¹ Khu kario Pilato wavukula Yeso, ne wamukhupa ofuvoko. ² Ne avasikari vang'ona eyingara ya amawa, ne vakira khu murwe kukwe, ne vamufwala ekanjo yovukondo vwe eyisambarawu. ³ Ne vasunga vari, Oyindile, Omwami wa Avayawudi! ne wamukhupa nemikhono kiavo ⁴ Khu kario Pilato wela wecha evweni khandi, ne wavasungila ari, Lole, namurelanga evweni wenyu, mutukhe okhumanya muri esie sendolilekho elivi liosi muniye tawe. ⁵ Ne Yeso wecha evweni, nafwalilwe ekutwa yamawa, nende ekanjo yovukondo vwe esambarawu. Ne Pilato wavasungila ari, Lola omundu wuno! ⁶ Khu kario anga avasalisi avemilisi nende avarumikhi vamulola, vawochelela vululu vwene, nivasunga vari, Muvambe, muvambe, Pilato wavasungila ari, Enywe muvukule, ne muche mumuvambe: sikila esie sinilolilekho elivi liosi muniye tawe. ⁷ Avayawudi vamuchiva vari, Efwe khuvele nende elilaka, ne okhulondokhana nelilaka kenyekhana afwe, wekholile omwene okhuva Omwana wa Nyasaye. ⁸ Khu kario anga Pilato yawulila amakhuwa kenako, yatasa okhurenga; ⁹ Ne wela khandi wakalukha munju yokhuyala, ne wasungila Yeso ari, Ewe orulanga hena? Nikakhali Yeso siyamuchiva tawe ¹⁰ Kho Pilato wamusungila ari, Ewe solenyanga okhulakaya ninasie tawe? somanyile ori nivele novunyali vwo okhukhuvamba nende ovunyali vwo okhukhulekhula ewe tawe? ¹¹ Yeso wamuchiva ari, Ewe siwakhavele novunyali vosi khwisie tawe, okhurusiakho nowelesiwe okhurula yikulu: khu kario wulia wunderile mumikhono kikio wuvule noovwoni ovukali vuvirakho. ¹² Ne okhuchakila avwene yawo Pilato yakhava anga anyala wamulekhula: nikakhali Avayawudi vawochelela vululu, nivasunga vari, Nikava walalekhula omundu wuno achee,ewe sova omusale wa Kaisari tawe: wulia yesi walekhola okhuva omwami ava alalakayanga esinyuma nende Kaisari. ¹³ Khu kario anga Pilato yawulila okhulakaya khulia, yarera Yeso elwanyi, ne wekhala khu sifumbi sio okhukhalaka avundu wavalanganga vari Ovwelu vwa amakina, nikakhali Mulwebrania, Kabbatha. ¹⁴ Ne yali eyindalo yokhwirechekhela epasaka, ne chali ahembi echisa musafu: ne wasungila Avayawudi ari, Lola Omwami wenyu! ¹⁵ Nikakhali vawochelela yikulu, Mumalewo, mumalewo, muvambe. Pilato wavasungila ari, Mwalenyanga esie emuvambe Omwami wenyu? Avasalisi avemilisi wamuchiva vari, Efwe sokhuli nende omwami nakhali Kaisari tawe. ¹⁶ Khu kario wamura mumikhono kiavo vache vamuvambe. Ne navo vavukula Yeso, ne vacha ninaye. ¹⁷ Ne warula elwanyi nasitile omusalaba kukwe wacha avundu wa valanganga vari avundu we siang'ang'a siomurwe, Mulueburania valanganga vari Kolikotsa: ¹⁸ Niwo wavamuvambila, nende avandu vandi vavili, mulala oluveka olu ne owundi oluveka lundi, ne Yeso wava akari kari. ¹⁹ Ne Pilato wandika esimanyikhilo, ne wasira khumusalaba. Ne amandiko kali vari YESO WA NAZARETI OMWAMI WA AVAYAWUDI. ²⁰ Esimanyikhilo sino siasomwa nende Avayawudi avanyingi: sikila avundu wa vavambila Yeso ali ahembi nende elitokho: ne amandiko kaandikwa Muleburania, nende Mulukiriki, nende Mululatini. ²¹ Niwo wavasalisi avemilisi va Avayawudi vasungila Pilato vari, Okhandika ori, Omwami wa Avayawudi tawe; nikakhali ori yasunga ari, Esie nisie Omwami wa Avayawudi. ²² Pilato wavachiva ari, Kalia ke Esie