¹ Ne eyindalo ya khataru khwaliwo nende esiselelo mu Kana ya Galilaya; ne mayi wa Yeso yesi yaliyo: ² Yeso yesi, na aveki vave, vali valangilwe musiselelo sienesio. ³ Ne wavali nivakhenya edivai, mayi wa Yeso yamusungila ari, sevali ne edivai tawe. ⁴ Ne Yeso wamusungila ari, Mayi, Nina sina sina ninawe, eyisa yanje yisili okhwola. ⁵ Mayi wuwe wasungila avakhalavani ari, Liosi lialamusungila, likhole. ⁶ Ne avwene yawo vali varenjekhewo echinyungu cha amakina chisasava, chali nechirerwewo khu lwo omulukha kwa Avayawudi kwa amasavo, ne vuli siandala yavukulanga khuli emitungi kivili nohomba kitaru kia amachi. ⁷ Yeso wavasungila ari, Yichusie echinyungu nende amachi. Ne vachichusia chola khululika. ⁸ Ne wavasungila ari, Teyekhomo vulano, ne muyilile omwimilisi wo omulukha. Ne vateya vayila. ⁹ Wo omwimilisi wo omulukha yali niyakhakonyela amachi kali nikakhava edivai, ne siyamanya wayali neyirulile tawe: (nikakhali avakhalavani vateya amachi nivo vamanya;) omwimilisi wo omulukha yalanga mwene esiselelo, ¹⁰ Ne wamureva ari, Vuli omundu mukhuranga anyowanga arera edivai yili eyindayi; ne wavandu vavechanga nivakhanywa nivakhekura, kho arera yichangalile: nikakhali ewe osivikhile yili eyindayi okhwola vulano vuri. ¹¹ Okhuchaka khwa amayiya kano Yeso yakakhola mu Kana ya Galilaya, ne kekesia ovukhumi vuvwe; ne aveki vave vava nelisuvila muniye. ¹² Wa kano kali nikakhavira, yekha omwikha wacha Kapenawumu, niye , nende mayi wuwe, nende wandaye vave, na aveki vave: n vachililila okhuva eweneyi khu chindalo chinditi. ¹³ Ne epasaka ya Avayawudi yali ahembi, ne Yeso watikukha wacha Yerusalemi. ¹⁴ Ne wanyola mwitembeli valia vali nivalakusianga echiheyi nende amachese nende amawusi, nende vafunjanga echirubia nivekhale: ¹⁵ Ne wayali niyakhalomba omushrati kwe echisia chintiti, yavelukhasia vosi okhurula mwitembeli, nende amachese, nende echiheyi; ne wachukha hasi echirubia cha valia vafunjanga, ne wafumalisia echimesa; ¹⁶ Ne wasungila valia vali nivalakusianga amawusi ari, Rusie hano ofundu funo; mukhakhola eyinju ya Papa wanje okhuva esoko tawe. ¹⁷ Ne aveki vave vechulila vari kayandikwa vari, Ovuheli vuvwe eyinju yiyo vwalandichanga esie. ¹⁸ Niwo wa Avayawudi vamuchiva ne vamusungila vari, Simanyikhilo sina siewe walakhwekesia efwe, khu fundu fwolakholanga funo? ¹⁹ Yeso wavachiva ne wavasungila ari, Kwiisie elitembeli lino, ne khu lwe echindalo chitaru nava nilisinjisie. ²⁰ Ne Avayawudi vasunga vari, Elitembali lino liavukula emiyika amakhumi kane ne kisasava okhumbakha, ne ewe onyala oriena okhulisinjisia khu lwe chindalo chitaru? ²¹ Nikakhali niye yalakayanga khu litembali lio omuvili kukwe. ²² Khu kario wayali nasisimukhe okhurula mu vafwa, aveki vave vechulila vari yali wavasungila akene kano; ne vasuvila amandiko, nende elihuwa lia Yeso yali nasungile. ²³ Vulano wa yali Yerusalemi khu pasaka, muyindalo yo omulukha, avanyingi vasuvila mu lira lilie, wavalola amayiya ka yakhola. ²⁴ Nikakhali Yeso siyayerusia khu nivo tawe, sikila yali wamanya avandu vosi, ²⁵ Ne siyayenya omundu yesi arusie ovuloli vwo omundu tawe: sikila omwene yali wamanya kali mu mundu.