¹ Vulano khwaliwo nomundu wundi wali omulwale, wavalanganga vari Lazaro, wa Betsania, elitokho lia Maria nende omukhana wavo Marita. ² (Ni Maria mwene wulia niye wavakha amafura khu Omwami, ne wapangusia ofulenge fufwe nende eliswi lilie, wa wandaye wuwe vari Lazaro wali omulwale.) ³ Khu kario wandaye vave avesikoko varumasia, nivasunga vari, Omwami, lolakho, wulia we ewe wayanja nomulwale. ⁴ Anga Yeso yawulila ario, yasunga ari, Ovulwale vuno sovuli vwelifwa tawe, nikakhali nivwo okhurela ovukhumi khu Nyasaye, kho Omwana wa Nyasaye ave wufumisiwa avwene yawo. ⁵ Yeso yali wayanja Marita nende omukhana wavo, nende Lazaro. ⁶ Khu kario anga yawulila vari nomulwale, yachililila okhwikhala avundu halala wayali echindalo chindi chivili. ⁷ Ne olunyuma wasungila aveki vave ari, Lekha khukalukhe Evuyuda khandi. ⁸ Aveki vave vamusungila vari, Omwani, Avayawudi sivenyile okhukhupa amakina ahembi hano; ne ewe walenyanga okhuchayo khandi? ⁹ Yeso wavachiva ari, Eyindalo seyivechanga ne echisa elikhumi nende chivili? Nikava omundu yesi alakenda musitere, siyeyikumulanga tawe, sikila avechanga alalolanga ovulafu vwo musivala muno. ¹⁰ Nikakhali omundu nakenda musilo, yeyikumulanga, sikila ovulafu sevuli muniye tawe. ¹¹ Amakhuwa kano yakalakaya: ne yinyuma wako wavasungila ari, Omusale wefu Lazaro wukonile; nikakhali nachichanga, emuvusie arule muchindolo. ¹² Niwo waveki vave vasunga vari, Omwami, nikava alakonanga, ava alawona. ¹³ Yeso yalakayanga khu lifwa lilie: nikhali navo vaparanga vari nokhukona khwo okhwimunya. ¹⁴ Niwo wa Yeso yavasungila avulafu ari, Lazaro wufwile. ¹⁵ Ne Esie niyanjile khu sikila enywe vari sinavelewo tawe, khu sifune mutukhe okhuva vokhusuvila; kakhava nikali kario lekha khumwolekho. ¹⁶ Niwo wa Tomasi, walangwangwa vari Ditimu, yasungila avasie ari, Lekha fwesi khuche, fwesi khufwe ninaye. ¹⁷ Niwo anga Yeso yecha, wanyola vari yali wumalile khale echindalo chinne musilindwa. ¹⁸ Nayo Betsani yali ahembi nende Yerusalemi, kama echimayili chitukha chivili okhurula aweneyawo. ¹⁹ Ne Avayawudi avanyingi vecha khu Marita nende Maria, okhuvekhusia okhulondokhana nende elifwa lio omusiani wavo. ²⁰ Niwo wa Marita, yarulilakho vwangu anga yawulila vari Yeso alechanga, yacha ne wamwakanila: nikakhali Maria yali wikhale nalinyile munju. ²¹ Niwo wa Marita yasungila Yeso ari, Omwami, niwakhavele hano, omusiani wefu siyakhafwile tawe. ²² Nikakhali nimanyile endi, ata khu sikha sino, lilia liosi liolasava khu Nyasaye, Nyasaye alakhuwelesia ewe. ²³ Yeso wamusungila ari, Omusiani wenyu alavukha khandi. ²⁴ Marita wamusungila ari, Nimanyile endi alivukha khandi mulisisimusia lie eyindalo eyimalilisi. ²⁵ Yeso wamusungila ari, Esie nisie elisisimusia, nende ovulamu: wulia walasuvila mwisie, akhava niyafwa, ava alela okhumenya: ²⁶ Ne wulia yesi wamenya ne wasuvile mwisie salifwa tawe. Ewe wusuvile eliene lino? ²⁷ Wasunga ari, Eeh nisuvile, Omwami: Nisuvile endi Ewe niwe Kristo, Omwana wa Nyasaye, wwukhoyele yeche musivala. ²⁸ Ne anga yali niyakhalakaya ario, yarekukha vwangu wachaa, ne walanga omukooko wavu muvwikisi, namusungila ari, Omwami wakhecha ne alakhulanganga. ²⁹ Anga yawulila vusa ario, yavukha warula vwangu, ne wecha wayali. ³⁰ Khu sikha sino Yeso yali akhenjila mwitokho tawe, nikakhali yali asili avundu wa Marita yali namwakanile. ³¹ Avayawudi navo vali ninaye munju, ne nivalamwikhusianga, anga valola Maria, anga yali navukhile vwangu ne warula elwanyi, vamulondakho, nivasunga vari, Wakhacha okhulilila khu silindwa. ³² Niwo anga Maria yali niyakhola avwene wa Yeso yali, ne