¹ Inyanga yeneyo Yesu yarula rwanyi mani yehala hundulo weinyanja. ² Omuhang'ano muhongo kwamwebusiaho, yengira mubwaro mani yehalamo ne obungi bwabandu bema hundulo weinyanja. ³ Yesu yababolera bindu bingi muchingado. Yabola ari "Mulola, Omurimi yarula yachia oraka imuo. ⁴ Ngayaraka, imuo yindi yakwa hungira, ne amayoni kecha kairia yoosi. ⁵ Obumuo bundi bwakwa humakina abundu auma riloba riyera. Chiamera lwangu hubera riloba nerididi. ⁶ Ne omubasu nikwarula bianiala hubera biauma misi. ⁷ Imuo yindi yakwa mumabwa. Ne amabwa kamera mani kaifunira. ⁸ Imuo yindi yakwa muloba rilayi handi yebula biamo bingi mara imia, chindi mara mahumi kasasaba, nchindi mara mahumi kadaru. ⁹ Ori namarwi Aurire." ¹⁰ Abeki baye beecha bamureba bari "Husina olomaloma nomuhung'ano muchingado?" ¹¹ Yesu yabakalusia nabola ari "Eng'we mwaberesebwa ohumanya ebiekisa mubwami bwomuikulu, nano haba sibabebwa. ¹² Orinabio yahamedwe, handi yabe nabio bingi. Ne oumanabio, ata bididi biarinabio yaang'ulwe. ¹³ Sino niesikera nomanoma nabo muchingado: Hubera bamoka nesibalola, baurira nehandi sibaurira, ata sibamanya. ¹⁴ Mbwe munibo, chiule echiabolwa nende Nabii Isaya, nabola mbu "Ohurekeresia, munaurira lakini simunamanya; Ohulola munalola lakini simunamanya ¹⁵ Emioyo kiabandu bano kimarire oba misiro handi marwi kaabu sikaurira, chimoni chiabu chialimba barecha balola nechimoni chiabwe, baurira namarwi kabu, bamanya mumioyo kiabu bakesiya mani ndabaonia. ¹⁶ Ne eng'we muribechihabi hubera chimoni chieng'u chilola ne amarwi ken'gu kaurira. ¹⁷ Adieri mbabolera mbu abanabii bangi nende bandu balafu bekomba olola bindu biamulola bino nesibabilola. Bekomba ourira bindu bino nesibabiurira. ¹⁸ Haro murekeresie lukado luomurimi owaraka bumuo bwaye. ¹⁹ Omundu naurira chimbosi chiobwami nahaya ochimanya bilayi, omusuku yecha nabukula kosi akarakirwe mumuoyo kwaye. ino nioimuo eyarakwa indulo weindara. ²⁰ Obwarakwa humakina niomundu ourira imbosi nesaibukula nobusangafu, ²¹ Auma misi mukari waye haro akendaho bididi. Eminyahano ata isando nibicha hulweimbosi nakwa hundulo lwangulwangu. ²² Obwarakwa mumabwa, nomundu waurira imbosi lakini asiherire bindu biesialo nende obubeyi bwemiandu nibifuniha imbosi narulao abwamo mahulundu. ²³ Imuo eyarakwa muloba rilayi, nomundu ourira imbosi yobwami naidira. Yebula biamo, nakesa imere mara imia, mara mahumi kasasaba nebiha bindi mara mahumi kadaru hulondohana nende ngayaraka. ²⁴ Yesu handi yababolera lukado lundi. Yabola ari "Obwami bwomuikulu buri ngomundu waraka imuo indayi mumukunda kwaye. ²⁵ Nibiola siro, bandu nibeyarisie, omusuku yecha yarakamo imuo ikabuhane, mani yabwao. ²⁶ Yari imera neyomusuku yosi iloloha (weeds). ²⁷ Abahosi bomwene mukunda becha bamubolera bari 'Omuhulundu, siwaraka bumuo bulayi mundalo yao? Bikendire birie handi biabamo amakolwe?' ²⁸ "Yabekesia ari, omusuku nioholire kano.' Abahosi bamureba bari "Haro wenya huchie whiye amakolwe? ²⁹ Omwene mukunda yakalusia ari "Haba. Siha siamunaba nimwiya amakolwe ako, misi kieingano kineiha. ³⁰ Murehe bimere biosi paka murikesa. Esiha