¹ Kho narula yaho niyoola mushialo shiewabo abeeka bebe nibamulondakhwo. ² Olwa inyanga yeisabato yoola, yachaka okhwechesia musinagogi: abanji abamuhulira bahuka nibaboola mbu, Omundu wuno anyoolanga heena amakhuwa kano? Nobuchesi shiina buno obwa yahebwa? Kata emikhono chie chikholanga amakhuwa kamakana? ³ Wuno shiali omubaatsi wuyo; omwana wa Mariamu, omusiani wabo Yakobo, Yusufu, nende Yuda, nende Simoni? Kata abakhana baabo shikhuli ninabo hano? Nibamusinyishira. ⁴ Yesu nababoolera, Omunabii shabulanga oluyali tawe, okhuyiniakhwo mushialo shishie, kata muboluyia lulwe omwene nende munzu yiiye omwene. ⁵ Ne shiyanyala okhukholayo amangalimwa amakali ta, nebutswa yarakhwo omukhono khubalwale batiiti. ⁶ Ne yahuka khulwa okhubula okhusubira khwabo; nachenda nabotokhana mutsisoma niyechesinjia. ⁸ Nabakania balabukulakhwo eshindu shiosi shiosi shioluchendo tawe, okhuyinikhwo indabushi yonyene; omuloloti ta, omukate ta, kata amapeesa mubibeti biabo tawe: ⁹ Nebutswa mwifale ebilaro; mulefwale tsingubo tsiomukari tsibiri tawe. ¹⁰ Nababoolera mbu, Habundu hosi hosi ewa mwinjira munzu, mumenye mubwenomo okhuula olwa murulayo. ¹¹ Ne oulamwinjisia ta kata okhubahulira ta, olwa murula mwo mubungulule olufu oluli lwebirenje bienyu shingana obuloli khubo. Emuboolera obwatoto mbu kakhabekhwo akokhwifiira khu Sodoma nende Gomora khunyanga yeshihesi, okhushira litookho yilo. ¹² Kho nibarula nibatsia erwanyi, mana nibakaamba mbu abandu bekanire, ¹³ Nibarusia amadimoni amanji, nibatishirira khubanji abali nibalwala amafura nibabahonia. ¹⁴ Omuruchi Herode yahulirakhwo, (shichira elira lie liali nilifumire mushialo:) abandu niibaboola mbu Yohana Omubatisi yalamushe okhurula mubafu, nishio eshichira amakhuwa kamakana kekholekhanga muye. ¹⁵ Abandi nibaboola ni Eliya; abandi mbu nomunabii nohomba mulala khubanabii. ¹⁷ Okhuba Herode mwene yali niyarumana Yohana natiirwa, namura mujela khulwa Herodia, omukhasi womusiani wabwe Filipo: okhuba yali niyamuteshia. ¹⁸ Okhuba Yohana yali niyaboolera Herode mbu, Nomusiro yuwe okhuteshia omukhasi womwana wenywe. ¹⁹ Khulwa yako Herodia yali nende obusoolo ninaye, yakhamwirire; ne shiyanyala ta: ²⁰ Okhuba Herode yamuria Yohana, yali niyamanya shinga ali omundu omulunjishi khandi omutakatifu, kho yamuheresia obulindi; yamuhuliranga, nakhola ebindu ebinji, yamuhuliranga nobutsatsafu. ²¹ Inyanga yali niyikhoyere niyuula, olwa Herode yateekha lisabo khunyanga yokhwitsulira okhwibulwa khwe nalanga abami be, abaseesia abakali, nende abakhongo beGalilaya. ²² Nolwa omukhana we wulia owalangwa mbu Herodia yenjira, mana nashina, nasangasia Herode nende aba yali niyekhale ninabo, omuruchi naboolera omukhana mbu, Sabakhwo shiosi shiosi eshiawenya, nasi ndalakhuhesia. ²⁴ Naye natsia imberi, mana naboolera nyinamwana, Esabe shiina? Naye mbu, Omurwe kwa Yohana Omubatisi. ²⁵ Matetekhana omukhana wuyo niyetsa imberi womuruchi, nasaba naboola mbu, Ndienya mbu bulano buno umbesie omurwe kwa Yohana Omubatisi khuluteru. ²⁶ Omuruchi yali nende eshibeera eshikhongo; ne khulwa eshitsubo shishie, nende khulwa yabo abali nibekhale ninaye, shiyakhanyalire okhumukania tawe. ²⁷ Bwangu bwangu omuruchi naruma owokhwiira, nalachirisia