¹ Mube batang'u mureyekesia imberi yabandu mbu babalole ngamuri balafu, nimuhola murio simunanyola sianwa hurula hulareng'u orimuikulu. ² Huako norusia ebianwa oreepaka koringa (hypocrites) baholanga mu chisinagogi nende muchindara hubalolohe nabandu. Adieri mbabolera abo bamala onyola esianwa siabu mubuichufu. ³ Niwana esianwa, orakanya omuhono kwao mukada kumanye esiomuhono mulungi kuhola. ⁴ Yana ebianwa biao mubwekisi. Ne Lareng'u ololanga mubwekisi anababa ebianwa. ⁵ Esiha siamulama, muraba nga abapinga Nyasaye bahera hwema nibalama mu chisinagogi nende hundulo yechindara hubandu babalole. Adieri mbabolera bamala onyola esianwa. ⁶ Ne ewe nolama ingira musigoro ikalao lwiki mani olame Larao ori mubwekisi. Ne larao ololanga mubwekisi anahuba esianwa. ⁷ Nimulama muralondamo chimbosi chiuma mahulundu kori nga abakafiri baholanga. Bapara mbu bandu banabaurira hulwobola chimbosi chinyingi. ⁸ Murafanana nabo hubera Lareng'u amanyire bindu biamwenya atanimurasaba. ⁹ Mani mulamenge muri: Baba ori muikulu, rira riao ribebwe siribwa. ¹⁰ Obwami bwao bwiche. Biehole musialo kori ngabiehola muikulu. ¹¹ Ruberesie ebiahuria biefu biarero. ¹² Orurehere amabi kefu kori ngahwosi hureheranga abarukosera. ¹³ Oraruyira mumatemo, ne orurusie mu mabi. Hubera obwami namani nende luyari nebiao chindalo chiosi. Amina. ¹⁴ Norehera abandu amakosa kabwe, Nyasaye womuikulu yosi anahurehera. ¹⁵ Norarehera bandu amakosa kabwe, larao yosi sanahurehera amakosa kao. ¹⁶ Nimuboya huria muralama kori nga bapinga Kristo (hypocrites), bahada bweni bwabu hubandu balole mbu baboyire. Adieri mbabolera bamala onyola esianwa siabu mubwichufu. ¹⁷ Nang'u nimuboya, mubahe mafura hu mirwe kieng'u mani mwosie obweni. Muraloloha mumoni chiabandu nga ababoyire. Lareng'u ololanga mubwekisi anababa ebianwa. ¹⁹ Murebihira miandu musialo muno, amasiriri nende lukuhu binyala obiyia handi abebi banyala huiba. ²⁰ Mubihe emiandu kieng'we muikulu auma masiriri nolukuhu, ne atabebi sibanyala ofunaka mani bengiramo beba. ²¹ Hubera abundu emiandu kiao kiri niomwoyo kunaba. ²² Imoni neitaya yomubiri. Niesikera imoni yao niri inamu nomubiri kwosi kuba nobulafu. ²³ Ne imoni niri imbi nomubiri kwosi kuba nesirima. Haro obulafu buri muewe nibuba sirima, esirimesio nesihongo siaka sirie! ²⁴ Aumao mundu onyala oholera abaruki babiri ohubera naswila mulala nahera undi, arali mbu anebana hu mulala nareka undi. Sonyala oholera Nyasaye nende emiandu. ²⁵ Mbabolera endi oreparira huluobulamu bwao, esionaria, esionang'wa katasa sionafwala humubiri kwao. Haro obulamu sibuhira biahuria, ne omubiri sikuhira chingubo? ²⁶ Ringala mayoni mumiyaka, sikaraka, sikakesa handi sikabusia kara musiaki, nelarefu womuikulu akarisiangia. Ewe sori mulayi okahira? ²⁷ Wina hweng'we muhwerarihira onyala omeda (cubit) ndala hubulamu bwaye? ²⁸ Husina niwesandia hubiohwefwala? Paraho amaua komusipapi ngolwa kahulanga. Sikahola mirimo nesikasona chingubo. ²⁹ Ne mbabolera endi kata Solomoni noluyari lwaye lwosi siyefwalaho Kori nga amaua kano. ³⁰ Nyasaye nanyala ofwala bunyasi buri musipapi, oburiwo rero nemuchuli bufubwa mumaika, eng'we bandu sanyala obafwala ohiraho, muribandu berisubira rididi? ³¹ Mani mureparira nimubola,'Hunariasi ama hunang'wasi kose hunafwalasi? ³² Abakafiri bakonyanga bindu bino, Ne lareng'u womuikulu amanyire ari bino nie bindu bia muhoya mwaba nabio. ³³ Ne mukonye mberi obwami nobulafu bwaye, nebino biosi munaberesebwa. ³⁴ Mureparira hubindu biomuchuli, ebiomuchuri bineparira biong'one.