia Omwana oluyali tawe sava yelesianga Papa oluyali wamuruma tawe. ²⁴ Kang'ali, kang'ali, namusungilanga enywe, Wulia walawulila elikhuwa lianje, ne asuvile wulia wanduma esie, alava novulamu vwa mindali, ne salarelwa mukhalakilwa tawe; nikakhali alava wuvirile okhurula mulifwa ne winjile muvulamu. ²⁵ Kang'ali, kang'ali, namusungilanga enywe, Eyisa yalechanga, ne vulano niyo yino, wa avafu valawulila omumilo kwo Omwana wa Nyasaye, ne valia valawulila valamenya. ²⁶ Sikila anga Papa ali novulamu muniye omwene, niwo anga yelesia Omwana ave novulamu muniye omwene; ²⁷ Ne wamuwelesia ovunyali vwo okhukhalaka khandi, sikila wuvele Omwana wo Omundu. ²⁸ Mukhawuka khu lino tawe: sikila eyisa yalechanga, yavalia visi vali mufulindwavalawulila omumilo kukwe, ²⁹ Ne valarulamo; valia vakhola amalayi, valinjila mukhusisimukha khwo ovulamu; ne valia vakhola amavi, vakhasisimukhe nivakhalakilwa. ³⁰ Khu vunyali vwanje samwene senyala okhukhola esindu siosi tawe: anga nawulila, niwo anga nakhalaka: ne okhukhalaka khwanje nikhwawene; sikila sinakhavanga elienya lianje samwene tawe, nikakhali elienya lia Papa wanduma esie. ³¹ Nenyala samwene okhwirusiya ovuloli, ovuloli vwanje sevuva vwa ng'ali tawe. ³² Khuwo nowundi wokhundusia esie ovuloli; ne nimanyile endi ovuloli vwava nalarusia khwisie nivwang'ali. ³³ Wavuruma khu Yohana, ne naye warusia ovuloli muvung'ali. ³⁴ Nikakhali esie sinarusianga ovuloli khu mundu tawe: nikakhali ofundu funo nasunganga, khenywe muwonisiwe. ³⁵ Yalingi ovulafu vwayichanga khandi vwakhosianga: ne enywe mwenyanga khu sikha okhusangala muvulafu vuvwe. ³⁶ Nikakhali nivele novuloli vuli ovukali okhuvira vwali vwa Yohana: sikila emilimo kia Papa yambelesia esie okhumala, emilimo milala kilia kiekholanga, kikholelanga ovuloli, vari Papa wayanduma esie. ³⁷ Ne Papa mwene, wanduma esie, yarusia ovuloli vwanje. Enywe simwawulilakho omumilo kukwe khu sikha siosi tawe nohomba okhulolakho khuli anga ali tawe. ³⁸ Ne enywe elikhuwa lilie selimenyanga mwinywe tawe: sikila wulia wayaruma, semumusuvilanga tawe. ³⁹ Khaavilisia mumandiko; mwava nomubaranga muri mukenako niko komuli novulamu: ne niko kakholelanga esie ovuloli. ⁴⁰ Ne semwalechanga okhwicha khwisie, kho muve novulamu tawe. ⁴¹ Esie senyolanga oluyali okhurula khu vandu tawe. ⁴² Nikakhali esie namumanya enywe, somuli nende ovuyanji vwa Nyasaye mwinywe tawe. ⁴³ Nayechela mu lira lia Papa wanje, nenywe simwayanjakanila tawe: ne owundu niyecha mulira lilie omwene, omwene wulia mwalamwakanila. ⁴⁴ Munyala mwasuvila muriena, enywe mufumisiananga mwavene khu vene, ne somukhavanga oluyali lurulanga khu Nyasaye yeng'ene tawe? ⁴⁵ Mukhapara muri namusitaka khu Papa tawe: wuwo mulala wumusitakanga enywe, nali Musa, we enywe mweyikina. ⁴⁶ Sikila muva anga mwasuvila Musa, mwakhasuvile esie; sikila kayandika kali khwisie. ⁴⁷ Nikakhali enywe nimwakhasuvila kayandika tawe, muva mwalasuvila muriena amakhuwa kanje?