¹ Abandiki nende Abafarisayo becha hu Yesu hurula Yerusalemi, nibareeba bari ² "Husina abeki bao bafunakanga miluha kiabahulundu? Sibeesabanga mahono nibaria mugati." ³ Yabakalusia nabola ari "Ne sina sikera nimufunaka malako ka Nyasaye hulwemiluha kieng'u? ⁴ Nyasaye yabola ari 'Ria larao nende makoo,' handi uria olomaloma mabi hularang'ene nende ng'ina ohufwa naye afwe. ⁵ Nang'u mubola mbwe "Yosiosi obolera larang'ene kata ng'ina, mbu obuhonyi bwosi bwosi bwonyola hurula hwesie, nesianwa. ⁶ Omundu ngooyo sahoya oria samwana kata ng'ina. Mungira ngaino mubiyia imbosi ya Nyasaye, hulwemiluha kieng'we. ⁷ Eng'we ababeyi! Isaya yababolaho biadieri ari, ⁸ 'Abandu bange baamba siribwa neminwa kiabu, nemioyo kiabu kiri are nasi. ⁹ Bekadia mbu baanama hubera amekesio kabu namalako kabandu." ¹⁰ Yarulao nalanga omuhung'ano nababolera ari "Murekeresie mani muurire. ¹¹ Esiingira mumunwa kwomundu sisimubiyia, nisiria esirula mumunwa niesibiyia omundu." ¹² Abeki beecha baabolera Yesu bari "Omanyire ori abafarisayo basinihe neimbosi yawabola?" ¹³ Yesu yabakalusia babola ari "Buri musala kwa larange ararakire kwaheywe. ¹⁴ Mulehane nabo abo naboofu. Omundu muofu niyemerera omuofu wasie, bosi banakwa murina." ¹⁵ Petero yakalusia Yesu nabola ari "Rwekesieho mahulundu kolukado luno." ¹⁶ Yesu yabola ari "Ewe wosi osiuma omanya? ¹⁷ Somanyire ori Siosiosi esibirira muhanwa sichia munda nisirulao sichia muchoo? ¹⁸ Ne ebindu birula hubirira muhanwa, birula mumwoyo. Niebindu bibiyia omundu. ¹⁹ Hubera maparo mabi karulanga mumwoyo, ohwira, obuyirani, ohwedwanya, obwibi, obubeyi nende amamonyo. A ²⁰ Bino niebindu bibiyia omundu.Ne ohuria bila hwesaba sibibiyia omundu." ²¹ Yesu yarula abunduao mani yachia musialo siechitauni chia Tire nende Sidoni ²² Omuhasi mukanani yarula musialo esio. Yayokera nabola ari "Ndorere sisa, omwami, mwana wa Daudi! Omwana wange muhana bihieno bimurundule." ²³ Yesu siyamukalusia imbosi kata ndala. Abeki baye becha bamusaba nibabola mbu " Mwirusie, aruyokesia." ²⁴ Yesu yabakalusia nabola, "Sindarumwa humundu yosiosi humalaho humakondi keinyumba ya Israeli akakora." ²⁵ Yecha yamwinamira nabola ari "Omwami honye." ²⁶ Yakalusia nabola ari "Sinebilayi obukula biahuria biabana nofubira chimbwa chindoro." ²⁷ Omuhasi yabola ari "Yee, omwami, nechimbwa chindoro chiosi chirichanga ebilakahe hurula humesa yomuhulundu wabwe." ²⁸ Yesu yakalusia nabola ari "Omuhaye, lisubira liao nelihongo, leha bihweholere kori osabire." Omuhana waye yaona sihesio. ²⁹ Yesu yarula abunduao handi nachia ambi neinyanja ya Galilaya. Yanina olugulu mani yehalayo. ³⁰ Omuhung'ano muhongo kwamwichaho, becha nende abalema, aboofu, abadimbe, nende abasiru nende handi bangi abaari abalwaye. Babarera mumakulu ka Yesu, mani nabaonia. ³¹ Omuhung'ano kwauka muno nibalola abasiru nibalomaloma, abarema nibakenda handi abofu nibalola. Bapaka Nyasaye wa Israeli. ³² Yesu yalanga abeki baye nabola ari "Esie ndolera muhung'ano sisa hubera bamala hubanasi ano chindalo chidaru nebarariaho sindu. Sindaha obasebula nibararire sindu banyala okwa asi hungira. ³³ Abeki bamureba, " Hunyala hwahakana ena migati abundu ngano ekiyera omuhung'ano muhongo kori ngakuno? ³⁴ Yesu yabareba ari muri nende migati kianga? bakalusia mbwe "Saba, nende eching'eni chinjeranu." ³⁵ Yesu yabolera omuhung'ano behale asi muloba. ³⁶ Yabukula migati saba ekio neching'eni handi namala huba orio muno, yamekula migati mani yaberesia abeki. Abeki baberesia omuhung'ano. ³⁷ Abandu bosi baria bekura. Barulao babusia ebimeka bidong'ire biola bimwero saba. ³⁸ Bosi abaria bari basacha chilifu chine norabarire abahaye naabana. ³⁹ Yesu yasebula muhung'a no mani yengira mubwaro yachia musialo sia Magadani.