¹ Khandi naboola, Emuboolera obwatoto enywe, Mbu balala khuinywe abasinjiire hano bano, abakhabule okhukoonya lifwa, okhuula olwa bakhalole obwami bwa Nyasaye nibwitsanga nende obunyali. ² Olunyuma olwa tsinyanga tsisasaba Yesu yabukula Petero, Yakobo, nende Yohana, nabemirira okhutsia khushikulu eshiraambi babeeyo bonyene: nakalukhasibwa likondo imberi wabo. ³ Mana tsingubo tsitsie nitsiba etsiokhung'inang'ina okhushira; nitsilaba tsererere okhushira ibarafu, mbu kata abulaho yesi mushialo ounyala okhutsilafia endio. ⁴ Mana abwene yaho Eliya nende Musa nibabaloleshera: nabo bali nibaboolanga nende Yesu. ⁵ Mana Petero nakalusia naboolera Yesu, Omwami, nobulayi efwe okhuba hano: lekha khukasie hano amatiri kataru; elala elirio, elindi elia Musa, elindi elia Eliya. ⁶ Okhuba shiyali namanyire eshia aboola tawe; shichira bali nibatirirwe nende oburii. ⁷ Mana lilesi niliitsa nilibafiimba: ne omwoyo nikurula mwileesi nikuboola, Wuno niye Omwana wanje omuheerwa: mumuhulire. ⁸ Shialwangu, nibayenga eyi nende eyi, nibalalola omundu ta, halali Yesu yenyene nende bo bonyene. Ne olwa bali niba kholomokhanga okhurula khushikulu, yabakania mbu shibalaboolera omundu yesi amakhuwa kabalutsi ta, okhuula olwa Omwana wOmundu aliba nalamushe okhurula mubafu. Mana nabo nibebiishira amakhuwa yako abene, nibareebana abene khubene mbu okhurula mubafu ni shiina. ¹⁰ Kho nibakabiikha mubo Beene, habutswa nibatwakana abeene mbu, Okhubuukha okhurula mubafu, nishiina. ¹¹ Nibamureeba mbu, Khulwa shiina abechesia baboolanga mbu okhuula Eliya aranjirire okhwiitsa? ¹² Naye nabakalusia nababoolera, Toto mwene, Eliya akhoyere okhwitsa imberi, mana akalusie ebindu bioosi; ne kahandikwa kariena khu Omwana wOmundu, mbu akhoyere okhunyakhana ebindu ebinji nende okhulecherwa elala. ¹³ Habutswa nasi emuboolera mbu, Eliya yamala okhwitsa, khandi bamukholera koosi akabali nibeenya, shinga kali nikahandikwa khuye. ¹⁴ Ne olwa yabakalushira abeeka bebe, yalola omukanda omukhondo nikubabotokhane, nabo abahandichi nibarebananga ninabo. ¹⁵ Ne mubwangu bwene yibo abandu boosi, olwa bamukhupiakhwo tsimoni, nibachenya muno, mana nabo nibamwirushira nibamushiesia. ¹⁶ Naye nareeba abahandichi, Ni amareebo shiina akamurebananga?i ¹⁷ Naye mulala khubomukanda namukalusia naboola mbu, Omwami, ekhurerere omwana wanje ouli nende roho wobusiru; ¹⁸ Ne hosi hosi ewa imutiriranga, imukhupa hasi, ne lifiro lirula mumunwa kukwe, nasia amenoke, natsiririra okhutora, nasi embboolere abeka bo mbu bamurusie; nabo bakhayirwe. ¹⁹ Naye namukalusia, namubiira mbu, olwibulo lubula obusubiri, nembe ninenyu okhuula liina? Nebefwire okhuula liina? Muundeerere hano. ²⁰ Mana nibamuyirira ewa yali: naye olwa yamulola, abwene yaho roho wuyo namuhabasia; nakwa hasi, nakalakala lifiro nilirula mumunwa. ²¹ Naye nareeba samwana, Noluhono shiina okhurula naba ari? Namukalusia mbu, Okhurula obwana bwe. ²² Khandi akhanji yimusindikhanga mumuliro, kata mumatsi, mbu imumale: noba nonyala eshindu, okhubeere tsimbabasi, okhukhoonye. ²³ Naye Yesu namuboolera mbu, Nikaba mbu onyala okhusubira, ebindu bioosi binyalikhana khu ulia ousuubire. ²⁴ Ne yaho na yaho samwana omwana nalira obutinyu, amasika nikarulanga naboola mbu, Omwami, esie esubiire; ukhonye obulasubira bwanje. ²⁵ Ol wa Yesu yalola mbu abandu betsa niberukhanga, yakondoshera roho wuyo weshifwabi, nachiboolera