¹ Khulwesio bulano, obukhalaki bubulao khu bala abali mukari mwa Kirisito Yeso, bala abarakenderaanga mumubiri, arali abakenderaanga muroho. ² Khubeera amalako aka Roho owo bulamu mu Kirisito Yeso kamberesia obulekhule okhurula mumalako ak imbi nende liifwa. ³ Khulw khuba kala aka malako kakhirwa khukhola, khulondana nende kori ngolwa kali nende obudekhere khulwo mubiri, Nasaye yakhalakira imbi mumubiri khubirira mukhuruma omwana waye mwene, mufwani yo mubiri kwe chimbi; ⁴ mbwe kala akenyekhana khu malako kanyoole khusirisibwa mukari mwefwe khurakenderaanga mumbeera yo mubiri, arali mumbera ya Roho. ⁵ Khulwo khuba bala abamenyaanga mumbeera yo mubiri baparaanga amakhuwa ko mubiri; arali bala abamenyaanga mumbeera ya Roho baparaanga amakhuwa ka Roho. ⁶ Khulwo khuba elichoomo lio mubiri ni liifwa; arali elichoomo lia Roho ni obulamu alala nende omuleembe. ⁷ Khubeera elichoomo lio mubiri liri nende obusuku khu Nasaye, khulwo khuba khasi liaria amalako ka Nasaye, khandi khasi linyala okhuria khaba. ⁸ Bala abaloonda omubiri khasi bakhakheresia Nasaye. ⁹ Arali eng'we khasi muli mumubiri, arali muli mu Roho nibili mbwe Roho wa Nasaye ali mukari mwe'ngwe. Bulano omuundu yeesi obula Roho wa Kirisito khasi ni wa Kirisito. ¹⁰ Ne Kirisito nali mukari mwe'ngwe, omubiri kwengwe kwafwa khulwe echimbi; arali omwoyo kwe'ngwe nomulamu, khulwo khubeera obulungifu. ¹¹ Arali nibili mbwe Roho wa ula owalamusia Yeso khurula mubafu ali mukari mweng'we, ula owalamusia Kirisito Yeso khurula mubafu anaberesia emibiri kieng'we ekio khufwa obulamu, khubirira khu Roho waye oli mukari mweng'we. ¹² Khulwesio bulano, abakheerwa, khuli nende elikobi, ne khasi nilio mubiri khaba,okhumenya khulondana nende omubiri . ¹³ khulwo khuba nikhumenya mumbeera yo mubiri, muba mudakha okhufwa, arali nimwira ebikhole bio mubiri khubirira mu Roho, muchia khumenya ¹⁴ Khubeera bala boosi abemirirwanga nende Roho wa Nasaye, abene abo nibo abaana ba Nasaye. ¹⁵ Khulwo khuba khasi mwanyoola Roho wo buboye oreraanga oburi; arali mwanyoola Roho owa khubakhola okhuba abaana,owo khubirira khuniye khuliraanga, nikhuboola khuri Aba, Sefwe. ¹⁶ Roho mwene arusianga obuloli alala nende emioyo kiefwe naboola ari khuli abaana ba Nasaye; ¹⁷ ne nibili mbwe khuli abaana ba Nasaye, bulano, khuli abobulaame; abobulaame ba Nasaye, abanyoola abulame alala nende Kirisito; nibili mbwe khunasandisibwa alala ninaye mani khunyoole khuberesibwa oluyaali alala ninaye. ¹⁸ Khulwo khuba esie mbukula okhusandisibwa khwe ebikha bino okhuba esiindu sirakhakeranisibwa nende oluyaali lula olwakhuchia okhufunulirwa. ¹⁹ Khubeera ebiloonge bioosi bilindiriranga mubuluo bungi okhufunulwa khwa abaana ba Nasaye. ²⁰ Khulwo khuba ebiloonge biosi biarebwa asi wo busasikhi; ne khasi ni khulwo khwenya khwabio khaba, arali nikhulwo khwenya khwa ula owabigenga asi we linaaya; ²¹ Khulwo khuba ebiloonge biene biosi bichia