¹ Olunyuma lwa amakhuwa kano Yeso yelolesia khandi khu veki vave ayinyanja ya Tiberia; ne yelolesia munjila yene yino. ² Vali halala vosi Simoni Petero, nende Tomasi wavalanganga vari Ditimu, nende Natsanieli wa Kana ya Galilaya, nende avana va Zebetayo, nende aveki vandi vavili. ³ Simoni Petero yavasungila ari, Esie nachichanga okhulova. Navo vamusungila vari, Efwe fwesi khwalacha ninawe. Varula vacha, ne venjila muliaro vwangu; ne esilo siene silia sivanyolakho esindu siosi tawe. ⁴ Nikakhali anga vwasia mavwivwi, Yeso yasinjila khuluchinga: nikakhali aveki sivamanya vari ni Yeso niye tawe. ⁵ Niwo wa Yeso yavasungila ari, vaanenywe, mukho nende esiakhulia siosi? Vamuchiva vari, Tawe. ⁶ Ne wavasungila ari, Mwate olurimba lwenyu oluveka lwo omukhono omusacha kwe eliaro, ne mwalanyola. Khu kario vamwata, ne vulano vakhaywa okhulukhwesa sikila ovunyingi vwe eching'eni. ⁷ Khu kario omweki wulia wa Yeso yayanja wasungila Petero ari, No Omwami niye. Vulano wa Simoni Petero yawulila vari no Omwami niye, yefwala eyinguvo yiye yovulovi, (sikila yali esiekenye,) ne waruka munyanja. ⁸ Ne aveki vandi vechela muliaro elititi; (sikila sivali hale nende olukuku tawe, nikakhali chali ahembi echimita eyimia ndala,) nivalakhwesanga olurimba lwali neching'eni. ⁹ Khuli anga vola vusa khulukuku vari, valola mulilo kwa amanda avwene yawo, ne nivalisiekho eying'eni, nende omukati. ¹⁰ Yeso wavasungila ari, Rerekho vulano eching'eni chindala khu chamwakhatila. ¹¹ Simoni Petero warula wacha, ne wakhwesa khulukuku olurimba lwali nolwichule eching'eni echingali, eyimia ndala na amakhumi karano nende chitaru: ne chikhava nichali echinyingi chene, olurimba silwakitukhakho tawe. ¹² Yeso wavasungila ari, Yicha ne mulie. Ne avulawo ata mulala khu veki valia wakelicha okhumureva ari, Ne ewe niwina? vamanya vari no Omwami niye. ¹³ Yeso niwo wayecha, ne wavukula omukati, ne wavawelesia, khandi wakhola ario khuying'eni. ¹⁴ Oluno lwava lukhola khatari Yeso mwene okhulolekha khuveki vave, okhurula anga yali nalamukhe okhurula mulifwa. ¹⁵ Kho anga vali nivakhalia, Yeso yasungila Simoni Petero ari, Simoni, omwana waYona, wayanyanja okhuvira funo? Naye wamusungila ari, Eeh, Omwami; ewe wamanya ori Esie nakhuyanja ewe. Naye wamusungila ari, Lisia ofumeme fwanje. ¹⁶ Wela wamusungila khandi lukhola khavili ari, Simoni, omwana wa Yona, ewe wayanyanja esie? Wamusungila ari, Eeh, Omwami; ewe wamanya ori Esie nakhuyanja ewe, Lisia amachese kanje. ¹⁷ Wela wamusungila lukhola khataru ari, Simoni, omwana wa Yona, ewe wayanyanja esie? Petero wavelela sikila yamureva lukhola khataru ari, Ewe wayanyanja esie? Ne naye wamusungila ari, Omwami, ewe wamanya ofundu fwosi; ewe wamanya ori Esie nakhuyanja ewe. Yesowamusungila ari, Lisia amachese kanje. ¹⁸ Kang'ali, kang'ali, nakhusungilanga ewe, Wowali nosili omuraka, ewe wamwene wayefwalilenge, ne ocha okenda wolenyanga: nikakhali ewe niwakhasakhula, ewe walanyila emikhono kikio, ne owundi akhufwale ewe, ne akhumeme akhuyile we ewe okhalenyanga ochee tawe. ¹⁹ Yalakaya eliene lino, okhwekesia elifwa lia Petero alifwa okhwelesia Nyasaye ovukhumi. Ne wayali niyakhalakaya lino, yamusungila ari, Nonde esie. ²⁰ Niwo wa Petero, yesevukha yinyuma, walola omweki wa Yeso yayanja nalavalondanga; niye mulala wachena wulia khandi wayekha khusilufu sisie wavali nivalalichanga esiakhulia sia angolove, ne wasunga ari, niwina omwene walakhuchama? ²¹ Petero anga yamulola ario yasungila Yeso ari, Omwami, ne omundu wuno naye alakhola sina? ²² Yeso wamusungila ari, Esie ninenya endi asikale okhwola anga endikalukha, lieneli nisina khwiwe? ewe nonde. ²³ Niwo anga elikhuwa lieneli liasalanila muvayanje, vari omweki wulia salifwa tawe: mani Yeso siyamusingilakho ari, Wulia salifwa tawe; nikakhali ari, Esie ninenya endi asikale okhwola anga endikalukha, lieneli nisina khwiwe? ²⁴ Omweki mwene wuno niye walarusianga ovuloli vwofundu fwene funo, ne niye waandika ofundu funo: ne efwe khwamanya khuri ovuloli vuvwe nivwang'ali. ²⁵ Ne khuvelewo khandi nofundu fundi ofunyingi fwa Yeso yakhola, nifwakhavele vari, fwakhaandikwe vuli sia silala, enjililisia endi esivala sisiakhavele nende avundu wokhuvikha ofutavu fwene fulia tawe.