² Nabo olwa balola abeechi nibalitsanga namamisu, eshifune mbu, amakhono kalasabirwe tawe, nibanyoola okhwisichirala. ³ Okhuba abaFarisayo, nende abaYahudi boosi, nibalosia emokhono chiabo khasotsero, shibalia ta, bali nibatirira ameshesio akabakofu. ⁴ Kata nibarula khushiiro, shibanyala okulia nibashiri okhusaaba ta. Nende ebiima bindi ebiinji ebia batiririra, shinga okhwosia ebikombe, nebimuka, netsinyungu, ebindu biomukasa, kata tsimesa. ⁶ Nabakalusia nababoolera mbu, Isaya yalakula habwene khwinywe abekaati, olwa yahandika mbu, Abandu bano bamberesinjia oluyali neminwa chiabo, habutswa emioyo chiabo chiri ehale ninasi. ⁷ Banyinamiranga butswa mumakhaya, nibechesia amechesio akamalako kabandu. ⁹ Khandi nababoolera mbu, Mukholanga obulayi nimuchaya amalako ka Nyasaye mbu mukhole aka amechesio kenyu! ¹⁰ Okhuba Musa yaboola, Heresia So nende mamao oluyali, khandi, Wulia ouboola amabi khu samwana nohomba nyina toto mwene aleerwa. ¹¹ Ne nenyu muboolanga mbu, Nikaba mbu omundu aboolera samwana nohomba nyina mbu," Kobam", mbu, Eshienesho eshia wanyoola okhurula khusie, neshihanwa; alaba omulakhuule. ¹² Khandi nenyu mumwiyamira mbu shialakholera samwana nende nyina eshindu ta; ¹³ Mukholanga likhuwa lia Nyasaye okhubula amani okhubirira mumechesio kabakuuka, aka mwechesinjia: nende amanji kandi akamukholanga. ¹⁴ Mana olwa yali namalire okhulanga abandu betse ewa ali, yababiira, Buli mundu yahulirisie, khandi amanyirisie: ¹⁵ Shibulaho eshindu eshirula erwanyi womundu eshinyala okhumwononia ta: halali ebindu birula muye nibitsia erwanyi, yibo nibio ebindu biononia omundu. ¹⁶ Niyakhabaho omundu yesi ouli namarwi kokhuhulira, lekha ahulire. ¹⁸ Nababoolera mbu, Khane mwesi mubula obumanyirisi khandi? Shimulolanga tawe, shilia shiosi eshirula erwanyi nishinjira mu mundu, shishinyala okhumwononia ta; ¹⁹ Shichira shinjiriranga mumwoyokwe tawe, habutswa shinjira munda yiiye, nashio shilarula endio, kho yiniakhwo emisiro khubiokhulia bioosi. ²⁰ Khandi naboola, Yako akarulanga erwanyi womundu, niko akononinjia omundu. ²¹ Shichira nokhurula mukari, mumwoyo kwomundu, karulangamwo amapaaro amabii, obwiilasi, obusooti, obwiiri, ²² Obwiifi, nobwikoombi, obumayanu, obubeeyi, nelikhalikhali, tsimoni tsimbi, obunyekani, injinia, nende obusirusiru: ²³ Ebindu bino bioosi birula mukari, nabio biononia omundu. ²⁴ Yabukha narula ebweneyo, mana natsia tsimbeka tsiokhulwakho lwa Tiro nende Sidoni, mana niyenjirayo munzu ndala, nalenya mbu omundu amanyekhwo ta: habutswa shiyali nali owomundu okhubisa tawe. ²⁵ Nabaho omukhasi wundi, owa omwanawe omukhana omutiiti yali nende roho weshibwabi, nahulira amakhuwa khuye, mana niyeetsa nakwa hamakulu keke: ²⁶ Omukhasi wuyo yali Omuyunani, owoluyia lwa abaSirofanike; mana namusaaya mbula yalonda eshishieno yisho okhurula mumukhanawe. ²⁷ Yesu namuboolera mbu, Lekha abaana balie bekure mberio: shichira shinobulayi okhubukula omukate kwa abaana, mana osukunire tsimbwa tawe. ²⁸ Naye namukalusia namubiira mbu, Ee, Omwami,Kata tsimbwa tsilitsanga obubungulusi bwo abaana okhurula khumesa. ²⁹ Yesu namukalusia namubiira mbu, Khulwa obubooli buno, tsia lidimoni limalire okhurula mumukhana wuwo. ³⁰ Olwa yatsia niyoola munzu yiiye, yanyoola lidimoni nilirulire nilitsiire, naye omwana omukhana wuyo niyeyalisiye khushitanda. ³¹ Mana khandi, narulanga tsimbeka tsia Tiro nende Sidoni, nabira tsimbeka tsia Amatookho Ekhumi, okhuula khunyanza yeGalilaya. ³² Nibamurerera omundu wali nalahuliranga kata okhuboola ta; Nibamusaaya mbu amurekhwo omukhono. ³³ Naye namuyira ewa abandu balaali tawe, naara ebitere mumarwi keke, khandi nafuutsa amare khubitere, mana natiira khululimi lulwe; ³⁴ Mana nahenga ikulu, naye naruula emuuya, mana namubiira, Efafatha, eliri mbu, Mwikushe! ³⁵ Ebise biene yibo amarwi nikekukha, olulimi lwali nilweboya nilubololwa, nachaka okhurumbula amakhuwa obulayi. ³⁶ Naye nabalaka mbu shibalaboolera abandu bandi tawe; ne oluhono lwa yatsiririra okhubakaya nilwo olwa batsiririra okhukaboola muno. ³⁷ Abandu baulira amakhuwa kano bahuka okhushira, nibaboola, Akholere bulishindu obulayi: akholanga akokhuchenya mbu abasiru baulira kata abalaboolanga abakhola baboole.