¹ Khu kario wo Omwami yamanya anga Avafarisayo vali nivawulile vari Yeso alalombanga aveki avanyingi na avabatisia okhuvira Yohana, ² (Kakhava vari Yeso mwene siyabatisianga tawe, nikakhali aveki vave) ³ Yarula Yudeya, ne wakalukha khandi Galilaya. ⁴ Ne kamulasimisia avirile mu Samaria. ⁵ Ne niwo wayecha wola Samaria mwitokho lia valanganga vari Sayika, ahembi nende esipande sio omukunda kwa Yakobo yeliesia omwana wuwe Yosefu. ⁶ Vulano esisima sia Yakobo siali avwene yawo. Yeso khu kario, sikila yali wutorile okhurula khu lukendo, yekhala asisima wene yawo: ne chali mu sasava chesitere. ⁷ Yarulila avwene yawo omukhasi Omusaria okhwenya okhuteya amachi: Yeso wamusungila ari, Mbekho ko okhunywa. ⁸ (Sikila aveki vave vali vachile mwitokho okhukula esio okhulia.) ⁹ Ne omukhasi omu Samaria wamusungila ari, Lelo kavele kariena vari ewe, wuli Omuyawudi, walasavanga ko okhunywa, esie wuli omukhasi Omusamaria? Sikila Avayawudi sivenjilananga nende Avasamaria tawe. ¹⁰ Yeso wamuchiva ne wamusungila ari, Niwakhamanyile esiyanwa sia Nyasaye, nende wulia walakhusungilanga ari, Mbekho ko okhunywa; niwe wakhamusavile, ne naye yakhakhuwele ewe amachi ko ovulamu. ¹¹ Ne omukhasi wamusungila ari, Omwami, ewe soli nesindu sio okhuteya amachi tawe, ne esisima siacha hasi wene: ne ewe vulano walarusia hena amachi ko ovulamu ako? ¹² Ewe wuvele omukali okhuvira papa wefu Yakobo, wakhuwelesia esisima sino, khandi sio omwene yanywamo, nende avana vave, nende eching'ombe chiche? ¹³ Yeso wamuchiva ne wamusungila ari, Wulia yesi walanywa amachi kano alava novulesio khandi: ¹⁴ Nikakhali wulia walanywa amachi ke esie namuwelesia salava khandi novulesio tawe; nikakhali amachi ke esie namuwelesia kalava esevele ya amachi yokhurula muniye yo ovulamu vwa mindali ¹⁵ Omukhasi wamusungila ari, Omwami, mbekho amachi kano, endekhe okhuva novulesio, nohomba ekhela necha hano okhuteya tawe. ¹⁶ Yeso wamusungila ari, Chaa, olange omusacha wuwo, ne mwiche hano. ¹⁷ Omukhasi wamuchiva wamusungila ari, Sendi no omusacha tawe. Yeso wamusungila ari, Wakhasunga ovulayi ori sendi no omusacha tawe: ¹⁸ Sikila ewe wakhava na avasacha varano, ne wulia woli ninaye vulano sali omusacha wuwo tawe: khu liene lilia ewe wulakaye liang'ali. ¹⁹ Omukhasi wamusungila ari, Omwami, Nalolanga ewe wuvele omung'osi. ²⁰ Ava papa vefu vasayanga mu lukulu luno; ne enywe musunga muri, mu Yerusalemi ninwo mwa avandu vakhoyele vache vasayilemo. ²¹ Yeso wamusungila ari, Mukhasi ewe, suvile esie, eyisa yalechanga, wenywe mukhalasayila Papa, mu lukulu luno, nohomba ata Yerusalemi tawe. ²² Enywe musayanga sio mukhamanyile nisina tawe: efwe khwamanya sia khusayanga: sikila vuwonia nivwa Avayawudi ²³ Nikakhali eyisa yalechanga, ne vulano niyo niyino, wa avandu vo okhusaya mukavwene valasaya Papa mu roo nende mu vung'ali: sikila nivo va Papa alakhavanga vamusaye. ²⁴ Nyasaye wuvele Eroo: ne valia valamusaya kunyekha vamusaye mu roo nende mu vung'ali. ²⁵ Omukhasi wamusungila ari, Nimanyile endi Masiya alecha, wavalanganga vari Kristo: walicha, alikhusungila ofundu fwosi. ²⁶ Yeso wamusungila ari, Esie walalakayanga ninawe nisie. ²⁷ Ne khulino aveki vave vecha, ne vayumba anga yali nalalakayanga nende omukhasi: nikakhali avulawo omundu yesi wasunga ari, Walakhavanga sina? nohomba ari, Sikila sina walalakayanga nende omukhasi wuno? ²⁸ Ne omukhasi walekha