siokesa ndabolere abakesa endi mubusie mberi amakolwe, muboye mubiruri mani musambe, neingano mure alala mani mubihe musiaki." ³¹ Handi yababolera lukado lundi. Yabola ari "Obwami bwomuikulu buri ngeimuo ya haradari yomundu yabukula yaraka mundalo yaye. ³² Ino nieimuo indidi muno ohira bumuo bwosi. Ne nimala omera, nomusala muhongo okuhira kiosi, handi amayoni kecha nikembaha humasaga kakuo. ³³ Yesu yababolera lukado lundi nabola ari "Obwami bwomuikulu buri nga (yeast) yomuhasi yabukula nahubania nebikero bidaru biobusie mani yaniasia." ³⁴ Bindu bino biosi Yesu yaboleranga omuhang'ano muchingado; handi siyababoleraho sindu bila chingado. ³⁵ Biari birio huchimbosi chiabolwa nende omunabii chiole. Yabola ari "Ndahekule munwa kwange muchingado. Ndahabole bindu ebiakiswa hurula sialo nisilongwa." ³⁶ Yesu yareha muhung'ano mani yengira munyumba. Abeki baye bamwichaho nibamubolera bari "Rwekesie bilayi lukado lwamakolwe komundalo." ³⁷ Yesu yabakalusia nabola ari "Oyo oraka imuo indayi niomusiani womundu. ³⁸ Indalo niesialo; ne obumuo bulayi niebasiani bobwami. Amakolwe niabasiani bomusuku. ³⁹ Handi omusuku wa karaka nesihieno. Erikesa nesiakamo siesialo, handi bakesi nimalaika. ⁴⁰ Huako amakolwe nikabusibwa mani kasambwa nomuliro, biabe birio mumuiso kwesialo. ⁴¹ Omwana womundu yarume malaika baye handi babusie omakoha nende abo abafunaka malako hurula mubwami bwaye. ⁴² Babasuhune mufanisi yomuliro, omwahabe hurira nohusia meno. ⁴³ Ne abandu balafu bang'enang'ene ngeriuba mubwami bwa laarabu. Orinamarwi aurire. ⁴⁴ Obwami bwomuikulu bufanana ngemiandu kiakiswa mundalo. Omundu yakinyola mani yakikisa. Mubusangafu bwaye, achia nakusia miandu kiaye kioski narulao akula indalo eyo. ⁴⁵ Handi obwami bwomuikulu buri ngomundu wobuhala okonya (pearls). ⁴⁶ Ngayanyola ndala yobukusi bwakulu, yachia yakusia burisindu siayari nasio mani naikula. ⁴⁷ Handi obwami bwomuikulu bufanana ngolwero olwafubwa munyanja, olwabusia ching'eni chia buringero. ⁴⁸ Ngalwechula abanaabi baluhwesa paka husikobero. Behala asi mani bayiera chindayi bachira mubisero, echimbi nachio nibafuberia. ⁴⁹ Biabe birio muiso kwesialo. Malaika baheche nibakabula bandu babi nabalayi. ⁵⁰ Ababi bafubwe mufanisi yomuliro, omwahabe hurira nende husiameno. ⁵¹ "Mumanyire bindu bino biosi?" Abeki bamukalusia bari "Ee. ⁵² Yesu yababolera ari "Huako, buri mwandiki wamalako omalire huba omweki hubwami bwomuikulu afanana ngomundu mwene inyumba, ogola rwanyi bindu bihare nebiyiaha hurula musibihiro siaye." ⁵³ Yesu niyamala chingado chino, yarula abunduao. ⁵⁴ Yesu yengira musialo siabwe mani niyekia bandu muchisinagogi chiabwe. Bialondaho mbu bandu bauka muno, nibabola bari "Omuyia uno agolanga ena ⁵⁵ makesi ngakano nende amani kechihono? Ng'ina siniolangwa Maria? Bamwanang'ina sini Yakobo, Yusufu, Simoni nende Yuda? ⁵⁶ Bambochong'ene bosi sihurinabo? Yanyolena bindu bino biosi? ⁵⁷ Basiniha naye. Ne Yesu yababolera ari "Omunabii sakosanga siribwa humalaho musialo siaye mwene nende mubeho baye." ⁵⁸ Siyahola chihono chinyingi lwandolo hubera hurasubira hwabwe.