¹ Ne wachali nechisikale echindalo sita okhuchaka epasaka Yeso yecha Betsani, wa Lazaro yali, wulia wali nafwile, wayasisimusiaokhurula muvafwa. ² Evweneyo wavulompelayo esiakhulia sia angolove; ne Marita wavatenda: nikakhali Lazaro yali mulala khu valia vali nivekhale ninaye. ³ Ne Maria wavukula enusu ye elita ya amafura kawunyanga ovulayi, koovukusi vuli vweyikulu wene, ne wavakha ofulenge fwa Yeso, ne wapungusia ofulenge fwenofu neliswi lilie: ne eyinju yeneyo yechulamo omuya omulayi kwa amafura kenako. ⁴ Niwo wa mulala khu veki vave, Yuda Isikarioti, omwana wa Simoni, wakalukha wamuchama, wasunga ari, ⁵ Sikila sina amafura kano nikakhakusiwa echidinari echimia chitaru, chelesiwa avatakha? ⁶ Kano yakalakaya, sikali vari yendelanga avatakha tawe; nikakhali sikila yali omwifwi, ne niye wali nomufuko, ne niye wavukulanga sia varechangamo. ⁷ Niwo wa Yeso yasunga ari, Lekhana ninaye: yavele wavikha kano khu lweyindalo yokhuyavilwa khwanje. ⁸ Sikila avatambi muvechanga ninavo vuli lwosi; nikakhali semwalava ninasie vuli lwosi tawe. ⁹ Khu kario olukhumulo lwa Avayawudi avanyingi vamanya vari wuvele avwene yawo: ne sevayecha sikila Yeso yeng'ene tawe, nikakhali valolekho Lazaro yesi, wayali nalamusie okhurula muvafwa. ¹⁰ Nikakhali avasalisi avakhongo varevana anga vanyala okhwira Lazaro yesi; ¹¹ Sikila yali esifunane sia Avayawudi avanyingi okhuvarulakho, ne vasuvila mu Yeso. ¹² Eyindalo yalondakho avandu avanyingi vene vali nivechile mumulukha, anga vawulila vari Yeso alechanga Yerusalemi, ¹³ Vavukula echisakia cha amakhindu okhurula khumisala emikhindu, ne vemila vacha evweni okhumwakanila, ne valangilisia vari, Hosana: Wune eyikhavi Omuruki wa Yisraeli walechela mulira lio Omwami. ¹⁴ Ne Yeso, wayali niyakhanyola esikhili yali neyisili eyinyelele, yekhala khu yene yilia; khuli anga kali nikandikwa, ¹⁵ Okharia tawe, litokho lia Sayoni: lola, Omuruki wuwo alechanga, niyekhale khu sikhili yili eyinyelele. ¹⁶ Aveki vave sivamanyanga ofundu funo mukhuranga tawe: nikakhali wa Yeso yachingulwa muvukhumi, niwo wavechulila vari ofundu funo fwali fwayandikwa khu niye, ne khandi vari vali vakholile ofundu fwachena funo khu niye ¹⁷ Khu kario avandu valia vali ninaye wayalanga Lazaro okhurula musilindwa, ne wamulamusia okhurula muvafwa, nivo varusia ovuloli. ¹⁸ Sikila akene kano niko ka avandu khandi vechelakho okhumwakanila, sikila vali vawulile anga yali nakholile amayiya kano. ¹⁹ Khu kario Avafarisayo vasungana avene khu vene vari, Mwalalolanga anga mukhalanyala okhukhola esindu siosi tawe? lola, avandu esivala siosi vamulondilekho. ²⁰ Ne khwalimo nende Avakiriki valala vali munivo vosi vali nivechile okhusala mumulukha. ²¹ Khu kario valala vachena avo vecha khu Filipo, wali wa Betsisaita ya Galilaya, ne vamusaya, nivasunga vari, Omwami, khwalenyanga okhulola Yeso. ²² Filipo wecha ne wasungila Andreya: ne khandi Andreya nende Filipo vacha vasungila Yeso. ²³ Ne Yeso wavachiva, nasunga ari, Eyisa yakhola, yo Omwana wo omundu kenyekhana achingulwe muvukhumi. ²⁴ Kang'ali, kang'ali, namusungilanga enywe, Olumicho lwe eyinganu nolukhakwile mwilova ne lufwe, lusikalanga lwong'ene: nikakhali nolunyala lwafwa, lwamanga ovumicho ovunyingi. ²⁵ Wulia wayanja ovulamu vuvwe alavutifia; ne wulia walaviyila ovulamu vuvwe musivala muno ava alava ninavwokhu vulamu vwa mindali. ²⁶ Wavawo omundu yesi walakhalavanila