khulekhulwa nende khurusibwa mububoye bwo busasikhi okhuula ngolwa bichia okhwingira mubulekhule bwo luyaali lwa abaana ba Nasaye. ²² Khubeera khumanyire mbwe ebiloonge bioosi biliraanga khandi bili nende amanyakhano kobuchuuni alala kata okhuula ebikha bino. ²³ Khandi khasi ni ako sa kongene khaba, arali kata nende efwe ebene abali nende ebiamo ebiamberi ebia Roho, fwesi khulira mukari mwefwe, nikhulindirira okhukholwa abaana, ne nibwo obununuli bwo mubiri kwefwe. ²⁴ Khulwo khuba khwaonisibwa khulwe lisuubira; arali esiindu esiasubirirwa nisibonekhana, elishubira liba libulao. khulwo khuba ni wina osubiriraanga sila esibonekhana? ²⁵ Arali nikhusubirira sila esiakhurabona, khusilindiriranga mukhwesimirisia ^{27 26} Mungeri yene eyo, Roho arukhonyaanga mubudekhere bwefwe, khulwo khuba efwe khasi khumanyire okhulaama kori ngolwa bikhoyera, arali Roho mwene arulamiraanga mukhulira okhurakharumbulwa. 27 Ne ula olingeraanga emioyo amanyire kori ngolwa amapaaro ka Roho kali, khulwo khubeara ye alamiraanga abatakatifu kori ngolwa Nasaye adakha. ²⁸ Khandi khumanyire mbwe mumakhuwa koosi, Nasaye akholaanga emirimo alala nende bala abamukheera mukhubaberesia amakhuwa malayi, ne abene abo nibo abalangwa khulwe lichoomo liaye. ²⁹ Khulwo khubeera bala abayamanya mukhuchaaka, yabalobola khurula mukhuchaaka mbwe bakalukhanisibwe mufwaani eyo Mwana waye, mbwe ye abe omwibulwa owamberi akari wa abaana bangi. ³⁰ Ne bala abayalobola mukhuchaaka, abene abo yabalaanga; ne bala abayalaanga, abene abo yababalira obulungifu; ne bala abayabalira obulungifu, abene abo yababeresia oluyaali. ³¹ Bulano khuboole sina khulondana nende amakhuwa kene ako? Nasaye nali olwande lwefwe ni wina oundi oli akulu wefwe? ³² Ula orakhayiira khu Mwana waye omwene, arali yamurusia khulwe fwe fweesi, anakhaya arie okhuruberesia ebiindu biosi mubulekhule? ³³ Ni wina ochia okhusitaaka abalobole ba Nasaye? Nasaye niye obabaliraanga obulungifu. ³⁴ Ni wina ochia okhubakhalakira esinyaasio? Kirisito Yeso niye owafwa; ne khandi okhirao yalamusibwa khurula mubafu, mani ali omukhono musaacha okwa Nasaye; khandi niye orulamiraanga. ³⁵ Ni wina ochia okhurukabukhania nende obukheeri bwa Kirisito? Kanyala khuba amanyakhano, kose obudinyu, kose okhusandisibwa, kose injala, kose esiekenye, kose amasira, kose olupaanga? ³⁶ Kori ngolwa kaandikwa mbwe, khwirwa esideere khulwo khubeera ewe, khuli kori amakoondi akayirwa khusinjwa. ³⁷ Ne mumakhuwa kano koosi efwe khuli abakhiri, khandi abakhiri lukali, khubirira khu ula owarukheera. ³⁸ Khubeera esie malire khumanya obwadieri mbwe, kata sa eliifwa, kose obulamu, kose malayika, kose abo bunyala, kose obunyalabwosi bwosi, kose kala akaliwo, kose kala akachia khubao, ³⁹ kose akali akulu, kose akali asi, kose esiloonge sindi siosi siosi khasi sichia khunyala okhurukabukhania nende obukheeri bwa Nasaye obuli mukari mwa Kirisito Yeso Omwami wefwe.