¹ Abafarisayo nende Abasadukayo beecha bamutema nibanusaba mbwe abekesieho omufano hurula muikulu. ² Naye yabakalusia nabola ari "Nibiri ingolobe muboolanga mbu rikulu rinabaho rilayi adidi huba neriranjayi. ³ Nibiri ichuri, mubolanga mbu sidere sinaba sibi huba rikulu neriahanyu handi ribuoga. Mwamanya opima nga rikulu rinafwanana ne simunyala opima ifwani yebiha. ⁴ Olwibulo lwamabi nobuyirani lukonya sifwani, ne siumao sifwani sinaberesebwa omalaho sifwani sia Jona.Yesu yarulao yabareha handi yabwao. ⁵ Abeki nibola ingereha indi, bari bebirire migati. ⁶ Yesu yababolera ari "Mutang'e muno nende obubeyi bwabafarisayo nende absadukayo." ⁷ Abeki barebana bene hubene nibabola mbu "Hubera sihukingire migati." ⁸ Yesu yamanya biababola, nabekesia ari "Eng'we belisubira rididi, husina nimurebana abene hubene nimubola mbwe hubera simukingire migati? ⁹ Mwekomba omanya? Simuichulisia emigati kiranu kiria, ekiabandu chielifu chiranu nende bimwero bianga biamwabusia? ¹⁰ Kose migati saba ekiabandu chielfu chine nende ebimwero biamwabusia? ¹¹ Husina nimuranyala omanya mbwe sinomanoma nag'u hulondohana nende emigati? Mutaang'e muno nobubeyi bwabafarisayo nende abasadukayo" ¹² Barulao bamanya bari hane siyari nababolera mbu batang'e nende amira mumigati arali mbu batang'e nende amekesio kabafarisayo nende absadukayo. ¹³ Yesu niyola mubialo bia Kaisaria nende Filipi, yareeba abeki baye ari "Abandu babola mbwe omwana womundu niwina?" ¹⁴ Bakalusia bari "Abandi babola mbwe Yohana omubatisia, bandi Elija, bandi Yeremia, nebandi bari mulala hubanabii." ¹⁵ Nang'u mubolanga mbwe ndiwina? ¹⁶ Simoni Petero yakalusia babola ari "Newe Kristo musiani wa Nyasaye omulamu." ¹⁷ Yesu yamubolera ari "Ori wechihabi Simoni mwana wa Yona, hubera siwekesibwa nomubiri namachai arali mbu ni Baba ori muikulu. ¹⁸ Wosi hubolera endi ewe ori Petero ne hulwanda luno njicha hwimbaha ikanisa yange. Emiriango kiohufwa sikiainyale. ¹⁹ Ndahuberesie chifunguo chiobwami buomwikulu. Siosisiosi sioboya husialo siaboywe muikulu, he siosiosi siokosia husialo siakosibwe muikulu." ²⁰ Yesu yabolera abeki baye baraboleraho omundu bari niye Kristo ²¹ Hurula sihesio Yesu yachaka obolera abeki baye ari bihoyere achie Yerusalemi, abirire muminyahano mingi humahono kabahulundu nende makuhani bahongo alala nabandiki bamalako, yerwe mani alamuhe indalo yohudaru. ²² Petero yamuyira indulo, namukania nabola ari "Ebio biosi bibe are nawe, omwami! Bino birahweholaho!" ²³ Yesu yakaluhana mani nabolera Petero, "Funya inyuma wange, Saitani! Ungaira ochia imberi hubeera soopara bindu bia Nyasaye, ohairasa hubindu biesialo, oparasa biesialo. ²⁴ Yesu yabolera abeki baye ari "Omundu yosiyosi owenya hunonda, paka yekane mwene, abukule omusalaba kwaye mani yanonde. ²⁵ Buri mundu owenya oonia bulamu bwaye yabukosie ne buri mundu okosia bulamu bwaye hulwange yabunyole. ²⁶ Nibuhala sina omundu nanyola sialo silamba nakosie bulamu bwaye? ²⁷ Omwana womundu yaheche muluyari lwa lareng'ene nende malaika baye. Ne yaberesie buri mundu esianwa hulondana nende bihole biaye hwaye. ²⁸ Mbabolera obwadieri, bariwo bandu akari weng'we abarahabile lifwa paka balole omusiani womundu niyecha