¹ Mukheyendekhela mumioyo kienyu tawe: musuvile mu Nyasaye, khandi musuvile mwisie. ² Munju mwa Papa wanje khumo novukono ovunyingi: nikakhale vari sikali kario tawe, nakhavasungile. Nachichanga okhuvalombela enywe ovukono. ³ Ne nava wokhucha ne emulombile enywe ovukono, Emba nakalukha khandi, ne samwene emwakanile; kho Wesie emba nendi, mwesi khandi muve eweneyo. ⁴ Ne wanachichanga enywe mumanyile, ne eyinjila muyimanyile. ⁵ Tomasi wamusungila ari, Omwami, sekhumanyile wolachichanga tawe, ne eyinjila khwalakimanya khuriena? ⁶ Yeso wamusungila ari, Esie nisie eyinjila, ovung'ali, nende ovulamu: avulawo omundu walecha khu Papa, nakhavirile khwisie tawe. ⁷ Niwakhamanyile esie, wakhamanyile Papa wanje yesi: ne okhuchakila vulano okhuchililila wakhamumanya, ne wumulolile. ⁸ Filipo wamusungila ari, Omwami, khwekesie Papa, ne efwe khunyalikhe. ⁹ Ne Yeso wamusungil ari, Filipo, esikha esirambi siembele ninanywe sino, ne enywe mukhamanya esie tawe? wulia wandolela esie walola Papa; ne kakhava kariena vulano wolasunganga ori, Khwekesie Papa? ¹⁰ Ewe solasuvilanga ori Esie nivele mu Papa, ne Papa wuvele mwisie tawe? amakhuwa kanakhusungilanga sinakasunganga khwisie samwene tawe, nikakhali Papa wamenya mwisie, niye wukholanga emilimo. ¹¹ Suvile ori Esie nivele mu Papa, ne khandi ori Papa wuvele mwisie: nohomba tawe suvile khu sikila emilimo kiemba ninakholanga. ¹² Kang'ali, kang'ali, namusungilanga enywe, Wulia walaasuvila esie, emilimo kilia kianakholanga yesi ava alakikhola; ne kialava emikali kivirakho kino; sikila nachichanga khu Papa wanje. ¹³ Ne lilia liosi lia mwalasava mu lira lianje, eliene lilia emba nalikhola, kho Papa achinulwe khu vukhumi mu mwana. ¹⁴ Nikava mwalasava esindu siosi mulira lianje, Esie emba nalikhola. ¹⁵ Mwava nimwanyanja esie, mutile amalaka kanje. ¹⁶ Ne Esie emba nasala Papa, ne ava alamuwelesia Omuyeti wundi, kho ave wumenya halala ninanywe mindali; ¹⁷ Nali niye Roo wo Ovung'ali; wesivala sikhanyala okhunyola tawe, sikila sesimulolanga tawe, nohomba sesimumanyile tawe: nikakhali enywe mwamumanya; sikila wamenya ninanywe, ne alava mwinywe. ¹⁸ Sinamulekha vulali omuyeti tawe: Esie necha khwinywe. ¹⁹ Khu sikha sili sititi, ne esivala sesiva sialandola esie khandi tawe; nikakhali enywe mwalandola esie: sikila nivele mumwoyo, enywe mwesi mwalava mumwoyo. ²⁰ Eyindalo yene yilia mulimanya muri Esie nivele mu Papa wanje, ne enywe muvele mwisie, ne Esie nivele mwinywe. ²¹ Wulia walava na amalaka kanje, ne akatile, alava niye wanyanja esie: ne wulia wanyanja esie alayanjwa nende Papa wanje ne Esiie emba namuyanja, ne emba namulolekhanila niye. ²² Ne Yuda wamusungila ari, ne sali Isikarioti tawe, Omwami, kalava kariena ewe okhulolekhanile vusa efwe , ne olekhe okhulolekhana khu sivala? ²³ Yeso wamuchiva wamusungila ari, Nikava omundu alanyanja esie, alatila amakhuwa kanje: ne Papa wanje ava alamuyanja, ne khuva khwalecha khu niye, ne khulombe esikhalo siefu ninaye. ²⁴ Wulia wakhanyanja esie tawe satilanga amakhuwa kanje tawe: ne elikhuwa lia mwalawulilanga lino selili elianje tawe, nikakhali ni lia Papa wanduma esie. ²⁵ Akene kano Esie nimulakayile, nesili halala ninanywe. ²⁶ Nikakhali Omuyeti,nali Roo Omuchenukhu, wa Papa alaruma mulira lianje, kene amwekesie ofundu fwosi, ne amunyalile okhwichulila ofundu fwosi, fulia fwe esie namusungila. ²⁷ Omulembe nikwo kwe Esie namulekhelanga, omulembe kwanje nikwo kwa namuwelesianga enywe: ne Esie, sinamuwelesianga anga esivala sielesianga tawe. Mukhanyakhana mumioyo kienyu tawe, nohomba emioyo kienyu kikharia tawe. ²⁸ Mwakhawulila khuli anga Esie nakhamusungila, Esie narekhukha enjee, ne kene engalukhe khandi khwinywe. muva anga mwanyanja, mwakhasangalile, sikila Esie esungile endi, Esie nacha wa Papa: sikila Papa wanje nomukhongo okhumbira Esie. ²⁹ Ne enyowile okhuvasungila enywe nikakhekholekha tawe, kho vari, wakene keche okhwikholekha, muve vasuvila. ³⁰ Okhuchakila hano sinela okhulayakho amakhuwa amanyingi ninanywe khandi tawe: sikila omuruki we esivala sino alechanga, ne sali novunyali vwosi khwisie tawe. ³¹ Nikakhali khe esivala simanye vari Esie nayanja Papa; nende anga Papa yambelesia elilaka, niwo anga Esie nakhola. Sinjila, lekha khurekukhe evweni