¹ Mukhuranga khwali ne Elukhuwa, ne Elikhuwa yali nende Nyasaye, ne Elikhuwa yali Nyasaye. ² Mulala wachena wuno yali mukhuranga nende Nyasaye. ³ Ofundu fwosi fwalombwa khu muniye; ne vulali niye silawo siakhalombilwe khu fwalombwa tawe. ⁴ Muniye khwalimo no ovulamu; ne ovulamu vwali ovulafu vwa avandu. ⁵ Ne ovulafu vwakhanga musilima; ne esilima sesivukhaya tawe. ⁶ Khwaliwo nende omundu warumwa okhurula khu Nyasaye, ne elira lilie liali vari Yohana. ⁷ Mulala wachena wuno yecha okhurusia ovuloli, okhurusia ovuloli vwo ovulafu , vari avandu vosi okhuvurila Muniye vatukhe okhusuvila. ⁸ Omwene seyali Ovulafu vulia tawe, nikakhali yarumwa okhurela ovuloli vwo Ovulafu vulia. ⁹ Wulia niye wali Ovulafu vwa ng'ali, vwakhilanga vuli omundu wicha musivala. ¹⁰ Yali musivala, ne esivala sialombwa Ninaye, ne esivala sesiamumanya tawe. ¹¹ Yecha khuvali avave Omwene, ne avave Omwene sevamwinjisia tawe. ¹² Nikhali anga avanyingi vamwiyama, khunivo yavawelesia ovunyali vwo okhuva avana va Nyasaye, nivali nivo valia vasuvila khu lira lilie: ¹³ Vakhevulwa okhurula khu mavanga, nohomba khulienya lio omuvili, nohomba khu lienya lio omundu tawe, nikhali khu lienya lia Nyasaye. ¹⁴ Ne Elikhuwa lialombikha okhuva omuvili, ne wamenya mwifwe, (ne khwalola ovukhumi vuvwe, ovukhumi anga vwo Omwana mulala omutelwa wa Papa,) wechula ovukasu nende ovung'ali. ¹⁵ Yohana yarusia ovuloli vuvwe, ne walangilisia, nasunga ari, Wuno niye wanasunga, endi wulia walecha yinyuma wanje yali evweni wanje: sikila yaliwo esie nekhavawo tawe. ¹⁶ Ne muvwichufu vuvwe efwe fwesi khwavunyola, nende ovukasu khu vukasu. ¹⁷ Sikila elilaka liarusiwa nende Musa, nikakhali ovukasu nende ovung'ali vwecha okhuvirila Yeso Kristo. ¹⁸ Avulawo omundu yesi walolakho Nyasaye khu sikha siosi tawe; nalali Omwana omutelwa yeng'ene, wuli musilufu sia Papa, niye wamumanyisia. ¹⁹ Vulano kano niko amakalusio ka Yohana, wa Avayawudi varuma avasalisi, nende Avalawi okhurula Jerusalemi veche vamureve vari, Ewe ni wina? ²⁰ Ne yaveyamila, ne siyayekana tawe; nikakhali yaveyamila ari, Esie sendi Kristo tawe. ²¹ Ne navo vamureva vari, Ewe niwina? Ewe ni Elicha? Ne naye wasunga ari, sendi niye tawe. Niwe omung'osi wulia? Ne wavachiva ari, Tawe. ²² Ne navo vamureva vari, Ne ewe niwiina? kho nafwe khuyile amakalusio khu valia vakhurumile efwe. Walasunganga ori sina khu wamwene? ²³ Wasunga ari, Esie nomwoyo kwa ulia walalangilanga musiangalamwe, Lomba yikololokhe eyinjila yo Omwami, anga omung'osi Isaya yasunga. ²⁴ Ne valia vali nivarumilwe vali va Avafarisayo. ²⁵ Ne vamureva, nivasunga vari, Ne sikila sina ewe walabatisianga, nokhali Kristo wulia, nohomba Elicha, nohomba omung'osi wulia tawe? ²⁶ Yohana wavachiva, nasunga ari, Esie nabatisianga na amachi: nikakhali wuwo mulala wusinjile mwinywe, wenywe mukhamanyile tawe; ²⁷ Ne Niye,walechanga inyuma wanje ne niye waliwo evweni wanje, wenywe mukhamumanyile tawe, wo omukoye kwo ofuralo fufwe sendukhane okhukukangulula tawe. ²⁸ Amakhuwa kano kekholekhana Betsania