¹ Yesu namala olanga abeki baye alala lihumi nende babiri, yababeresia amani ohira mioyo mimali, amani kohuirusia bihieno, alala nohuonia amalwaye namadehere kosi. ² Amera kabarume baye lihumi nende babiri niko kano. Owamberi ni Simoni (yalangwa Petero) nende Andrea mwanang'ina; Yakobo omusiani wa Sebedayo nende Yohana mwanang'ina. ³ Pilipo nende Batholomayo; Tomasi nende Matayo omusolosi wobusuri; Yakobo musiani wa Alfayo nende Tadayo. ⁴ Simoni mukananayo nende Yuda Sikarioti, owamukusia. ⁵ Yesu yarumabo lihumi nende babiri. Yababolera ari "Murabira muchingira chiabakafiri handi murengira muchitauni chiabasamaria. ⁶ Ne muchire makondi akakora keinyumba yaIsraeli. ⁷ Ngamuchia muyale nimubola muri "Obwami bwomuikulu buriambi. ⁸ Muonie abalwala, mulamusie abafu, mulafuyie abamakere handi mwirusie bihieno. Mwanyola bihaya, muberesanie bihaya. ⁹ Orakinga idhahabu, ifedha katasa matongolo musao yao. ¹⁰ Orakinga esikapo siolukendo, kata ikanjo yohubiri, kata bilaro kata mudiro, hubera omuhosi ahoya abebwe biahuria. ¹¹ Nimwingira mutauni yosiyosi murebeho omundu orimo mu!ayi handi mumenye nayepaka mubweo. ¹² Mimwingira munyumba muhesie bosi. ¹³ Inyumba niyerana mubemo nemirembe, nirayerana emirembe kiengu kibafunyire. ¹⁴ Huabo abarabakaribisia ata ourira chimbosi chieng'we, nimurula munyumbeyo atamutauni eyo, muteng'e lufu hurula humakulu keng'u. ¹⁵ Adieri mbabolera, biabeho bididi muloba ria Sodoma nende Gomora inyanga yohenga musango ohiraho mutauni eyo. ¹⁶ Mbaruma ngamakondi akari weching'u; mube bakesi ngeinjuha handi mube bademberefu ngamagugu. ¹⁷ Mutang'e nabandu hubera banabayira hubemisango handi banabasandia muchisinagogi chiabwe. ¹⁸ Muhairwe imberi wameresi nende abaruki hulwange, ngobulori hunibo nende emikanda kindi. ¹⁹ Nenibabasitaka muraba namaparo mangi kori ngamunabola hubera kamunabola munaberesebwa esiha esio. ²⁰ Sineng'we munalomaloma, nomwoyo mulafu kwa lareng'u niekwabole mueng'u. ²¹ Omundu yahane mwanang'ina huhufwa, ne Baba yahane mwanawaye. Abana bahauhane nabebusi babu handi banyala okera berwa. ²² Hurira riange mwaswilwe nende burimundu. Ne owahasimirisie hula siakamo, yaone. ²³ Nibabasandia mutauni ino, mwiruhe muchie mu indi. Mbabolera obwadieri, Simwamale okenda muchitauni chia Israel chiosi omwana womundu narecha. ²⁴ Omweki sanyala obamuhongo ohira Mwekesia waye, ne omuhosi sanyala ohira mukali waye. ²⁵ Bihoya mbu omweki afwane nende omwekesia waye ne omuhosi ngomukali waye. Nibalanga omukali weinyumba Beelzebul, abandu bomunyumba eyo sibanalangwa mera mabi muno. ²⁶ Murabaria baba, siumao esiafunihwa esirahafunulwe ne siumao esiekisa esirahamanyihane. ²⁷ Siambabolera musirima, mubole alafu sidere, handi biamuurira kaala mumarwi, mubole akulu humisuri. ²⁸ Muraria abo abera mubiri nesibanyala huira mwoyo. Murie uria onyala obiyia biosi, omwoyo nende mubiri mumuliro. ²⁹ Oruyindikiri rubiri sirunyala okusibwa indururu? Ne lolaho mbu ata halala sihanyala olakaha asi huloba Baba naramanyire. ³⁰ Atasa rifwiri riohumirwe kieng'u riabalwa. ³¹ Muraria. Muri neinengo yakulu ohira Ruindikiri rungi. ³² Huako burimundu owagole bulori bwange imberi wabandu, siosi ndagole buloli bwaye imberi wa Baba ori muikulu. ³³ Ne oundekana imberi wabandu siosi ndamuekane imberi wa Baba ori muikulu. ³⁴ Murapara mbu ndecha orera mirembe husialo, sindecha orera mirembe ndecha orera Olupanga. ³⁵ Ndecha orera bukabuhani akari womundu nende larang'ene, akari womuhana nende ng'ina, muhomusiani nende mafyalang'ene ³⁶ Abasuku bomundu babe bomunyumba yaye. ³⁷ Ohera samawana kata ng'ina ohuhira sayerana nasi; ohera musiani kata muhana waye huhira sanjeraho. ³⁸ Oranyala ominga musalaba kwaye mwene sanjeraho. ³⁹ Onyola bulamu bwaye yabukosie ne okosia bulamu bwaye hulwesie yabwakane. ⁴⁰ Ohwingisia anyingisia, ne onyingisia yosi yengisia uria owanduma. ⁴¹ Owingisia munabii hurira riomunabii yahanyole esianwa syomunabii, ne owingisia omundu mutakatifu murira riomutakatifu yanyole asianwa siomundu mutakatifu. ⁴² Owahabeho Abana badidi bano atasa esikombe siamachi manyifu kohung'wa murira riomweki, adieri mbabolera, siyahakosie mungira yosiyosi sianwa siaye.