wamulola, yamukhwa mufulenge fufwe, nasunga ari, Omwami, niwakhavelewo, omusiani wefu siyakhafwile tawe. ³³ Khu kario anga Yeso yamulola nalalilanga, nende Avayawudi vali nivamulondile vosi nivalalilanga, wavelela muroo, ne wanyakhana. ³⁴ Ne wasunga ari, Mumuyavile hena? Vamusungila vari, Omwami, yicha olole. ³⁵ Yeso yalila. ³⁶ Niwo wa Avayawudi vasunga vari, Lolanga yavele niyamuyanja! ³⁷ Ne valala khu vene yavo vasunga vari, Yaani omundu wuno, wawoniyenge echimoni cha avavofu, siyakhakholile omusacha wuno alekhe okhufwa? ³⁸ Yeso khu kario khandi wela wavelela mukari mumwe wayecha wesilindwa siali. Yali ekhombe, ne elikina liali lifunikhe khwikulu. ³⁹ Yeso wasunga ari, Rusiakho elikina. Marita omukooko wa wulia wali nafwile, wamusungila ari, Omwami, okhwola esikha sino anyala okhuva alawunyanga: sikila nechindalo chinne okhurula nafwa. ⁴⁰ Yeso wamusungila ari, Ewe sekhusungile, endi, nikava walasuvila, ova walalola ovukhumi vwa Nyasaye? ⁴¹ Ne niwo wavarusiawo elikina okhurula avundu wavali nivalisie omufu. Ne Yeso walikamila echimoni chiche yikulu, ne wasunga ari, Papa, Ekhupila orio muno sikila ewe wumbulile. ⁴² Nesie namanya endi ewewumbulilanga vuli lwosi: nikakhali sikila avandu vasinjile hano esungile endio, kho vatukhe okhumanye vari ewe niwe wanduma esie. ⁴³ Ne wayali nikhalakaya ario, yalanga nomwoyo omukali, Lazaro, yicha yino. ⁴⁴ Ne wulia wali nafwile warula wecha, navoyilwe omukhono nende esilenge muchinguvo chemusilindwa: ne muvweni vwosi yali wuvoyilwe nesitambaya. Yeso wavasungila ari, Mukangulule, ne mumulekhule achee. ^{46 45} Ne niwo wa Avayawudi avanyingi vali nivechile khu Maria, ne khandi valola ofundu fwa Yeso yakhola, vava nelisuvila khu niye. Nikakhali valala khunivo varula awenawo vacha khu chinjila chavo khu Avafarisayo, ne vavasungila kalia ka Yeso yali nakholile. ⁴⁷ Ne niwo wavasalisi avakhongo nende esikhalo sia Avafarisayo vekhung'asia, ne vasunga vari, Khukhole sina? sikila omundu wuno alakholanga amayiya amanyingi. ⁴⁸ Nokhumulekha vusa khuri, avandu vosi vava valamusuvila niye: khandi Avaroma vava valecha ne varusiewo ovwiyangu vwefu nende esialo. ⁴⁹ Ne mulala khunivo, wavalanganga vari Kayafa, wali omusalisi omukhongo omuyika kwene kulia, wavasungila ari, Khu kosi enywe semumanyilekho esindu siosi tawe. ⁵⁰ Nohomba enywe semwalalolanga muri novulayi khwifwe, omundu mulala akhoyela afwile avandu, ne esialo siosi silekhe okhuvuna. ⁵¹ Ne kano siyasunga omwene tawe: nikakhali anga yali omusalisi omukhongo omuyika kwene kulia, yarusia ovung'osi ari Yeso akhoyela afwile esialo siene silia; ⁵² Ne sesili esialo sienesi siong'ene tawe, nikakhali vari khandi akhoyela asolole halala mumuvili mulala avana va Nyasaye valia vasalanila vuli avundu. ⁵³ Ne okhurulila eyindalo yeneyo okhuchililila evweni vakhola esikhasio sia halala anga vanyala vamwira. ⁵⁴ Khu kario Yeso siyayelaa wakenda avulafu mu Vayawudi tawe; nikakhali yarulawo waacha musialo siali ahembi nende esiangalamwe, mwitokho lia valanganga vari Efurayimu, ne wachililila okhuva evwene eyo na aveki vave. ⁵⁵ Ne epasaka ya Avayawudi yali yikana okhwola: ne avandu avanyingi varula vuli avundu musialo vanina vacha Yerusalemi epasaka neyikhachaka tawe, vache vetakase. ⁵⁶ Niwo wavachaka okhukhavila Yeso, ne varevana avene khu vene, wqavali nivasinjile mwitempeli, Walaparanga oriena, anyala walekha okhwicha mumulukha kuno? ⁵⁷ Vulano vosi avasalisi avakhonga nende Avafarisayo vava varusiye elilaka, vari, khwava nende omundu yesi wumanyile wava nali, keyekha yeche asunge, kho navo vache vamutile.