injelekha wa Joritani, wa Yohana yabatisiaanga. ²⁹ Eyindalo yilondakho Yohana yalola Yeso alechanga wali, nenaye wasunga ari, Lola Esimeme sia Nyasaye, walarusiangawo ovwoni vwe musivala. ³⁰ Wuno niye wesie namusungilanga endi, Yinyuma wanje alecha Omundu waliwo evweni wanj: sikila yaliwo evweni wanje. ³¹ Nesie sinali ninamumanya tawe: nikakhali kali vari atukhe amanyikhe khu Yisraeli, niko kakila necha nemubatisia mu machi. ^{34 32} Ne Yohana warusia ovuloli, nasunga ari, Endolile Roo nalekhanga okhurula mwikulu anga eliwusi, ne liamuyelakho. ³³ Ne esie sinamumanya tawe: nikhali wulia wanduma niche embatisie na amachi, niye mulala wachena wasungila ari, khu wulia wolalola Roo namwikhakho, ne amusikalekho, mulala mwenoyo niye walabatisia nende Roo Omuchenukhu. Ne anga nalola, narusia ovuloli endi wuno niye Omwana wa Nyasaye. ³⁵ Khandi eyindalo yalondakho wa Yohana yali nasinjile nende vavili khu veki vave; ³⁶ Ne nivalolelele khuli Yeso yali nalakendanga, yasunga ari, Lola Esimeme sia Nyasaye! ³⁷ Ne aveki vavili vamuwulila nalaya, ne valonda Yeso. ³⁸ Ne Yeso wesevukha, ne wavalola valamulondanga, ne wavasungila ari, Enywe mwalakhavanga sina?. Vamusungila vari, Rabbi, (nikhwo okhusunga mukhukalukhasia vari, Omwivali,) Ewe omenyile heena? ³⁹ Wavasungila ari, Yicha mulole. Vecha ne valola wamenyile, ne vekhala ninaye eyindalo yeneyi: sikila chali echisa elikhumi angolove. ⁴⁰ Mulala khu vavili wawulila Yohana nalakaya, ne walonda Yeso yali Andreya, wandaye Simoni Petero. ⁴¹ Wokhuranga yanyowa wanyola wandaye wuwe mwene Simoni, ne wamusungila ari, khunyolile Masiya, lili, mukhukalukhasia vari, Kristo. ⁴² Ne wamurela khu Yeso. Ne anga Yeso yamulola, yasunga ari, Ewe vakhulanganga vari Simoni omwana wa Yona: walalangwa ori Kefa, mukhukalukhasia ni, Elikina. ⁴³ Eyindalo yali yilondakho Yeso yerechekha okhucha Galilaya, ne wanyola Filipo, ne wamusungila ari, Nondekho. ⁴⁴ Vulano Filipo yamenyanga Betsisaida etawuni ya Andeya nende Petero. ⁴⁵ Filipo wanyola Natsanieli, ne wamusungila ari, Khumunyolile, wa Musa yandika mulilaka nende wavang'osi vandika, Yeso wa Nazareti omwana wa Josefu. ⁴⁶ Naye Natsanieli wamusungila ari, Evweneyo sikhoyo esindu esilayi siosi sinyala siarula Nazareti? Filipo wamusungila ari, Yicha ne olole. ⁴⁷ Yeso yalola Natsanieli alechanga wali, ne wamusungila ari, Lola Omuyisaraeli wang'ali wukhalimo ovuvacha tawe! ⁴⁸ Natsanieli wamusungila ari, Wamanyila heena? Yeso wamuchiva ne wamusungila ari, Wa Filipo avele nasili okhukhulanga, wovele hasi womusala omukhuyu, Ekhulolile. ⁴⁹ Natsanieli wamuchiva ne wamusungila ari, Rabbi, Ewe wuvele Omwana wa Nyasaye; Ewe wuvele Omwami wa Yisraeli. ⁵⁰ Yeso wamuchiva wamusungila ari, Sikila ekhusungile endi, ekhulolile hasi wo omusala omukhuyu, osuvile ewe? walalola ofundu ofukali fuvira kano. ⁵¹ Ne Wamusungila ari, Kang'ali, Kang'ali, Nakhusungilanga ewe, okhurulila hano, walalola elikulu nelikukhe, ne echingelosi cha Nyasaye nechalaninanga khandi nichalekhanga khu Mwana wo Omundu