¹ Kang'ali, kang'ali, Namusungilanga enywe, Wulia wukhavirila mumuliango kwo okhwinjila musiko sia amachese, nikakhali arumila avundu wundi, omwene wulia nomwifwi khandi nomunuli. ² Nikakhali wulia wuvirilanga mumuliango no omwayi wa amachese. ³ Omwene wulia niye womulindi wo omuliango yekulilanga; ne amachese kawulilanga omwoyo kukwe: ne alanganga amachese kake omwene khu lira, ne akemilila okhurula elwanyi. ⁴ Ne omwene warusianga elwanyi amachese kake, yemilanga evweni wakoo, ne amachese nako kamulonda: sikila kamanya omwoyo kukwe. ⁵ Ne sikanyala kalonda omurende tawe, nikakhali kamwilukhanga: sikila sikamanyile omwoyo kwa avarende tawe. ⁶ Olukano luno Yeso yavalakayila: nikakhali sivamanyilisia ni makhuwa sina kayavalakayilanga tawe. ⁷ Ne Yeso wela wavasungila khandi ari, Kang'ali, kang'ali, Namusungilanga enywe, Esie nisie omuliango kwa amachese. ⁸ Valia vosi vekholelesia vecha esie nesili okhwicha navefwi khandi navanuli: nikakhali amachese sikavawulila tawe. ⁹ Esie nisie omuliango: nikava omundu yesi alenjila mukari okhuvirila khwisie, omwene wulia ava alawonisiwa, ne ava alenjila ne arule, khandi anyole amayilo. ¹⁰ Omwifwi siyechanga, nakhali wokhwiva, nende okhwira, nende okhwinona tawe: Esie nasie nichile vatukhe okhuva novulamu, ne vave ninavwo muvwichufu. ¹¹ Esie nisie omwayi omulayi: omwayi omulayi arusianga ovulamu vuvwe sikila amachese. ¹² Nikakhali omwandikwa, wukhali omwayi tawe, wa amachese kakhali akake tawe, walolanga esivulukhu nesicha, alekhanga amachese, ne yelukha: ne esivulukhu sikatila, ne sisalanisia amachese. ¹³ Omwandikwa yelukhanga, sikila niye wayandikwa, ne sali omulindi wa amachese tawe. ¹⁴ Esie nisie omwayi omulayi, ne namanya amachese kanje, ne namanyikhana khu vali avanje. ¹⁵ Anga Papa yamanya esie, niwo anga siesi namanya Papa: ne nara hasi ovulamu vwanje sikila amachese. ¹⁶ Ne amachese kandi nivele ninako, kakhali ke elituli lino tawe: akenako kosi kenyekhana engarere, ne nako kalawulila omwoyo kwanje; ne khwalecha khuve nelituli lilala nende omwayi mulala. ¹⁷ Khu kario kaakila Papa wanje wayanyanja, sikila nara hasi ovulamu vwanje, kho nele okhuvuvukula khandi. ¹⁸ Avulawo omundu wunyala wavuvukula okhurula khwisie, nikakhali samwene nisie wavura hasi, ne nivele novunyali vwo okhuvura hasi, khandi nivele novunyali vwo okhuvuvukula khandi. Elilaka lino nalinyola okhurula khu Papa wanje. ¹⁹ Khu kario ovwawukhani vwela vwanyolekhana khandi akarikari wa Avayawudi okhulondokhana nende amakhuwa kenekano. ²⁰ Ne avanyingi khu nivo vasunga vari, Wuno wunesisieno, khandi wakhalalukha; sikila sina mwalamurekelesianga? ²¹ Avandi vasunga vari, Kano sikali amakhuwa ko omundu wuli nesisieno tawe. Esisieno sinyala siekula echimoni cho omuvofu? ²² Ne mu Yerusalemi khwalimo nomulukha kwo Okhwawulwa, ne chali echindalo cho omunyiri. ²³ Ne Yeso wakenda mwitempeli mulichipi lia Solomoni. ²⁴ Ne Avayawudi vecha vamuvotokhana, ne vamusungila vari, walachililila okhukhwayayisia okhutukha lina? Kava vari ewe wuvele Kristo, khusungile avulafu. ²⁵ Yeso wavachiva ari, Namusungila, ne enywe simwasuvila tawe: emilimo kiekholanga murila lia Papa wanje, kindusianga esie ovuloli. ²⁶ Nikakhali somusuvilanga tawe, sikila enywe semuli va amachese kanje tawe, khuli anga namusungila. ²⁷ Amachese kanje kawulilanga omwoyo kwanje, ne Esie navamanya, ne navo vanondanga esie. ²⁸ Ne esie navawelesia ovulamu vwa mindali; ne navo sivalivuna tawe, ne saliwo omundu wulinula okhurula mumukhono kwanje tawe. ²⁹ Papa wanje, wampelesia avenavo, nomukali okhuvira vosi; ne avulawo omundu wunyala wavanula okhurula mumukhono kwa Papa wanje tawe. ³⁰ Esie nende Papa wanje khuvele esindu silala. ³¹ Neniwo wa Avayawudi vela khandi vatola amakina nivenya okhumukhupa ninako. ³² Yeso wavachiva ari, emilimo eminyingi emilayi namwekesia okhurula khu Papa wanje, khu milimo sina khu kiene kilia kia mwalenyanga okhukhupilakho amakina? ³³ Avayawudi vamuchiva, nivasunga vari, sikhwalenyanga okhukhupilaa khu emilimo emilayi tawe nikakhali khu vwononi; ne nikakhali vari ewe, wuvele omundu, walelombanga okhuva Nyasaye. ³⁴ Yeso wavachiva ari, sikayandikwa mwilaka lienyu, nasunga endi, muvele avanyasaye? ³⁵ Nikava vari yavalanga ari avanyasaye, khu valia ve elikhuwa lia Nyasaye liechela, ne eliandiko selinyala liariolwa tawe; ³⁶ Munyala mwasunga muriena, khu wulia wa Papa yatakasa, ne wamuruma musivala muri, Ewe nomwononi, sikila esungile endi, Esie nivele Omwana wa Nyasaye? ³⁷ Nekhakhola emilimo kia Papa wanje tawe, mukhasuvila tawe. ³⁸ Nikakhali nekhola, ata nomulekha okhusuvila esie, suvile evikholwa: kho mumanye, ne musuvile, muri Papa wuvele mwisie, Nesie nivele muniye. ³⁹ Khu kario khandi vakhava okhumutila; nikakhali yefuvarula warula mumukhono kwavo, ⁴⁰ Ne wela wacha khandi yinjelekha wa Yoridani avundu wa Yohana yachakila okhubatisia mukhuranga; ne wekhala ewene yilia. ⁴¹ Ne avanyingi vamulondakho, ne vasunga vari, Yohana siyakholakho amayiya kosi tawe: nikakhali ofundu fwosi fwa Yohana yalakaya okhulondokhana nende omundu wuno nikang'ali. ⁴² Ne avanyingi vamusuvila ewene yilia.