esie, lekha yanonde; ne avundu Wesie emba nendi, niwo womurumikhi wanje yesi alava: wulia yesi walakhalavanila, omwene wulia niye wa Papa wanje alelesia oluyali. ²⁷ Vulano omwoyo kwanje kwalanyakhananga; ne nelilena lia nasunga? Papa, nanulie okhuchakila eyisa yino: nikakhali nakene kano niko kakila necha khu yisa yino. ²⁸ Papa, ovukhumi vuve khu lira lilio. Niwo wo omwoyo kwawulilikhana okhurula mwikulu, nokusunga kuri, Nelesie khale ovukhumi khu lira lianje, ne khandi naliyelesia ovukhumi. ²⁹ Khu kario avandu, vali nivasinjile avwene yawo, ne vawulila, vasunga vari omwoyo kulia kwalandulukha: avandi vasunga vari, Eyingelosi yimulakayile. ³⁰ Yeso wachiva ne wasunga ari, Omwoyo kuno sekwichile sikila esie tawe, nikakhali kwichile sikila enywe. ³¹ Vulano nokhukhalakilwa khwe esivala sino: vulano omuruki wesivala sino alarusiwa elwanyi. ³² Ne Esie wanava nenjingulwa okhurula mwilova, nakhwesa avandu voosi khwisie. ³³ Lino yalilakaya, okhumanyisia elifwa lifwana liriena lialecha okhufwa. ³⁴ Avandu vamuchiva vari,khuwulile okhurula mulilaka variKristo amenyanga mindali: ne sina siewe walasunganga ori, Omwana wo omundu walachingulwa yikulu? niwina niye omwana wo omundu wuno? ³⁵ Niwo wa Yeso yavasungila ari, Nesikha sititi sio ovulafu vusili ninanywe. Kenda nomusili novulafu, esilima nesisili okhwicha khwinywe: sikila wulia wukendanga musilima samanyanga walachichanga tawe. ³⁶ Enywe nomusili novulafu, suvila muvulafu, kho mutukhe okhuva avana vo ovulafu. Akene kano Yeso yakalakaya, ne warekukha, ne omwene wekisa okhuvarulakho. ³⁷ Nikakhali akhava niyakhola amayiya amanyingi evweni wavo, vava vakhamusuvila tawe: ³⁸ Kho olukano lwa Isaya omung'osi lutukhe okhwikholekha, lwa yalakaya ari, Omwami, niwina niye wasuvila ovurume vwefu? ne niwina niye weyimbamba yo Omwami yalolekhanila? ³⁹ Khu kario sivaanyala okhusuvila tawe, sikila vari Isaya yasunga khandi ari, ⁴⁰ Wavofusia echimoni chavo, khandi wakhola emwioyo kiavo okhuva emiumu; vari vakhalola ne echimoni chavo, nohomba vakhamanyilisia ne emwioyo kiavo, ne vakalukhasivwa, ne Esie navawonia. ⁴¹ Akene kano Isaya yakasunga, wayali niyakhalola ovukhumi vuvwe, ne walakaya khu niye. ⁴² Kakhavanikali kario muvaruki avakhongo vene khandi valimo avanyingi vali nivamusuvile; nikakhali sikila Avafarisayo sivamwiyama neminwa tawe, varia okhukhumwa musinakoki. ⁴³ Sikila vali vayanja eyifuma ya avandu okhuvira eyifuma ya Nyasaye. ⁴⁴ Yeso walangilisia nasunga ari, Wulia wara elisuvila lilie khwisie, siwara khwisie tawe, nikakhali wulia wanduma esie. ⁴⁵ Ne wulia walandolanga esie alalolanga wulia wanduma esie. ⁴⁶ Esie nayecha anga omulafu musivala, kho wulia yesi wusuvila esie akhamenya musilima tawe. ⁴⁷ Ne nikava omundu yesi alawulila amakhuwa kanje, ne alekhe okhusuvila, Esie sinamukhalakila tawe: sikila esie sinayecha okhukhalakila esivala tawe, nikakhali okhuwonia esivala. ⁴⁸ Wulia walandova esie, ne alekhe okhwiyama amakhuwa kanje,wuwo mulala walamukhalakila: elikhuwa lia nakhalakaya, ni lilala lieneli nilio liakene limukhalakile eyindalo yokhumalilikha. ⁴⁹ Sikila sinilakaye akanje samwene tawe; nikakhali ni ka Papa wanduma esie, yandakilisia, khu kekhoyele esunge nende kekhoyele endakaye. ⁵⁰ Ne Esie namanya endi okhulakilisia khukhwe novulamu vwa mindali: khu kario lilia liosi liendakaya, anga Papa mwene yasungila esie, nilio liendakaya