¹ Eyindalo yokhuranga yelichuma Maria Makadalena yecha mavwivwi, esilima nesisili, khu silindwa, ne walola varusiyewo elikina okhurula khusilindwa . ² Niwo wayatumaka echimbilo, ne wecha khu Simoni Petero, nende khu mweki wundi, wa Yeso yali niyayanja, ne wavasungila ari, Varusiye Omwami musilindwa, ne sokhumanyile wavamurele tawe. ³ Khu kario Petero warula wacha nende omweki wundi, ne vola khusilindwa. ⁴ Kho vatumaka vosi halala: ne omweki wundi wulia watumaka wavira Petero, ne wanyowa wola khusilindwa. ⁵ Ne wayali niyename nalalengelelanga mukari, yalola echinguvo chekitani nechili hasi; kho siyayenjila mukari tawe. ⁶ Niwo wa Simoni Petero yecha namulondile yinyuma, ne wacha wenjila musilindwa, ne walola echinguvo chekitani nechili hasi chong'ene. ⁷ Ne esitambaya, sia vali nivamuvoyile khu murwe, sisiali hasi nende echinguvo chekitani tawe, nikakhali siali sikanyilwe siong'ene avundu. ⁸ Niwo womweki wundi wulia yesi yenjila mukari, wali nanyowile okhwola khu silindwa, ne walola, khandi wasuvila. ⁹ Sikila okhwola esikha siene silia vali vakhamanya eliandiko, varikenyekhana asisimukhe khandiokhurula muvafwa. ¹⁰ Niwo wa aveki vela khandi vakalukha muchingo chavo. ¹¹ Nikakhali Maria yali wusinjile elwanyi we esilindwa alalilanga: ne anga yali nalalilanga ario, yenama hasi ne walengelila musilindwa, ¹² Ne walola echingelosi chivili muchinguvo echiwanga nevekhale, mulala emurwe, ne owundi efulenge, wavali nivalisie omuvili kwa Yeso. ¹³ Ne vamusungila vari, Mukhasiwe, walalilanga sina? Naye wavasungila ari, Sikila vavukule vachile no OMWAMI wanje, ne esie semanyile wavamurere tawe. ¹⁴ Ne wayali niyakhalakaya ario, ne omwene wesevukha yinyuma, ne walola Yeso nasinjile, ne siyamanya ari yali Yeso tawe. ¹⁵ Yeso wamusungila ari, Mukhasiwe, sina siolalilanga, niwina wolakhavanga? Naye, wamulola khuli omulimi, wamusungila ari, Omwami, wava ewe wumuvukule okhurula hano, sungile wova nomureere, ne Esie emba nacha emuvukule. ¹⁶ Yeso wamusungila ari, Maria. Ne wamwisevukha, ne wamusungila ari, Rabboni; nikhwo okhusunga vari, Omwekisi. ¹⁷ Yeso wamusungila ari, Okhandilakho tawe; sikila Esie esili okhucha yikulu wa Papa wanje tawe: nikakhali ewe chaa khu vawandaye vanje, ne ovasungile ori, Esie nichile yikulu wa Papa wanje, khandi Papa wenyu; nende khu Nyasaye wanje, khandi Nyasaye wenyu. ¹⁸ Maria Makadalena yecha ne wasungila aveki ari yali wulolile OMWAMI, ne anga yali namusungile amakhuwa kene kalia. ¹⁹ Eyingolove ye eyindalo yene yilia, anga yali eyindalo yokhuranga okhuchaka elichuma, we emiliango kiali nekikalwewa aveki vali nivasololane sikila vali varile Avayawudi, Yeso yecha ne wasinjila akarikari, ne wavasungila ari, Omulembe kuve halala ninanywe. ²⁰ Ne wayali niyakhasunga ario, yavekesia emikhono kikie nende mumbafu mumwe. Niwo wa aveki vave vasangala, wavalola OMWAMI. ²¹ Niwo wa Yeso yavasungila khandi ari, Omulembe kuve halala ninanywe: khuli anga Papa wanje yanduma esie, niwo anga Esie siesi namurumanga enywe. ²² Ne anga yali niyakhasunga ario, yavafurakho omuya, ne wavasungila ari, Nyole Roo Omuchenukhu: ²³ Valia voosi veenywe mwalavela ovwoni, vava valavelwa; ne valia voosi veenywe mukhalavela tawe, ovwoni vwavo vuva vwalasikala. ²⁴ Nikakhali Tomasi, mulala khu veki elikhumi na vavili, wavalanganga vari Ditimu, siyali navasietawe wa Yeso yecha. ²⁵ Khu kario aveki vasie vamusungila vari, Khwakhalola OMWAMI. Nikakhali naye wavasungila ari, okhurusiakho Esie endole echimpala che emisumari mumikhono kikie ne endile nesitere sianje muchimpala che emisumari chenecho, ne navasie nomukhono kwanje mumbafu mumwe, Esie senyala okhusuvila tawe. ²⁶ Ne yinyuma wechindalo munane khandi aveki vave vali mukari, ne Tomasi wava halala ninavo: niwo wa Yeso yecha, emilango nikikale, ne wasinjila akarikari, ne wasunga ari, Omulembe kuve halala ninanywe. ²⁷ Niwo wayasungila Tomasi ari, Yicha otile hano nesitere sisio, ne olole emikhono kianje; ne onyile omukhono kukwo, ne wavasie mumpafu mwanje: ne okhatakha elisuvila tawe, nikakhali osuvilenge ²⁸ Ne Tomasi wachiva wamusunga ari, OMWAMI wanje nende Nyasaye wanje. ²⁹ Yeso wamusungila ari, Tomasi, sikila ewe wakhandola, ewe wakhasuvila: vavele novukasu valia valava nivasili okhulola, ne vasuvile. ³⁰ Ne muvung'ali Yeso wakhola amayiya kandi amakali evweni waveki vave, kakhaandikwa musitavu sino tawe: ³¹ Nikakhali kano kaandikwa, kho mutukhe okhusuvila muri Yeso niye Kristo, Omwana wa Nyasaye; ne vari mukhusuvila mutukhe okhuva novulamu okhuvirila mulira lilie.