¹ Khwaliwo nende omundu mulala khu Avafarisayo, wavalanganga vari Nkodemo, omukhongo wa Avayawudi. ² Mulala wachena wuno yecha khu Yeso musilo, ne wamusungil ari, Rabbi, khumanyile khuri ewe wuvele omwekesi okhurula khuu Nyasaye: sikila avulawo omundu wunyala okhukhola amayiya kolakholanga kano, okhurusiakho Nyasaye ave halala ninaye. ³ Yeso wamuchiva wamusungila ari, Kang'ali, kang'ali, nakhusungilanga ewe, Okhurusiakho omundu yevulwe khandi, sanyala okhulola ovwami vwa Nyasaye tawe. ⁴ Nikodemu wamusungila ari, omundu anyala ariena wela wevulwa niyakhasakhula? anyala wela wakalukha mundamwa mwa mayi wuwe ne wela wevulwa? ⁵ Ne Yeso wamuchiva ne wamusungila ari, Kang'ali, kang'ali, Nakhusungilanga ewe, Okhurusiakho omundu yevulwe mumachi nende mu Roo, sanyala okhwinjila mu vwami vwa Nyasaye tawe. ⁶ Silia sievulwa mumuvili nisio omuvili; ne silia sievulwa mu Roo ne eroo. ⁷ Okhachenya anga ekhusungile endi, Wenyekha wivulwe khandi. ⁸ Eyimboo yiwuchanga neyicha wayenyile, ne ewe owulilanga vusa okhuwucha khwayo, nikakhali sonyala wasunga wayalarulanga, nende wayalachanga tawe: niwo anga ali vuli sia mulala wevulwa nende Roo. ⁹ Nikodemu wachiva ne wamusungila ari, Ofundu funo funyala fwava furiena? ¹⁰ Yeso wamuchiva wamusungila ari, Ewe soli omukhongo wa Yisraeli, ne somanyile ofundu funo tawe? ¹¹ Kang'ali, kang'ali, Nakhusungilanga ewe, Khulakayanga khu kokhumanyile, ne khurusa ovuloli khu kalia kokhulolile; nenywe semwiyamanga ovuloli vwefu tawe. ¹² Nikava nikhusungile ofundu fuli fwe esivala, ne solasuvilanga tawe, walasuvila oriena, nikava nakhusungila khu fundu fwo mwikulu? ¹³ Ne avulawo omundu yesi waninakho wacha yikulu mwikulu tawe, nikakhali wulia wekha hasi okhurula mwikulu, nali niye Omwana wo omundu wuli mwikulu. ¹⁴ Ne anga Musa yachingula eyinjukha musiangalamwe, niwo anga Omwana wo omundu alachingulwa yikulu: ¹⁵ Kho wulia yesi wusuvila muniye akhativa tawe, nikakhali ave novulamu vwa mindali. ¹⁶ Sikila Nyasaye yayanja vomusiva, kho wahana Omwana wuwe yeng'ene omutelwa, vari vuli yesi walasuvila muniye akhativa tawe, nikakhali ave novulamu vwa mindali. ¹⁷ Sikila Nyasaye siyaruma Omwana wuwe musivala okhulakila esivala tawe; nikakhali vari esivala okhuvirila muniye siwonisiwe. ¹⁸ Wulia walamusuvila salakhalakilwa tawe: nikakhali wukhasuvila tawe wakhalakilwa khale, sikila siwasuvila mu lira lili liong'ene lio Omwana omutelwa wa Nyasaye tawe. ¹⁹ Ne lino nilio elikhalakilwa, vari ovulafu vwayecha musivala, ne avandu vayanja esilima okhuvira ovulafu, sikila ofukholwa fwavo fwali ofuvi. ²⁰ Sikila vuli sia mulala wukholanga amavi walova ovulafu, khandi siyechanga wovulafu vuli tawe, ofukholwa fufwe fukhecha fwaviyisiwa. ²¹ Nikakhali wulia wukholanga ovung'ali yechanga muvulafu, kho ofukholwa fufwe futukhe okhumanyikhha, vari fwikholekhananga mu Nyasaye. ²² Wo ofundu funo fwali nifwakhavira, Yeso nende aveki vave vecha musivala sia Yuteya; ne eweneyo wekhalayo ninavo, ne nabatisia. ²³ Ne Yohana yesi yabatisianga Ayinoni ahembi nende Salimu, sikila khwaliwo na amachi amanyingi awene yawo: ne navo vecha, ne vabatisiwa. ²⁴ Sikila Yohana yali asili okhutilwa warelwa muchela tawe. ²⁵ Ne khwarulilawo nokhuyingania akari wa aveki valala va Yohana nende Avayawudi okhulondokhana nende okhwitakasa. ²⁶ Ne vecha khu Yohana, ne vamusungila vari, Rabbi, wulia wavele ninawe evweni wa Yoridani, we ewe warusiakho ovuloli, lola, yesi alabatisianga, ne avandu vosi valechanga khuniye. ²⁷ Yohana wavachiva wavasungila ari, omundu sanyala okhunyola esindu siosi tawe, okhurusiakho ave welesiwe okhurula mwikulu. ²⁸ Enywe mwavene mwakharusia ovuloli muri nasunga endi, esie sendi Kristo tawe, nikakhali esie nirumilwe evweni wuwe. ²⁹ Wulia wuli nende omweya niye mwene esiselelo: nikakhali omusale wo mwene esiselelo, asinjilangawo vusa khandi narekelesia, asangalanga ovukali wawulilanga omwoyo kwa mwene esiselelo: kho siesi ovuyanji vwanje vwichule. ³⁰ Kenyekhana niye atasikhe, ne esie embungukhe ³¹ Wulia walechanga okhurula yikulu wuvele yikulu wa kosi: ne wulia wuli womusivala ni wesivala, ne alakayanga ko musivala: Wulia wokhurula mwikuluwuvele yikulu wa kosi. ³² Ne kalia kalolile khandi wawulila, niko kakholelanga ovuloli; ne avulawo omundu wiyamanga ovuloli vuvwe. ³³ Wulia wiyamanga ovuloli vuvwe arechangakho omuwuri kukwe ari Nyasaye niwang'ali. ³⁴ Sikila wulia wa Nyasaye arumile alakayanga amakhuwa ka Nyasaye: sikila Nyasaye samwelesianga Roo khu sikelo tawe. ³⁵ Papa wayanja Omwana, ne wamuwa ofundu fwosi mumukhono kukwe. ³⁶ Wulia wusuvila Omwana wuvele no ovulamu vwa mindali: ne wulia wukhasuvila Omwana tawe salalola ovulamu tawe; nikakhali eliruma lia Nyasaye liamenya khuniye.