¹ Nachaka okhubabolera muchingado, omundu mulala yaraka indalo eya misabibu, manu nayisiririra olukaka nayaba lina eliamafura[wine fat] niyombakha ingasi indambi, naye napangisia khubalimi mana nacha esialo esie eyale. ² Ne mulikesa naruma omukholi wae khubalimi mbwe anyolekho ebiamo biomumukunda. ³ Nibamudira nibamukhuya, nibamwirusia makhono makhaya. ⁴ Khandi nabarumira omukholi undi, naye nibamukhuya amakina nibamumisia omurwe, nibamwirusia muchisoni. ⁵ Khandi naruma oundi, naye nibamwira, nende abandu bangi, nibabakhuya nibabera abandi. ⁶ Naye nali nende omusiani mulala yeng'ene, owayakhera lukali, yamuruma yesi olumalilikha, nabola banamuberesie oluyali omwana wange. ⁷ Nabo abalimi abo nibabola abene khubene, uno niye owobulame yicha khumwire, manu obulaame bunaba bwefwe. ⁸ Nibamubukula, nibamwira, nibamusukuma erwanyi weindalo eyomusabibu. ⁹ Ne bulano omwami omwene indalo eyomusabibu anakhola sina?, anecha nasasia abalimi, nababeresia indalo yomusabibi abandu abandi. ¹⁰ Ne eng'we khaba khasi mwasomakho eliandiko lino; mbwe elikina elia abombakhi bakhaya bulano liekhola elikhongo eliomukona. ¹¹ Ino neikhola eyomwami, ne lukisia muno muchimoni chiefwe? ¹² Nabo nibakonya okhumudira arali baria abandu; okhubera bamanya mbwe alomaloma akechingado akulu wabwe; nibamurekha nibabwao. ¹³ Nibamurumira mulalal khubafarisayo ne khubakherodia, mbwe bamudire. ¹⁴ Ne ngolwa bali nibolere, nibamubolera, omwekesia khumanyire mbwe oli owobwadieri, khandi khaba odeba omundu yesi, khandi khaba khasi odeba obukhongo obwabandu, arali wekesia ingira ya Nasaye mubwadieri; Nelilako okhurusia obusuru khu Kaisari kose khaba?. ¹⁵ Khurusia kose khurarusia?. Arali namanyire obwekadi bwabwe, nababolera, mbwe sina nimundema? mumberesie etongolo, nyale okhulilingera. ¹⁶ Nibarera naye nababolera esifwanani sino nende obwandike buno nibiawina? nibamubolera mbwe nibia Kaisari. ¹⁷ Naye Yeso nakalusia nababolera ari, muberesie Kaisari ebili ebia kaisari, Ne ebia Nasaye muberesie Nasaye.Nabo nibaukisibwa ninaye. ¹⁸ Nabo abasadukayo nibamwichira abo ababolanga bubulao obulamukhi, nibamureba nibabola bari. ¹⁹ Omwekesia Musa yarwandikira ari omusiani wabwe omundu nafwa nalekha omukhasi waye, naye naralekha abana, mbwe omusiani wabwe amubukula omukhasi waye anyolemoimwo akhusie khulwa omusiani wabwe. ²⁰ Bulano khwliwo nende abasiani saba, owamberi nadekhia omukhasi, nafwa narali nende imwo yosi. ²¹ Owakhabiri namubukula, yesi nafwa, naye yesi nararekha imwo yosi; ²² ne owakhadaru yesi ario. ²³ Ne owasaba namubukhula naye naralekha imwo yesi; ne mukhumalililkha omukhasi mwene nafwa yesi. ²⁴ Naye Yeso nakalusia nababolera ari, eng'we khaba khasi mukora okhubera khaba khasi mumanyire amandiko, khandi kata obunyala bwa Nasaye. ²⁵ Okhubera nibabukha okhurula mubafua, khaba khasi badekhia khandi khaba khasi badekhisibwa, arali bali nga abamaliika abali mwikulu. ²⁶ Ne khulwa amakhuwa akokhufwa, nende okhubukha; khaba khasi mwasoma musitabo esie Musa ngolwa Nasaye yalomaloma naye nabola esie nesie Nasaye owa Aburahamu,nende Nasaye wa Isaka, nende Nasaye wayakobo? ²⁷ Khaba khasi ali Nasaye owabafu arali Nasaye wa balamu; eng'we bulano mukora lukali. ²⁸ Ne omulala khubandiki niyecha, naulira ibakha yabwe ,naye nabola mbwe yabakalusia ebilayi, namureba, ni lilako sina eliamberi mukosi?. ²⁹ Yeso namukalusia," elilako elia imberi mukosi ni, bulira ewe Isiraeli, omwami Nasaye wefwe nomulala. ³⁰ Ne omukheere Omwami Nasaye wao nende omwoyo kwao kwosi, nende maparo kao kosi, nende amani kao kosi; elio nilio elilako eliyimberi. ³¹ Ni eliokhubiri lifwana liri, okhere owasio ngolwa wekhera omwene. Libulao elilako elikhira kano khaba dawe. ³² Omwandiki namubolera , nabwene omwekesia ewe obola obwedieri; okhubera khuli nende Nasaye mulala; ni abulwo oundi arali niye. ³³ Khandi okhumukhera niye nende omwoyo kwosi nende obumanyirisi bwosi, nende omwoyo kwosi, nende amani kosi, nende okhumukhera owasio nga wakhekhera ewe mwene, bikhira ebimala misango ebisambe biosi." ³⁴ Naye Yeso namanyire mbwe akalusie ebilayi muno, namubolera ari,khaba khasi oli ale nende obwami obwa Nasaye. Khandi khurula awo omundu yesi khaba khasi yamurebakho elirebo khandi. ³⁵ Naye Yeso nakalusia nabola ari ngolwa yali niyekesia muhekalu, mbwe sina abandiki babolanga mbwe Kirisito nomwana wa Daudi?. ³⁶ Okhubera Daudi mwene yabola okhubirira muroho mutakatifu, omwami, yabolera omwami wange, ikhala ewe khumukhonon kwange musacha, okhwola khole abasuku bao okhuba asi wamakulu kao. ³⁷ Daudi khulwako omwene yamulanga omwami, bulano khandi yakhaba arie omwana waye? nabo abandu baulila bamubulira mukhwekhoya. ³⁸ Naye nababolera mumekesio kaye, mwekenderesie nende abandiki abakhera okhukenda mubiefwalo ebirambi khandi bakhera amakhesio mubiiro. ³⁹ Nende ebisala ebieimberi muchisinagoogi nende obweyango bweimberi mumikholo. ⁴⁰ Abengirira echinyumba echia abakhasi balekhwa, nende khulwo obwekadi basaba echisala echindambi ; abene abo bachia okhunyola abukhalaki obukhongo okhukhirakho. ⁴¹ Naye Yeso niyekhala abundu welisanduku lieimbikhiro, nalingere ngolwa abandu baramo chisende muimbikhiro; abo abali bayinda nibaramo chinyingi. ⁴² Niyecha omukhasi undi omulekhwa, omumanani, natubamo obukhela bubiri esiako sia oburuso bwae bwechisende. ⁴³ Nabalanga abeka baye nababolera, obwadieri mbabolera, mbwe omukhasi omumanani uno areremo echinyingi okhukhira bulimundu oreremo, muimbikhiro. ⁴⁴ Okhubera abo bosi bareremo ebimeka ebia obuyinda bwabwe arali uno okhurula mubumanani bwaye areremo biosi ebiabeli khandi obulamu bwaye bwosi.