¹ Mutsinyanga yitso omukanda kwalio omukhongo, ne shikwali nende eshiokhulia tawe, Yesu nalanga abeechi bebe nababoolera mbu, ² Endolera omukanda kuno eshibeera, shichira bakhaba ninasi tsinyanga tsitaru, ne shibali nende eshiokulia tawe. ³ Nemba nibalakhula batsie nibali inzala mutsinzu tsiabo, banyala okhukwa nibanyirira khunjira, okhuba obunji bwabo barula eyale. ⁴ Abeechi be nibamukalusia mbu, Ewa khuli hano ni mushitsimi omundu anyoola hena eshiokhulia eshiokhwiikusia abandu bano? ⁶ Mana nalaka buli mundu yekhale hasi khumaloba: mana nabukula emikaate yicho saba, nakhupira Nyasaye orio, nachitonyolamwo nahesia abeechi be bakabire abandu; mana nabo nibakabulira abandu. ⁷ Khandi bali nende orunyeeni orutiti rutiti: khandi natsilamira tsikhabi, nabalaka mbu bakabulire abandu. ⁸ Kho bamala balie, nibeekura: mana nibatola amatonye ebibwero saba. ⁹ Nabo balia abalia bali ahambi tsihelefu tsine: namala nabaseebula. ¹⁰ Niyenjira muliaro shirunji nende abeeka bebe, nibatsia tsimbeka tsia Dalmanutsa. ¹¹ Nabo abaFarisayo nibamwiitsira, nibachaaka okhumureba amareebo mbu, nibenyanga eshilolero okhurula mwikulu, nibamuteemanga. ¹² Naruula omuya omukhongo muroho, nabareeba mbu, Shichira shiina olwibulo luno lukhabanga eshilolero? Ebabiira obwatoto, Shibulao eshilolero shiosi shiosi eshia olwibulo luno lulahebwa. ¹³ Mana nabalekha, niyenjira muliaro khandi nibarulayo nibatsia injerekha wundi. ¹⁵ Mana naye nabachetsiyiia mbu, Mwiyenjeresie, Mube meso okhurula khwimera lia abaFarisayo, nende limera lia Herode. ¹⁶ Nibabolerana abene khubene, mbu, Aboolanga ari shichira khubula emikaate. ¹⁷ Naye Yesu namanyirisia, nabareeba mbu, Shichira shiina muyingananga abene, shichira mubula emikaate? Shimumanyirisinjia kata okhutiira tawe? Emioyo chienyi chishiri emitinyu? ¹⁸ Muli netsimoni, ne shimulolanga ta? Muli namarwi, ne shimuhuliranga ta? Kata khandi shumwitsuliranga ta? ¹⁹ Olwa ndafinaka emikaate chirano okhulisia abandu tsielefu tsirano, mwatoola ebimwero biinga ebia amatonye tonye nibiitsuule? Nibamukalusia mbu, Ekhumi na bibiri. ²¹ Naye nabareeba mbu, Shichira shiina shimumtiiranga tawe? ²² Khandi niyoola eBetsisaida; nibamurerera omundu omubofu, Nibamureeba mbu amutiirekhwo. ²³ Mana namutiira omukhono omundu omubofu wuyo, namuyira erwanyi welitookho; namalire okhumufuutsa amare khutsimoni, khandi namurakhwo omikhono, yamureeba nikali aluutsikhwo eshindu shiosi shiosi. ²⁴ Omundu wuyo nakalusia mbu, Endolanga abandu shingana emisaala, nibachendanga. ²⁵ Olunyuma namutiira khwo emikhono khutsimoni khandi, namubiira ayenje ikulu: naye nanyoola okhulola obulayi, naye nalola buli mundu obulayi. ²⁶ Mana naye namuruma atsie euwe, namubiira, Sholatsia mwitookho ta, kata sholaboolera omundu yesi yesi mwitookho ta. ²⁷ Yesu narula erwanyi, nende abeeka bebe, nibenjira mumatookho ka eKaisaria yeBufilipi; ne olwa yali nashiri khunjira yareeba abeeka bebe mbu, Abandu baboolanga mbu esie nisie wiina? ²⁸ Nabo nibamukalusia, Yohana Omubatisi: khandi abandi baboola mbu Eliya: nabo abandi mbu, Mulala khubanabii abakhongo. ²⁹ Naye nabareeba mbu, Nenyu muboolanga mbu esie nesie wiina? Mana Petero namukalusia namubiira mbu, Eyuwe neyuwe Kristo. ³⁰ Naye nabakaya nababiira mbu shibalabuulira omundu yesi yesi tawe. ³² Khandi yaboola amakhuwa kano abulafu. Mana Petero namubukula, mana nachaka okhumukondoshera. ³⁴ Mana olwa nalanjire abandu nende abeeka bebe ewa yali khandi, nababoolera mbu, Omundu yesi yesi owenya okhunondakhwo, akhoyere okhwikana ye mwene, mana abukule omusalaba kukwe, mana yanondekhwo. ³⁵ Okhuba yesi yesi owitsa okhuhonia obulamu bubwe alabukosia; habutswa yesi yesi owitsa okhukosia obulamu bubwe khulwa sie nende khulwa injili, wuyo alabuhonia. ³⁶ Shichira kalakhoya kariena omundu, nikali alanyoola eshialo shioosi, mana akosie omwoyo kukwe? ³⁷ Nohomba nishiina eshia omundu anyala okhuhaana bukhala bwomwoyo kukwe? ³⁸ Kata kario nabaho yesi yesi oulandolera sie tsisoni, nende amakhuwa kanje, mulwibulo lwa abaheyi nende abakholi betsimbi; omwene wuyo Omwana wOmundu yakhamulolere tsisoni, olwa aliba niyetsa muluyali lwa Samwana nende abamalaika abatakatifu.