nandike niko kanandike. ²³ Niwo wavasikari, vali nivakhavamba Yeso, vavukula echinguvo chiche, ne vakavulamo khali khane, vuli omusikari wavukula silala; ne khandi ekanjo yiye: ne ekanjo siyali niyambasiwa tawe, yali yanavwa vusa nomukhono okhurula yikulu okhwola hasi. ²⁴ Khu kario avene vasungana akari wavo vari, Khukhakirandula tawe, nikakhali lekha khukiupile ekura, khulole wayalakwila:kho amandiko katukhe okhutusiwa, kasunga kari, Vakavanamo echinguvo chanje akari wavo, ne khu kanjo yanje vopelakho echikura. Ofundu funo nifwo fwa avasikari vakhola. ²⁵ Vulano vali nivasinjile ahembi nomusalaba kwa Yeso yali mayi wuwe, nende wandaye mayi wuwe omukoko, Maria omukhasi wa Kilefasi, nende Maria Makatalena. ²⁶ Khu kario anga Yeso yalola mayi wuwe, nende omweki nasinjilewo, wulia wayayanja, yasungila mayi wuwe ari, Omukoosi, lola omwana wuwo. ²⁷ Niwo wayasungila omweki wulia ari, Lola mayi wuwo! Ne okhuchakila eyisa yene yilia omweki wulia wamuvukula wachaka okhumenya ninaye mungo mumwe. ²⁸ Yinyuma wa kano, Yeso wayamanya ari vulano vuli esindu simalile okhikholekha, kho amandiko katusiwe, yasunga ari, Esie ninovulesio. ²⁹ Vulano avwene yawo khwaliwo nende eyisiongo yali neyichulemo edivai eyindulu: ne venikha esiango mudivai, ne vara khuluseti, ne vasita vayila emunwa wuwe. ³⁰ Khu kario anga Yeso yanywa edivai yilia, yasunga ari, Kawele: ne wenamia omurwe, ne wakwisia. ³¹ Khu kario Avayawudi, sikila yali eyindalo yokhwirechekha, emivili sikiayenyekhana kisikale khu musalaba eyindalo yesabato tawe, (sikila eyindalo ye sabato yalingi eyingali,) vasaya Pilato vari ofulenge fwavo furiolwe, ne varusiewo emivili kiavo. ³² Niwo wa avasikari vecha, ne variola ofulenge fwa wali wokhuranga, nende fwo owundi wali navambilwe ninaye. ³³ Nikakhali anga vola khu Yeso, ne valola vari yali wufwile khale, sivariola ofulenge fufwe tawe: ³⁴ Nikakhali mulala khu vasikari wali nelifumo yawuna mumbafu mumwe, ne avwene na avwene amavanga nende amachi kachichukha. ³⁵ Ne wulia wakalola warusia ovuloli, ne ovuloli vuvwe nivwang'ali: ne wamanya ari yasunga kang'ali, kho mutukhe okhusuvila. ³⁶ Sikila ofundu funo fwekholekha, kho amaandiko katukhe okhutusiwa vari, Sivulawo esikumba sisie ata silala silifunikha tawe. ³⁷ Ne khandi eliandiko lindi liasunga liri, valicha okhulengela khu wulia wavawuna. ³⁸ Ne yinyuma wa kano Yosefu wa Arimateya, wali omweki wa Yeso, nikakhali yecha khu Pilato muvwikisi sikila yaria Avayawudi, wasaya ache avukule omuvili kwa Yeso: ne Pilato wamwiyamila.Khu kario yecha, ne wavukula omuvili kwa Yeso. ³⁹ Ne Nikodemo yesi yecha avwene yawo, wulia wecha mukhuranga khu Yeso musilo, ne yarela nasasiye manemane nende wubani, chali novusiro ahembi echiratili eyimia ndala. ⁴⁰ Niwo wavavukula omuvili kwa Yeso, ne vakuvowa muchinguvo cha kitani varamo nende amarashi kokhuwunya ovulayi, anga kwali omwima kwa Avayawudi nivayavila. ⁴¹ Vulano avundu wayavambilwa khwaliwo nende omukunda; ne mumukunda kwene kulia khwalimo nesilindwa, sio omundu yesi yali nasili okhuyavilwamo tawe. ⁴² Khu kario vaalisiamo Yeso sikila yali eyindalo yookhwirechekha ya Avayawudi; kho nisio siali esilindwa siali ahembi yawo.