¹ Anga Yeso yali niyakhalakaya amakhuwa kene kano, yarekukha wacha nende aveki vave injelekha womuchela kwa Kitironi, wakhwali nende ekatani, yayenjilamo nende aveki vave. ² Ne Yuda yesi, wulia wamuchama, yali wamanya avundu wene yawo: sikila Yeso muvunyingi yachichangawo nende aveki vave. ³ Niwo wa Yuda, wayali niyakhelesiwa esikosi sia avasikari nende avarumikhi vokhurula khu vasalisi avemilisi nende Avafarisayo, vecha avavwene yawo nivasitile echitaa nende echitochi nende ofumanulwa fwo ovulwani. ⁴ Khu kario Yeso, yamanya amakhuwa kosi kali nikalachichanga okhwikholekha khu niye, yesenda evweni, ne wavasungila ari, Mwalakhavanga wina? ⁵ Navo vamuchiva vari, Yeso wa Nazareti. Yeso wavasungila ari, Esie nisie. Ne Yuda yesi, wulia wamuchama, yali wusinjile ninavo. ⁶ Ne anga yamalavusa okhuvasungila ari, Esie nisie, vakalukha yinyuma, ne vakwa hasi. ⁷ Ne naye wela wavareva khandi, Mwalakhavanga wina? Ne wasunga vari, Yeso wa Nazareti. ⁸ Yeso wavachiva, Nimusungile endi Esie nisie: khu kario mwava nimwalakhavanga esie, lekhana nende vano vachee: ⁹ Kho liayalakaya live likholekhana, liayasunga ari, Khu valia vawambelesia sinatifiakho ata mulala tawe. ¹⁰ Niwo wa Simoni Petero wali nolupanga yaluchomola ne warema omukhalavani womusalisi omwimilisi, ne elirwi lwo omukhono omusacha liakwa. Elira lio omukhalavani mwenoyo liali vari Malikasi. ¹¹ Niwo wa Yeso yasungila Petero ari, Kalusia olupanga lulwo musivavi: esikombe sia Papa wanje yambele esie, Esie nalekha okhusinywelamo? ¹² Niwo we esikosi sia avasikari nende kavuteni nende avarumikhii va Avayawudi vatila Yeso, ne vamuvowa, ¹³ Ne vanyowa okhumuyila khu Anasi; sikila yali papa omukhwe wa Kayifa, wali omusalisi omwimilisi omuyika kwene kulia. ¹⁴ Yali Kayifa wuno, wali niyelesie Avayawudi eyinganakani, ari kenyekha omundu mulala afwile avandu. ¹⁵ Ne Simoni Petero walonda khu Yeso, ne niwo anga omweki wundi yesi yakhola: ne omweki wulia yali wamanyikhana khu vasalisi, ne niye wenjila nende Yeso mwichipi lio omusalisi omwimilisi. ¹⁶ Nikakhali Petero yasinjila elwanyi amuliango. Ne omweki wundi wulia warula elwanyi, wali niyamanyikhana khu musalisi omwimilisi, ne walakaya nende wulia wali nalindile amuliango, ne wenjisia Petero mukari. ¹⁷ Ne omukhana wali nalindile amuliango wasungila Petero ari, Ewe wesi soli mulala khu veki vo omusacha wuno? ¹⁸ Ne avakhalavani nende avarumikhi vali vasinjile avwene yawo, vali vafiye omulilo kwa amakaa; sikila khwali nomunyiri: ne vali waloranga: ne Petero yali wusinjile ninavo, na yesi yali aloranga. ¹⁹ Omusalisi omwimilisi niwo wayareva Yeso okhulondokhana nende aveki vave, nende amekesio kake. ²⁰ Yeso wamuchiva ari, Esie endakayenge kosi avulafu khu sivala; Esie nasomisienge vuli khase musinakoki, nende mwitempeli, wa Avayawudi vosi vakananilanga; ne sivulawo sia nalakaya muvwikisi tawe. ²¹ Sikila sina walandevanga esie, reva valia vayambulilenge, kalia kanavasungilenge: lola, vamanya kanasunganga. ²² Ne wayali niyakhalakaya ario, mulala khu avarumikhi wali nasinjile ahembi ninaye wamukhupa olukhofi, namusungila ari, Vachivanga vario omusalisi omwimilisi? ²³ Yeso wamuchiva ari, Nava nendakaye ovuvi, rusia ovuloli khu vuvi vwenovu: nikakhali nava nendakaye ka avwene, sikila sina ewe nowukhupa? ²⁴ Vulano Anasi yali wumuyilile navoyilwe khu Kayifa omusalisi omwimilisi. ²⁵ Ne Simoni Petero yali wusinjile aloranga omulilo. Khu kario vamusungila vari, Ewe wesi soli mulala khu veki vave? Wekana, ne wasunga ari, Esie sendi mulala khunivo tawe. ²⁶ Mulala khu avakhalavani vo omusalisi omwimilisi, omuleve wa wulia wa Petero yali naremile esirwi siakwa, wasunga ari, Esie eskhulolile mukatani nomuli ninaye halala? ²⁷ Petero wela wekana khandi: ne avwene na avwene etwaya yakholiokha. ²⁸ Ne varusia Yeso okhurula wa Kayifa vamuyila munju yokhuyalwa: ne yali mavwivwi; ne avene sivacha munju yokhuyalwa tawe, vari vakhefwavia tawe; nikakhali vave vatukhane okhulia epasaka. ²⁹ Niwo wa Pilato yarula wacha wavali, ne wasunga ari, Ni makhuwa sina ka mwalenyanga okhuyalilakho omundu wuno? ³⁰ Vamuchiva ne vamusungila vari, niyakhavele vari sali omukholi wa amavi tawe, sikhwakhamurelile khwiwe tawe. ³¹ Ne Pilato wavasungila ari, Enywe muvukule, ne mumuyale okhulondokhana nende elilaka lienyu. Khu kario Avayawudi vamusungila vari, Elilaka liakhukaya efwe okhwira omundu yesi: ³² Vasunga vario kho amakhuwa ka Yeso yasunga katukhe okhutusiwa, akene kayalakaya, okhwekesia ni lifwa sina lia alifwa. ³³ Pilato wakalukha munju yokhuyala khandi, ne walanga Yeso, ne wamusungila ari, Ewe wuvele Omwami wa Avayawudi? ³⁴ Yeso wamuchiva ari, Niwe wamwene walalakayanga akene kano, nohomba avandu vandi nivo vakhusungile akenako okhulondokhana nende esie? ³⁵ Pilato wamuchiva ari, Esie nivele Omuyawudi? Esialo sisio wamwene nende avasalisi avemilisi nivo vakhurelile ewe khwisie: ewe okholile sina? ³⁶ Yeso wamuchiva ari, Ovwami vwanje sovuli vwe esivala sino tawe: ovwami vwanje nivwakhavele vwe esivala sino, avakhalavani vanje vakherane, endekhe okhuhanwa khu Avayawudi: nikakhali ovwami vwanje sovuli hasi ano tawe. ³⁷ Khu kario Pilato wamusungila ari, Khu kario ewe wuvele omwami? Yeso wachiva ari, Niwe wakhasunga ori Esie nivele omwani. Khu kene kano niko kanevulilwa, ne sikila esifune siene sino nisio siakila necha musivala, endukhe okhurela ovuloli khu vung'ali.Vuli sia mulala wuli wovung'ali awulilanga omwoyo kwanje. ³⁸ Pilato wamusungila ari, Ovung'ali nisina? Ne anga yali niyakhalakaya elieneli ario, yela warula elwanyi khandi wacha khu Avayawudi, ne wavasungila ari, Sinalolanga elikoso liosi muniye tawe. ³⁹ Nikakhali enywe muvechanga nomwima, muri vuli epasaka kenyekha Esie emulekhulile omuvoywa mulala: khu kario mwalenyanga Esie emulekhulile Omwami wa Avayawudi? ⁴⁰ Vosi vela vawochelela khandi, nivasunga vari, Omundu wuno tawe, nikakhali Baraba. Baraba wuno yali omunuli.