¹ Olwa bwashia mumabwibwi abakhulundu babakuhani halala nende abakofu nende abahandichi nende abe shiina boosi, mana nibaboya Yesu, nibamuyira nibamuhana mumakhono ka Pilato. ² Naye Pilato namureba mbu, Neyuwe Omwami wa Abayahudi? Namukalusia mbu, Nolwa oboola omwene. ³ Nabo abakuhani abakhulundu nibamusitaka nende amakhuwa amanji. ⁴ Pilato namureeba khandi, Shonyala okhukalusia kata elala tawe? Lola shinga bakhusitachire nende amakhuwa amanji? ⁵ Nebutswa Yesu shiyakalulisia likhuwa kata elala tawe; nikachira Pilato nahuka. ⁶ Ne bulano ebise bielisabo yibo yalinji abebalire omubohe mulala, yesi yesi owa bakhasabire. ⁷ Ne yaliho omundu wundi oweliira mbu Barabas, owali niyaboywa halala nende abandi abeinduli ninaye, abali nibeerera munduli. ⁸ Nabo abomukanda nibachaaka nibakhupa obuyoka obutinyu mbu abakholere shingana olwa yali niyabakholera khale. ¹⁰ Shichira yali nalutsi mbu niimbalikha neyichirire nibamuhaana mumakhonoke. ¹¹ Habutswa abakuhani abakhulundu basema abandu, mbu kakhoyeere abebalire Barabas. ¹³ Nibayiiba obutinyu mbu, Omubambe. ¹⁴ Olunyuma Pilato nabareeba mbu, Shichira shiina, akholere shiina eshibi? Nabo nibameeta okhuupa obuyoka okhushira, Omubambe. ¹⁵ Ne okhuba Pilato yenya okhuchamisia abandu, yabebalira Barabas, nabaheresia Yesu, olwa yali namalire okhumunywekha, atsie abambwe. ¹⁶ Mana abasikari nibamuyira mulwanyi lwomukari, olwa langwa mbu Praitoria; nibalangana boosi mbu babe omukanda mulala. ¹⁷ Mana nabo nibamufwala ingubo yobukondo bwe isambarau, nibalukha olusimbi lwamauwa nibamura khumurwe kwe. ¹⁸ Nibachaaka okhumushesia mbu, Mulembe, Omwami waAbayahudi! ¹⁹ Nibamunywekha khumurwe nende litundu, nibamufutsakhwo amare, nibakhupa hasi amasikamo kaabo nibamwinamira. ²⁰ Ne olwa bali nibamalire okhumutsesheerera, bamufwalula ingubo eyali nifwana neisambarau, nibamufwala tsingubo tsiali tsitsie, nibamuyira erwanyi mbu bamubambe. ²¹ Mana nabo nibamuyunjia omubiri wundi oweliira mbu Simoni Omukirene, owali narula mumukunda, owali samwana Alekisanda nende Rufas, amuchinjire omusalaba. ²² Nabo bibamusia habundu mbu Golgotsa, amanyikhana shinga, Habundu webianganga. ²³ Nibamuhesia idivayi yitsokasibwe nende mane mane: naye nalachinywa ta. ²⁴ Ne nibamalire okhumubamba, bakabana tsingubo tsitsie, nibakhupa isimbi okhumanya eshia buli mundu abukula. ²⁵ Ne liali lisaa liakhataru, olwa bali nibamubambire. ²⁶ Nalio lihandiko eliamanyia okhuyiingwa khukhwe likhomwa hamurwe kwe, mbu OMWAMI WABAYAHUDI. ²⁷ Ne halala ninaye babambwa abefi babiri; mulala omukhono omusatsa, owundi omukhono omukhasi. ²⁸ Kho amahandiko nikosibwa, akaboola mbu, Yabasiribwa halala nende abafukuli baamalako. ³⁰ Wihonie omwene mana wishe orule khumusalaba! ³¹ Khandi abakuhani abakhulundu nibamutsesherera nibaboolerana abeene nende abahandichi mbu, Yahonia abanji, naye shanyala okhwihonia omwene tawe. ³² Lekha Kristo ouli Omwami wa Israeli yeshe bulano buno okhurula khumusalaba, mbu khulole mana khumusubire. Kata balia abayali nabambirwe ninabo boosi nibamunyeka. ³³ Ne olwa lisaa liakhasasaba liola, eshialo shioosi nishiba eahirima okhuula lisaa lia tisa. ³⁴ Mana khulisaa lia tisa olwa liola Yesu nakhupa omwoyo omukhongo mbu, Eloi, Eloi, Lama Sabakutani? Eshisina mbu, Nyasaye Wanje, Nyasaye wanje, mbushiina undeshere sie? ³⁵ Nabo abandi abali nibasinjireho, olwa bahulira, nibaboola mbu, Lole, alanganga Eliya. ³⁷ Mana Yesu nakhupa omwoyo omukhongo, namala nakhalaka omwoyo. ³⁸ Nayo ingubo yashinganga muhekalu yarandukhamwo khabiri okhurula ikulu okhuula hasi. ³⁹ Naye olwa omusesia, owali nasinjireo nayengananga inaye, yalola shingana yalira obutinyu, mana nakhalaka omwoyo, yaboola mbu, Toto mwene omundu wuno abere Omwana wa Nyasaye. ⁴⁰ Khandi abakhasi bandi baliyo nibheinjeranga ehale: mulala khubo yali Mariamu Magadalina, nende Mariamu nyinamwana Yakobo omutiiti, nende Yusufu, nende Salome. ⁴¹ ( Bano nibo balia, abali nibamulonderekhwo, abamukhalabaniranga olwa yali nali eGalilaya;) nende abakhasi bandi abanji abali nibatikulushe ninaye okhuula eYerusalemu. ⁴² Ne olwa obwiire bwoola, shichira yali inyanga yokhwirecheshera, eyiri mbu, inyanga yaranjiriranga Isabato, ⁴³ Yusufu owa Arimatsia, owali noluyali mushisango shiobuyaasi, nalindiriranga obwami bwa Nyasaye, niyetsa, nakhola itswoni niyenjira ewa Pilato, namusaba omubiri kwa Yesu. ⁴⁴ Mana Pilato nachenya mbu Yesu amalire okhufwa pe: naye nalanga omusesia, namureeba mbu afwire luhono shi. ⁴⁵ Olwa yali yamanya okhurula khumusesia, nahaana omubiri khu Yusufu. ⁴⁶ Mana nakula ingubo yeikitani, namwishia hasi, namukanyira mungubo yiyo yeikitani, mana namwalisia mushirindwa eshiali nishiabatswa mwichina, mana nakolongomia lichina khumuliango kweshirindwa. ⁴⁷ Mariamu Magadalina nende Mariamu nyinamwana Yusufu balola halia ewa yali niyalisibwe.