¹ Vulano womulukha kwe pasaka kwali nokukhachaka tawe, wa Yeso yamanya ari eyisa yiye yakhola wakhoyele arule musivala muno ache ave nende Papa, niyakhayanja valia vali avave omwene vava nivasili musivala, yavayanja okhwola okhumalilikha. ² Ne wesiakhulia sie eyingolove siali nisiakhawa, sietani wayali vulano niyakhara mu mwoyo kwa Yuda Isikarioti, omwana wa Simoni, ave wuchama; ³ Yeso namanyile ari Papa yali wurele ofundu fwosi mumikhono kikie, ne yali wayecha okhurula khu Nyasaye, ne alakalukha khu Nyasaye; ⁴ Yasinjila okhurula khu siakhulia sia angolove, ne wafwalula echinguvo cha yali nafwalile khikulu wachira aluveka ; ne wavukula etawulo, ne wevowa omwene. ⁵ Ne wayali niyakhachukha amachi khwi beseni, ne wachaka okhusinga ofulenge fwa aveki, ne nafupangusia nende etawulo ya yali niyevoyile. ⁶ Ne wola khu Simoni Petero: ne Petero wamusungila ari, Omwami, ewe nowokhusinga esie ofulenge? ⁷ Yeso wamuchiva wamusungila ari, Lie Esie nakholanga ewe solimanyile tawe; nikakhali walalimanya ninakhamala. ⁸ Petero wamusungila ari, Ewe sonyala wasinga ofulenge fwanje tawe. Yeso wamuchiva ari, Nekhakhusinga ewe tawe, ewe solava neliambana ninasie tawe. ⁹ Simoni Petero wamusungila ari, Omwami, nono okhaasinga ofulenge fwong'ene tawe, nikakhali khandi emikhono kianje nende omurwe kwanje. ¹⁰ Yeso wamusungila ari, wulia wisingile sakhoyele yesinge khandi tawe okhurusiakho asave ofulenge fufwe, nikakhali nomulafu vuli awundu: ne enywe muvele avalafu, nikakhali somuli mwesi tawe. ¹¹ Sikila yamanya wulia walecha okhumuchama; khu kario kakila wasunga ari, Enywe mwesi somuli avalafu tawe. ¹² Kho wayali niyakhamala okhuvasinga ofulenge fwavo, ne wafwala cha yali nafwalule, ne wekhala hasi khandi, yavasungila ari, Mumanyile kanakhakhola kano khwinywe? ¹³ Munanganga muri, Omwekesi khandi muri Omwami: ne musunganga ovulayi; sikila niwo anga Esie endi. ¹⁴ Kava vari, Omwami wenyu khandi Omwekesi, nimusingile ofulenge; mwesi mukhoyele musingane ofulenge. ¹⁵ Sikila nakhamuwelesia omufwano, muve mukhola anga nakhakhola khwinywe. ¹⁶ Kang'ali, kang'ali, namusungilanga enywe, Omukhalavani savechanga omukhongo khu mwami wuwe tawe; nohomba omurumwa savechanga omukhongo khu wulia wumuruma tawe. ¹⁷ Nikava mwalamanya ofundu funo, mwalava novusangafu wamwalafukhola. ¹⁸ Sinalakayilanga enywe mwesi tawe: Namanya valia vanarovola: nikakhali kho kahandikwa katukhe okhwikholekha, Wulia walalichanga esiakhulia ninasiie niye walakalukhana ave esinyuma ninasie. ¹⁹ Vulano namusungilanga nikakharulila tawe, kho, wakalecha okhurulila, mutukhe okhumanya muri Esie nisie. ²⁰ Kang'ali, kang'ali, Esie namusungilanga enywe, Wulia walakanila wulia yesi we Esie naruma alava wunjakanile esie; ne wulia walanjakanila esie alava wakanile wulia wanduma esie. ²¹ Ww Yeso yali nikhalakaya ario, yanyakhana muroo, ne warusia ovuloli, ne wasunga ari, Kang'ali, kang'ali, namusungilanga enywe, endi mulala khwinywe alanjama esie. ²² Niwo wa aveki vachaka okhulengelana khu vuli sia mulala, nivayaya niwina wayali nalalakayangakho. ^{25 23} Vulano khwaliwo mulala khu veki wali nayekhile khu silufu sia Yeso, wa Yeso yali niyayanja. ²⁴ Khu kario Petero wamusakula, ari amureve niwina wayali nalalakayangakho. Naye wulia wakalukhana eluveka khu silufu sia Yeso wamusungila ari, Omwami, niwina niye? ²⁶ Yeso wachiva ari, Ni wulia, wenelesia omukati, kwa nava ninakhatonga mumunyu. Ne wayakhatonga mumunyu, yelesia Yuda Isikarioti, omwana wa Simoni. ²⁷ Ne wayali niyakhakulia Sietani yenjila muniye. Niwo wa Yeso yamusungila ari, Silia siolenyanga okhukhola, sikhole vwangu. ²⁸ Vulano avulawo omundu yesi khu vali khu mesa wamanya esifune siakila namusungila ario tawe. ²⁹ Sikila valala khunivo vapara vari, sikila Yuda niye wali nomufuko kwe echirubia, vari Yeso wumusungile ari, Chokule ofundu fwalenyekhananga epasaka neyikhachaka ; nohomba vari, ache yelesiekho esindu khu vatakha. ³⁰ Naye anga yavukula walia yarula elwanyi vwangu: ne mwali musilo. ³¹ Khu kario anga yali niyakhacha elwanyi, Yeso yasunga ari, Vulano Omwana wo omundu wakhachingulwa muvukhumi, ne Nyasaye wakhachingulwa muvukhumi muniye. ³² Nikava Nyasaye alachingulwa muvukhumi muniye, Nyasaye naye ava alamuchingula muvukhumi muniye omwene, na ava alamuchingula muvukhumi avwene na avwene. ³³ Vana vanje, ne khu sikha vusa sititi sie Esie nava ninanywe: ne anga navele nesungile Avayawudi, Wesie nachichanga, enywe somunyala mwechayo tawe; niko vulano ke Esie namusungilanga. ³⁴ Elilako eliya namuwelesianga enywe, Vari muyanjane mwavene khu vene; anga Esie namuyanja enywe, vari khandi enywe mwesi muyanjane mwavene khu vene. ³⁵ Khu lino avandu vossi valamanya vari enywe muvele aveki vanje, nomuva novuyanji khu vuli sia mulala. ³⁶ Simoni Petero wamusungila ari, Omwami, Walachichanga hena?Yeso wamuchiva ari, Wesie nachichanga, ewe sonyala wanondakho vulano vuri tawe; nikakhali kene wunondekho yinyuma. ³⁷ Petero wamusungila ari, Omwami, sikila sina Esie endekhe okhukhulondakho vulano? Narusia ovulamu vwanje sikila ewe. ³⁸ Yeso wamuchiva ari, Ewe walarusia ovulamu vuvwo sikila esie? Kang'ali, kang'ali nakhusungilanga ewe, Etwaya selakholiokha, ewe nosili okhunjikana khali khataru tawe.