¹ Nisie omusabibu kwa ng'ali, ne Papa wanje niye omulimi. ² Vuli olusakia luli mwisie lukhamanga amatunde tawe alurusiangawo: ne vuli olusakia lwamanga amatunde, alusonjolanga kho lwame amatunde amanyingi. ³ Enywe vulano muvele avalafu okhuvirila mwikhuwa lia namulakayila. ⁴ Menye mwisie, ne Esie emenye mwinywe. Anga olusakia lukhanyala okhwama amatunde khulwayo tawe, okhurusiakho luve mu musabibu; niwo anga mwesi mukhanyala tawe, nomukhamenya mwisie. ⁵ Esie nisie omusabibu, enywe muvele echisakia: Wulia walamenya mwisie, ne Esie emenye muniye, mulala mwene wuno niye walama amatunde amanyingi: sikila vulali esie semunyalakho liosi tawe. ⁶ Omundu nakhamenya mwisie tawe, asukunwanga khuli olusakia, ne luniala; niwo wavandu vachirenyanga, ne vacha vachira mumulilo, ne nacho chiiya. ⁷ Nikakhali enywe nomumenya mwisie, ne amakhuwa kanje kamenye mwinywe, munyala mwareva lilia liosi lia mwalenya, ne muva mwalakholelwa. ⁸ Ano niwo wa Papa wanje achingulilwanga muvukhumi, vari mwame amatunde amanyingi; kho mumanyikhe vari muvele aveki vanje. ⁹ Anga Papa yanyanja esie, niwo anga siesi namuyanja enywe: muchililile okhuva muvuyanji vwanje. ¹⁰ Nomulinda amalaka kanje, mwalamenya muvuyanji vwanje; anga siesi natila amalaka ka Papa wanje, ne namenya muvuyanji vuvwe. ¹¹ Ofundu funo nimulakayile enywe, kho ovusangafu vwanje vuve vusikala mwinywe, ne khandi ovusangafu vwenyu vutukhe okhwichula. ¹² Elino nilio elilaka lianje, Muyanjane mwavene khu vuli siamulala, anga Esie namuyanja enywe. ¹³ Avulawo omundu yesi wuli novuyanji vuli ovukali vuvira vuno, vwo omundu anyala okhurusia ovulamu vuvwe sikila avasale vave tawe. ¹⁴ Enywe mwalava avasale vanje , nikava mwalakhola kalia kosi ke Esie namulaka enywe. ¹⁵ Okhuchaka vulano okhuchililila sinela khandi okhuvalanga endi avakhalavani tawe; sikila omukhalavani samanyanga lio omwami wuwe ava nalakholanga tawe: nikakhali nakhamulanga endi avasale; sikila vuli esindu siembulile khu Papa wanje nimuvulile enywe. ¹⁶ Somuli enywe mwandovola esie tawe, nikakhali Esie nisie wamurovola enywe, ne namura aluveka, kho murule muche ne mwame amatunde, ne khandi amatunde kenyu kave kamenya: kho lilia liosi liomuva nomusava Papa mu lira lianje, ave wuvawelesia. ¹⁷ Ofundu funo narusianga elilaka khwinywe, endi muve vokhuyanjana khu vuli sia mulala. ¹⁸ Esivala nesimuviyila enywe, mumanye muri sianyowa sia mbiyila esie nesikhamuviyila enywe tawe. ¹⁹ Nimwakhavele vesivala, esivala siakhavayanjile anga vasio: nikakhali sikila enywe somuli ve esivala tawe, ne sikila namurovola okhurula musivala, khu kario esivala siamuviyila enywe. ²⁰ Yichulila elikhuwa lie emusungila enywe, endi Omukhalavani savechanga omukhongo okhuvira omwami wuwe tawe. Nikava esie vayakhupia esivi, ata enywe mwesi valamukhupia esivi; vava nivatila kanavasungila, khandi vava valatila akenyu kosi. ²¹ Nikakhali valamukholela ofundu funo fwosi khulwe elira lianje, sikila sivamanya wulia wanduma esie tawe. ²² Ninakhavele vari sinayecha ne navasungila, sivakhavele no ovwoni tawe: nikakhali vulano sivali neyinguvo yavalafunikhila ovwoni vwavo tawe. ²³ Wulia wambiyila esie niye khandi waviyila Papa wanje. ²⁴ Ninakhavele anga wakhakhola emilimo kio omundu yesi yakhakholakho, vakhavele vulali ovwoni: nikakhali vulano vosi valola ne vakhuviyila efwe fwesi esie nende Papa wanje. ²⁵ Nikakhali kano kayecha okhuvira, kho elikhuwa live litusiwa liandikwa mulilaka liavo vari, Vambiyila esie vulali okhuva nesifune siosi. ²⁶ Nikakhali wo Omuyeti alava niyakhecha, we Esie kene emurume khwinywe okhurula khu Papa, nali niye Roo wo ovung'ali, walarulila khu Papa, alandusiya esie ovuloli: ²⁷ Nenywe mwesi mwalarusia ovuloli, sikila mwakhava ninasie okhurula mukhuranga.