eyisiongo ya amachi, ne wacha wenjila mwitokho, ne wasungila avandu ari, ²⁹ Yicha, mulole omundu, wusungile ofundu fwosi fwe esie nakhola: wuno sanyala okhuva niye Kristo? ³⁰ Ne varula elwanyi we elitokho, ne vecha wayali. ³¹ Musikha sienesi aveki vave vali valamusayanga, nivasunga vari, Omwami, liaa. ³² Ne naye wavasungila ari, nivele nende esio okhulia sie enywe mukhamanyile tawe. ³³ Khukario aveki vachaka okhurevana avene khu vene, Wukhowo omundu yesi wunyala okhuva namurerele sialia? ³⁴ Yeso wavasungila ari, Esiokhulia sianje nokhukhola okhwenya khwa wulia wanduma esie, nende okhumala emilimo kikie. ³⁵ Enywe somusunganga muri, Kisilikho emiesi kinne, kho elichesa liole? lola, namusungilanga enywe, Likamile echimoni chenyu, ne mulengele mumikunda; sikila kiolile khale okhufuna. ³⁶ Ne wulia wufunanga anyolanga omurungo, ne asololanga fwafunile khu lwo ovulamu vwa mindali: kho vari vosi wulia walaraka nende wulia walafuna vave vekhoyela alala. ³⁷ Ne ano niwo wolukano luvelanga lwa ng'ali vari, Mulala arakanga ne owundi afuna. ³⁸ Namuruma enywe muche mufune mukilia kienywe mwakhakhalavanamo tawe: avandu vandi nivo vakhalavanamo, ne enywe mwayenjisiwa mukhukhalavana khwavo. ³⁹ Ne Avasamaria avanyingi vo mwitokho lilia vamusuvila sikila elikhuwa lio omukhasi, lia yavarusia ovuloli ari, Yasungile kalia kosi kesie nakhola. ⁴⁰ Kho Avasamaria wavali nivakhecha wali, vamusaya vari yekhalekho ninavo: ne naye wekhalayo echindalo chivili. ⁴¹ Ne avanyingi vatasa okhumusuvila sikila elikhuwa lilie omwene; ⁴² Ne vasungila omukhasi wulia vari, Vulano khwakhasuvila, sekhuli okhulakaya khukhwo tawe: sikila fwavene khwakhamuwulila, ne khwakhamanya khuri khu kavwene wuno ni Kristo, omuwonia wesivala. ⁴³ Vulano wechindalo chivili chali nichakhawa yarula eweneyo, ne wacha mu Galilaya. ⁴⁴ Sikila Yeso mwene yarusia ovuloli, ari omung'osi savechanga noluyali musivala sisie omwene tawe. ⁴⁵ Kho wayali niyakhenjila mu Galilaya, Avagalilaya vamwakanila, wa vava nivalolile ofundu fwosi fwa yali nakholile mumulukha kwali Yerusalemi: sikila vosi vali vachile mumulukha kwenoku. ⁴⁶ Kho Yeso yela wakalukha mu Kana ya Galilaya, wayali nalombile amachi okhuva edivai. Ne khwaliyo nende omundu mulala wo oluyali, wo omwana wuwe yali omulwale Kapernaumu. ⁴⁷ Wayawulila vari Yeso wukalukhe okhurula Evuyuda wuvele mu Galilaya, yarekhukha wacha waliyali, ne wamusaya ari okhomolokhe ache lwemwalo, ne awonie omwana wuwe: wali nakana okhufwa. ⁴⁸ Ne Yeso wamusungila ari, Nokhalolile esimanyikhilo nende kokhuwukia, sonyala wasuvila tawe. ⁴⁹ Omundu wo oluyali wulia wamusungila ari, Omwami, khomolokha khuche omwana wanje nakhafwa tawe. ⁵⁰ Yeso wamusungila ari, Ewe rekukha ochee; omwana wuwo alamenya. Ne omundu wulia yasuvila elikhuwa lilia lia Yeso yamusungila, ne warekukha wacha. ⁵¹ Ne wayali nalakholomokhanga emwalo, avakhalavani vave vakanana ninaye, ne vamusungila vari, Omwana wuwo nomulamu. ⁵² Ne naye warunilisia okhurula khu nivo echisa chayachakilekho okhusosa. Ne vamusungila vari, Yivele mungolove muchisa cha musafu musitere womurengo kumulekhulile. ⁵³ Kho papa wuwe wanya ari yivele eyisa yeneyo, wa Yeso yamusungile ari, Omwana wuwo alamenya: ne anga omwene yasuvile, nende eyinju yiye yosi. ⁵⁴ Lino khandi liava likhola khavili Yeso okhukhola amayiya, wayali niyakhecha okhurula Evuyuda niyakhenjila mu Galilaya.