omurwe kurerwe: mana natsia namusinzira mujela, ²⁸ Nareera omurwe kukwe khuluteru, mana nahesia omukhanawe: omukhaanawe naye nahesia nyinamwana. ²⁹ Nolwa abeeka bebe bahulira akali nikekholere, betsa nibabukula omulambo, mana nibakura mushirindwa. ³⁰ Khandi abarume ekhumi na babiri nibekhung'asiria khu Yesu, nabo nibamubiira ebindu bioosi, bilia ebia bali nibakholere, nende akabali nibechesiye. ³¹ Nababoolera mbu, Mwitse inywe mwenyene ewa abandu babula, mana muhulushe khwo: okhuba abandu abanji bali nibenjiranga nibarula, nibabula kata obwiyangu bwokhuluukha kata okhulia. ³² Kho nibarulaho mabwiswi muliaro nibatsia wabandu balali tawe. ³⁴ Yesu, olwa yarula muliaro, yalola abandu abanji, eshibeera nishimutiira khulwa bo, shichira bali shingana amakondi akabula omwayi: Mana nachaka okhubechesia ebindu ebijnji. ³⁵ Khandi olwa inyanga yali niyitsiire, abeeka bebe bamwitsira, nibaboola mbu, Hano neshitsiimi butswa, nayo inyanga yitsiire okhushira: ³⁶ Basebule batsie mutsisoma, nende amataala, kali ahambi bekulire eshiabalia: okhuba babula. ³⁸ Nabareeba mbu, Muli nende emikate chinga? Ne olwa bali nibamanyire, nibaboola mbu, Emikate chirano nende tsinyeni tsibiri. ³⁹ Nabalaka mbu bekhasie abandu boosi hasi khubulimo mubituma. ⁴⁰ Nibekhala khubulimo ahundi abandu imia ndala, ahundi amakhumi karano. ⁴¹ Ne olwa yali namalire okhubukula emikate chirano nende tsinyeni tsibiri, nayenga mwikulu, nachilamira tsikhabi, nasonyola emikate nachikabira abeka bebe mbu babakabire: khandi nabakabulira tsinyeni tsibiri khubo boosi. ⁴² Boosi nibalia nibekura. ⁴³ Mana nibakhung'aasia amatonye tonye ebimwero ekhumi na bibiri khandi ebietsinyeni. ⁴⁴ Balia abalia emikate bali abasatsa ahambi tsielefu tsirano. ⁴⁵ Mubwangu bwene yibo nayunjia abeka bebe okhwinjila muliaro, mbu batsie olucherekha lundi olwa eBetsesaida, olwa yali nashisebula abandu. ⁴⁶ Namalire okhubasebula nibatsiire, yatsia mushikulu okhusaaya. ⁴⁷ Ne olwa eshialo shiali nibwakheera, eliaro nalio liali niliri hakarikari munyanza, naye nali yenyene khushialo eshuumu. ⁴⁸ Naye nabalola nibanyakhananga okhufuka eliaro; okhuba omuyeka kwali nikuhutsanga okhurula imberi wabwe: naye nabatsiira mwilinda liakhane lieshiro, nachendanga khunyanza, khandi yekhababirire. ⁴⁹ Nabo olwa balola nachendanga khunyanza, nibakaala mbu neshinabandu, nibakhupa tsimbuungu. ⁵⁰ Okhuba boosi bamulola, nibatiirwa nende indenga. Habwene yaho naboola yinabo, naboola mbu, Yume ikholo: nesie; shimularia tawe. ⁵¹ Mana nanina muliaro mwabali; nakwo omuyeka nikulekha okhuhuutsa: nabo nibang'ang'aala bo bene khushichero shilacherwa tawe, nende okhuhuka. ⁵² Okhuba shibali nibanyirisiye eshisina eshia eliangalimwa liemikate ta: okhuba bali abasiro mumioyo okhusubira. ⁵⁴ Olwa bali nibakhekha muliaro, abamulola bamumanya lwangu, ⁵⁵ Nabo niberukhana mutsimbeka tsiosi tsiosi buli habundu, nibachaka okhuchinga abalwale khushitalataliro nibabayira ewa bahuliranga mbu ali. ⁵⁶ Khandi hosi hosi ewa yenjiranga, mutsisoma, mumatookho, nende mumataala, balisinjia abalwale khunjira mbu abatiirekhwo, nibakhaaba mbu kata batiire butswa khwichemo lieingubo ye: mana obunji obwa abanji abamutiirakhwo bekholekha okhuba abalamba.