¹ Nimusungile enywe ofundu funo, kho mulekhe okhwisikirala. ² Valamukhuma okhurula muchisinakoki: nikario, esikha sialechanga, khu wulia wapara ari niyakhamwira enywe alava wukholile emilimo kia Nyasaye. ³ Ne ofundu funo nifwo fwavalamukholela enywe, sikilasivamanya Papa tawe, nohomba esie tawe. ⁴ Nikakhali nimusungile ofundu fwene funo, kho ofuse wakene fuve nifwakhola, nomwichulile muri khane namusungila. Ne ofundu funo sinali emusungile enywe mukhuranga tawe, sikila nali esili ninanywe. ⁵ Nikakhali vulano nivele khunjila nachichanga wa wulia wanduma esie; ne avulawo khwinywe walandeva ari, Walachchanga hena? ⁶ Nikakhali sikila nimusungile enywe ofundu funo, esivela siakhechula mumioyo kienyu. ⁷ Kakhava kario Esie namusungilanga ovung'ali; endi novulayi khwinywe vari Esie enje: sikila nekharulawo nacha tawe, Omuyeti sava alecha khwinywe tawe; nikakhali Esie ninakhacha, emba namuruma khwinywe. ⁸ Ne wakene ave niyakhecha, niyekesie avesivala ovwononi vwavo, nende muvulunjikhi, nende mukhukhalakilwa: ⁹ Koovwononi, sikila sivasuvilanga esie tawe; ¹⁰ Khu komuvulunjikhi, sikila nachichanga wa Papa ali, ne simwalela okhundolakho khandi tawe; ¹¹ Khu kokhukhalakilwa, sikila sikila omuruki wesivala sino wakhalakilwa khale. ¹² Esili nofundu ofunyingi fwesili okhumusungila enywe, nikakhali sikali komunyala khu lwa vulano tawe. ¹³ Kakhava nikali kario wa niye, wuli Roo wang'ali, alava niyakhecha, kene amwimilile enywe muvung'ali vwosi, sikila sinalakaye akali akake tawe, nikakhali kalia kosi kakene awulile, akene kalia niko kanalakaye: ne kene amwekesie ofundu fuva nifwalecha. ¹⁴ Niyanjingule esie muvukhumi: sikila kene avukulekhu kali akanje, ne naye amwekesie enywe. ¹⁵ Ofundu fwosi fwa Papa ali ninafwo nofwanje: niko kakilile nemusungila, endi navukule khu kali akanje, ne akekesie khwinywe. ¹⁶ Nesikha vusa sititi, ne somuva mwalandolakho tawe: ne khandi khusikha sindi sititi, ne muva mwalandola, sikila nachichanga wa Papa. ¹⁷ Ne valala khu veki vave varevana avene khu vene vari, Nikalena kano kalakhusungilanga ari, Nesikha vusa sititi, ne somuva mwalandola tawe: ne khandi ari, khusikha sititi, ne muva mwalandola: ne, Sikila nachichanga wa Papa? ¹⁸ Khu kario vasunga vari, Lino nililena lia alasunganga ari, Khu sikha sititi? Sokhumanyile lialasunganga tawe. ¹⁹ Kho Yeso yamanya kavekombanga okhumureva, ne naye wavasungila ari, Mwalarevananga mwavene khu kalia ke Esie esungile endi, Khu sikha sititi, ne somuva mwalandola tawe: ne khandi muri, khu sikha sititi, ne mwele mundole? ²⁰ Kang'ali, kang'ali namusungilanga enywe, mwalalila ne nomwiwunamila, nikakhali esivali sialayanja: ne enywe mwalavelela, nikakhali esivela sienyu sialakalukhasiwa sive ovusangafu. ²¹ Womukhasi avechanga nalalumwangwa avechanga nesivela, sikila eyisa yiye yivechanga yolile, nikakhali anga yevulanga omwana vusa ari, siyechulilanga khandi anga alumilwenge tawe, sikila avechanga novusangafu ari omundu wakhevulwa musivala. ²² Khu kario enywe khulwe eyisa yino muvele nesivela: nikakhali nemulole khandi, ne omwoyo kwenyu nokuve novuyanji, ne salivawo omundu wulirusiawo ovusangafu vwenyu tawe. ²³ Ne khulwe eyindalo yene yilia sivulawo esindu sienywe mulindeva tawe. Kang'ali, kang'ali, Esie namusungilanga enywe, Lilia liosi lia mwalasava Papa mulira lianje, ava alamuwelesia enywe. ²⁴ Okhwakholela avwene hano enywe musili okhusavakho esindu siosi mulira lianje tawe: sava, ne ne enywe muva mwalelesiwa, kho ovuyanji vwenyu vwichule. ²⁵ Ofundu fwene funo omulakayile enywe muchingano: nikakhali esikha sialechanga, wanakhela okhumulayila enywe khandi muchingano tawe, nikakhali Esie kene emwekesie enywe Papa avulafu ^{28 26} Khuyindalo yene yilia nomusavile mulira lianje: ne Esie sikene emusungile enywe, endi Esie emusavile enywe khu Papa tawe: ²⁷ Sikila Papa mwene wamuyanja enywe, kakila enywe nanywe mwayanyanja esie, ne mwasuvila muri Esie necha okhurula khu Papa. Esie necha okhurula khu Papa, ne nayecha khandi musivala, Esie narulakhanga musivala, ne nachichanga wa Papa. ²⁹ 29 Aveki vave vamusungila vari, Nakhalole, vulano wakhachaka okhukalakaya avulafu, ne salakalakayanga mulukano tawe. ³⁰ Vulano khwakhava nende vwatieli khuri ewe wamanya vuli esindu ne livulawo liosi lio omundu anyala wakhureva ewe tawe: khulino khusuvile khuri ewe wecha okhurula khu Nyasaye. ³¹ Yeso wavachiva ari, Vulano mwakhasuvila? ³² Lola, eyisa yalechanga, yenywe mwalasalanikha, vuli sia mulala alachila khu njila yiye omwene, ne mwalandekha Esie sieng'ene: ne kakhava kario Esie sendi sieng'ene tawe, sikila Papa wuvele ninasie. ³³ Ofundu funo nimulakayile enywe, kho misie muve nomulembe . Musivala mwalava neminyakhano: nikakhali muve avayindafu; Esie nakhaya esivala.