¹ Yatsia khandi niyenjira musinagogi; khwalimwo nende omundu owomukhono kwanyeera. ² Nabo nibamuyenjeresia kali alamuhonia khu nyanga yeisabato; mbu babe nende eshifune shiokhumukiiya ³ Yesu naboolera omundu womukhono kwali nikwanyeera mbu, Sinjira wiitse yino. ⁴ Mannareeba abandu, Kakhoyeere mbu khukhole amalayi khunyanga yeisabato, nohomba amabii? okhuhoni obulamu, nohomba okhubwira? Habutswa nabo nibaholera. ⁵ Mana olwa yali niyakhabayenga eyi nende heyi nende liruma, naberesibwa nende obumu bwemioyo chiabwe, nabiira omundu wuyo, Nyiira omukhono kukwo imberi. Naye nakunyiira imberi: omukhono nikutong'a nikuhonere shingana okundi. ⁶ AbaFarisayo nibaruho, shirunji nibatsia nibakhola eshikhalo nende abaYahudi aboonganga Herode omukhono nibaloosia shinga olwa nibamwiire. ⁷ Yesu ye mwene nende abeeka bebe nibekweenya nibatsia enanyaza: nakwo omukanda omukhongo okhurula muGalilayaee nikumulondakhwo, kata okhurula ebuYuda, ⁸ Okhurula eYerusalemu, okhurula Idumea, nende olucherekha lwa Yorodani; kata abokhurula Etiiro nende Sidoni, omukanda omukhongo po, bamwitsira olwa bali nibahulire ebindu ebikhongo bia yali nakholere. ⁹ Nabiira abeeka bebe, mbu barecheshe eliaro litiiti limulinde khulwa omukanda kwali omukhongo, mbu kulamusenaka tawe. ¹⁰ Yali niyakhahonia abanji muno; khushichero mbu abandi betsanga okhumutiirakhwo, kata abanji abali nibali nobuchere. ¹¹ Kata ebishieno, olwa biamulolanga, ni bikwa hasi imberi wuwe, khandi bilira, nibiboola, Eyuwe oli Omwana wa Nyasaye. ¹² Naye nabikaya nabilaka mbu shibilamubuula tawe. ¹³ Kho Naye natikulukha khushikulu, ne nabalaanga balia abayeenya , nab nibatsia ninaye, ¹⁴ Naye niyemekha ekhumi nababili mbu babetsenje ninaye, khandi mbu nabarume batsie bakaambe, ¹⁵ khandi babe nende obunyali obwa okhuhonia amalwale nende okhulonda amadimoni. ¹⁶ Kho Simoni, owayalaha mbu Petero, ¹⁷ nende Yakobo omwana waZebedayo, nende Yohana omusiani wabwe Yakobo, nabakulikha lilaha mbu Boanerige, eshisina mbu abaatulukhanga shingana likulu. ¹⁸ Andrea, Filipo Baritsolomayo, Matsayo, Tomaso, Yakobo waAlufayo, Tsadayo, Simoni Omukaanani, ¹⁹ nende Yuda Iskariote, ulia owa wamala amukhobe, bamala nibenjira muunzu. ²⁰ Nakwo omukanda kwaabandu kwetsa halala khandi ewayali. Bali abaanji mbu Yesu naabekabe shibakhalia omukate ta. ²¹ Olwa abalina bebe bahulira , barula nibatsia mbu bamutiire, nibaboola mbu haundi omurwe kukwe shikuli habwene tawe. ²² Nabo abahandichi abali nibakholomoshe okhurula eYerusalemu nibaboola, Yesu alinende Bee!zebubuli; khubunyali bwa omukali wamadimoni, alondanga amadimoni. ²³ Naye Yesu nabalaanga bamwitsile naye naboola ninabo muluchero , kanyalikhana shetani akondoshere nokhulonda shetani? ²⁴ Nikakhaba mbu obwami bukabukhana obwene khubwene shibunyala okhusiinjira tawe. ²⁵ Khandi nikakhaba inzu ikabukhaane eyene khuyene, inzu iyo shiinyala okhusiinjira tawe! ²⁶ Nikakhaba mbu shetani anyala okhwiyinga omwene, alaba nakabukhane, shianyala okhusinjira tawe, alaba niyoolere khushihesi. ²⁷ Kata kario abulaho ounyala okhwinjira munzu yomundu waamani, mana asasie emiandu chichie halali okhuraanjilira w okhumuboha omundu waamani uyo, kho abe ounyala okhusasia emiandu chichie muunzu. ²⁸ Esie emubolera Toto, tsimbi tsiosi tsilabeerwa abana babandu, Kata obufukuli bwabwe bulamufukula Nyasaye; ²⁹ nebutswa oufukula Roho Omutsienukhu shiyakhanyoole okhubeerwa tawe, habutswa alimumasira akokhufwiirwa eshiina inziayo. ³⁰ Yaboola ario shichila bali nibaboolele mbu ali nende roho oweshifwaabwi. ³¹ Bamala nibeetsa abaana babwe nende nyina, mana nibasiinjira elwanyi, nibarumasia omulaango mbu bamulaanganga. ³² Nakwo omukanda okwa abaandu kwali nikwiikhaale nikumubotookhane, nibamuboolera mbu, Lola, mama uwo nende abaana benyu bali elwanyi bakhukhaabanga. ³³ Naye nabakalusia, naboola, niwiina ouli mama wanje, nohomba abaana befwe? ³⁴ Naye nahenga eyi nende eyi khubaandu abali nibekhaale nibamubotokhane, naboola mbu, lola, mama wanje nende abaana befwe! ³⁵ Kho, omundu yesi yesi oulakhola elienya lia Nyasaye, omweneoyo niye omusiani wefwe, omukhana wefwe khandi mama wanje.