mbu, Yuwe roho wobusiru, ekhulaka mbu omurulemwo, khandi sholamukalukhamwo tawe. ²⁷ Habutswa Yesu namutiira omukhono, namuchinguula ikulu: naye nabuukha. ²⁸ Khandi olwa yali niyenjiire munzu, abeeka bebe nibamureeba mabiswi, Nishiina eshichiririre nikhulanyala okhumurusia ta? ²⁹ Naye nabakalusia mbu, Eshiembia yino shishinyala okhurula butswa tawe, halali mukhusaaya nende okhuhonga inzala. ³⁰ Khandi nibarulayo, nibakhalasia muGalilaya; naye nalenya mbu omundu yesi yesi amanyekhwo ta. ³¹ Okhuba yechesie abeeka bebe, nababoolera, Omwana wOmundu ali okhuhanwa mumakhono ka abandu, nabo nalamwiira, olunyuma lwokhwiira, yakhabuushe inyanga yakhataru. ³² Habutswa nabo shibamanya eshisina shiamakhuwa kano ta, nabo nibaria okhumureeba. ³³ Ne natsia eKaperinaumu: naye nibali munzu yabareeba mbu, Ni shiina eshia muyingaanenje abene khubene olwa mubeere khunjira? ³⁴ Habutswa nabo nibaholeera tsi, okhuba khunjira babeere nibayingananga abene khubene mbu, niwiina khubo omukhongo? ³⁵ Ne niyekhala hasi, nalanga ekhumi na babiri, nababoolera mbu, Niyakhabaho omundu yesi niyakhekomba okhunonda okhuba owamberi, okhuula abe owokhumalirikha muboosi, khandi omukhalabani wa boosi. ³⁶ Mana nabukula omwana, namura hakari wabo, ne olwa yali namuchinjire mumakhono, nababoolera mbu, ³⁷ Omundu yesi owinjisia omwana omutiiti mulala shinga wuno yenjisiiye sie. ne yesi ounyinjisia shiyenjisia sie ta, halali wulia owaruma. ³⁸ Naye Yohana namukalusia, naboola mbu, Omwami, khwaluutsi owundi narusinjia amatimoni muliira lirio; : nefu khwamukayire, shichira shalondananga yinefu ta. ³⁹ Naye Yesu nababoolera mbu, Shimulamukaya tawe: shichira shaliho omundu oulakhola amangalimwa mulira lianje, mana mubwangu yibo yafwole tawe. ⁴⁰ Okhuba wulia oulakhuyiinga ta ali elubeka wefu. ⁴¹ Okhuba omundu yesi yesi oubahesia eshikombe shiamatsi kokhunywa khulwa elira lianje, shichira nowa Kristo, toto mwene ebaboolera, salichweya okhunyoola omukabwa kukwe tawe. ⁴² Naye yesi yesi owakhesichirasie kata mulala khubatiti bano abasubilanga musie, bwakhabeere obulayi khuye okhuboywa oluchina mwikosilie, mana asukunwe munyanza. ⁴³ Nikakhaba mbu omukhono kukwo kukhwisichirasia, kureme kukhurulekhwo: nobulayi winjire mubwami noli omulema, okhushira okhutsia mujehenamu namakhono kabiri, mumuliro kulanyala okhusimibwa ta: ⁴⁴ Habundu wetsinyende tsiabo shitsifwitsanga tawe, khandi omuliro kwayo shikusimibungwa tawe. ⁴⁵ Kata eshirenje shishio nishiba nishikwisichirasia, shireme, shikhurulekhwo: nobulayi eyuwe winjire mubulamu noli omulema, okhushira okhuba nebirenje bibiri mana osukunwe mujehanamu, ewa omuliro shikulisimibwa tawe: ⁴⁶ Habundu wetsinyende tsiabo shitsifwitsanga tawe, khandi omuliro kwayo shikusimibungwa tawe. ⁴⁷ Nikakhaba mbu imoni yiiyo ndala ikhwisichirasia, nobulayi ochikhuule irule: nobulayi okhwinjira mubwami bwa Nyasaye nende imoni ndala, okhuyoomba okhuba netsimoni tsibiri mana osukunwe mumuliro okwa jehanamu. ⁴⁸ Habundu wetsinyende tsiabo shitsifwitsanga tawe, khandi omuliro kwayo shikusimibungwa tawe. ⁴⁹ Buli shiamundu yakharebwemwo eshitsantsiro nomuliro, nakwo buli omusango kwaharebwemwo eshitsantsiro nende omuunyu. ⁵⁰ Omuunyu nomulayi: habutswa nikaba omuunyu kukosia eshitsantsiro shiakwo, nokumetere heena eshitsantsiro shindi? Mube eshitsantsiro mwinywe abene, khandi mube nomulembe hakarikari wenywe.