¹ Amakhuwa kano Yeso yakalakaya, ne walikamila echimoni chiche mwikulu, ne wasunga ari, Papa, eyisa yolile; chingula Omwana wuwo muvukhumi, kho Omwana wuwo naye yesi akhuchingule ewe muvukgumi: ² Khuli anga ewe wamuwelesia ovunyali khu valia vosi vali nomuvili, vari yelesie ovulamu vwa mindali khu vanyingi vawamwene wamuwelesia. ³ Ne vuno nivwo ovulamu vwa mindali, vari vosi vakhumanye ewe weng'ene wuli Nyasaye wa wang'ali,nende Yeso Kristo, wewe wamwene waruma. ⁴ Esie nakhuchingula muvukhumi musivala: Esie nimalile emilimo kiewe wambelesia ekhole. ⁵ Ne vulano, Ewe Papa, wamwene njingule halala ninawe muvukhumi vuvwo ovukhumi vwene vulia vwa nali ninavwo ninawe we esivala siali nesisili okhuvawo. ⁶ Nayekesia elira lilio khu vandu vewe wamwene wambelesia okhurula musivala: vali avavo, ne ewe wambelesia esie; ne navo vavukula elikhuwa lilio. ⁷ Vulano vamanyile vari ofundu fwosi fwewe wambelesia esie nofufwo. ⁸ Sikila Esie navawelesia amakhuwa keewe wamwene wambelesia; ne navo vakeyama, ne vamanya muvung'ali vari Esie necha okhurula khwiwe, khandi vasuvila vari niwe wanduma esie. ⁹ Esie navasalilanga: Esie sinasalilanga esivala tawe, nikakhali valia vewe wamwene wambelesia; sikila navavo. ¹⁰ Ne valia vosi vali avanje navavo, ne vali avavo navanje; ne Esie samwene nachingulwanga muvukhumi munivo. ¹¹ Ne vulano Esie sesili khandi musivala tawe, nikakhali vano vasimenyile musivala, ne Esie nechanga woli. Papa Omuchenukhu, valinde okhuvirila mulira lilio wamwene valia veewe wambelesia esie. ¹² Esie wanavele nesili ninavo musivala, Esie navalinda xmulira lilio: valia veewe wambelesia Esie navalinda, ne avulawo yesi wativa tawe, nikakhali omwana wovutivi; kho amandiko kave katusivwa. ¹³ Ne vulano Esie nechanga woli; ne akene kano nakalakayilanga musivala, kho ovusangafu vwanje vuve vutusivwa munivo. ¹⁴ Esie nivawelesie elikhuwa lilio; ne esivala nasio sivasilile, sikila sivali vemusivala tawe, anga Esie siesi ekhali womusivala tawe. ¹⁵ Esie sinasalanga endi ewe ovarusie musivala tawe, nikakhali endi ewe ovalinde okhurula khu omumayanu. ¹⁶ Sivali vomusivala tawe, anga Esie siesi ekhali womusivala tawe. ¹⁷ Vaawule okhuvirila muvung'ali vuvwo, elikhuwa lilio nilio ovung'ali. ¹⁸ Khuli anga ewe wanduma esie musivala, niwo anga kali Esie siesi nivarumile musivala. ¹⁹ Ne khulwavo Esie samwene neyawulanga, kho nivo vosi vave vawulwe okhuvirila muvung'ali. ²⁰ Sivali nivo vong'ene ve Esie nasalilanga tawe, nikakhali khu valia khandi valasuvila esie okhuvirila khu likhuwa liavo; ²¹ Kho voosi vave anga esindu silala; khuli anga ewe, Papa, oli mwisie, ne Esie mwiwe, kho vosi vave esindu silala mwifwe: kho esivale sisuvile sirii ewe niwe wanduma esie. ²² Ne ovukhumi vwewe wambelesia Esie navawelesia; kho vave esindu silala,khuli anga efwe khuli esindu silala: ²³ Esie embe munivo ne ewe ove mwisie, kho vatukhe okhuvela elala esindu silala; ne khandi khe esivala simanye sirii ewe niwe wanduma esie, ne wavayanja, khuli anga wanyanja esie. ²⁴ Papa, Esie nenyanga endi navo vosi, valia vewe wambelesia esie, vave halala ninasie we Esie emba nendi; kho vatukhe okhulola ovukhumi vwanje, vwewe wambelesia esie: sikila ewe wanyanja ovwalilo vwe esivala novukhachaka tawe. ²⁵ O Papa wuli omulunji, esivala sisiakhumanya ewe tawe: nikakhali Esie nakhumanya ewe, ne vano vamanya vari ewe niwe wanduma esie. ²⁶ Ne Esie nalandia elira lilio liamanyikhana khunivo, ne khandi nalilandia: endi ovuyanji vwe ewe wanyanja ninavwo vutukhe okhuva munivo, ne Esie embe munivo