¹ Abakheerwa, khasi mumanyire khubeera nomanomanga nende abaandu bamanyire amalako, mbwe amalako karukaanga omuundu nali omulamu? ² Khulwo khuba omukhasi oli nende omusaacha, amalako kamuboya khu musaacha oyo nasiri omulamu, arali omusaacha oyo nafwa, nabololwa khurula mulilako lio musaacha. ³ Bulano ebikha ebio musaacha waye abeera omulamu, niyechukhana yabakho nende omusaacha undi, aba analangwa mbwe omuyeyi. Arali omusaacha waye nafwa, aba ali omulekhule, khasi ni muboye khu lilako elio khaba, kata nadekhisibwa nende omusaacha undi khasi aba ali omuyeyi khaba ⁴ Khulwako abakheerwa bange, eng'we mwesi mwakholwa okhuba abafu khu malako, khubirira mumubiri kwa Kirisito, mbwe munyoole okhudekhisibwa nende omuundu undi, ula owalamusibwa khurula mubafu, nende lichoomo mbuwe khurusirie Nasaye ebiamo. ⁵ Khulwa khuba ngolwa khwali mumbeera yo mubiri, obwekoombi bwe chimbi bwaliwo khulwo khubera amalako, ne bwakhola emirimo mubidonye bie mibiri kiefwe kata okhuula bianyola khurusiria liifwa ebiamo ⁶ Arali bulano khwabololwa khurula mumalako, khwafwira imbeera yila eyali yaruboya, mbwe khunyoole okhurumikha mumbeera yinjakha eya Roho, ne khasi ni mumbeera yikhale eya ibarwa. ⁷ Bulano khuboole khurie? Amalako kene ni yimbi? Khasi binyalikhan! Khubeera esie khasi ndakhamanyire imbi amalako nikarakhabereo; khulwo khuba khasi ndakhamanyire okhwekoomba, amalako nikarakhabolere kari orekoombanga dawe. ⁸ Arali imbi yanyoola obweyango khubirira khu lilako elio, ne nilimala nilikhola buli imbeera eyo khwekoomba mukari mwange. Khulw khuba imbi yafwa elilako nilibulao. ⁹ Khulwo khuba esie ndali mulamu khale nimbula amalako; arali ngolwa malako keecha, imbi yanyoola obulamu, nasie ndanyoola okhufwa. ¹⁰ Ndabona elilako lila eliokhurera obulamu nilinderera liifwa. ¹¹ Khulw khuba ngolwa imbi yanyoola obweyango khubirira mumalako, yambacha khandi nderwa khulwayo. ¹² Khulwesio amalako ni matakatifu, khandi amalakano kosi ni mataktifu, ni kobwadieri, khandi nimalyi. ¹³ Bulano, sila esiali esilayi siekhola liifwa khwesie? Khaba dawe! Arali mbwe imbi khuyinyoole khubonekhana okhuba imbi, yirera liifwa mukari mwange khubirira khu sila esiali esilayi, mbwe khubirira mumalakano imbi yichiririre okhuba imaanu lukali. ¹⁴ Khulwo khuba khumanyire mbwe amalako ni ko mumwoyo, arali esie nange ndi owo mubiri, khandi ndakusibwa asi wo buboye bwa imbi. ¹⁵ Khubeera khasi manyirisia eliakhola, khulwo khuba eliandakha khasi nilio eliandi khukhola, arali lila eliandasuikhira nilio eliandi khukhola. ¹⁶ Ne nikhola lila eliandaradakha, mba fukirira mbwe amalako kala nimalayi. ¹⁷ Bulano khasi nasie mwene oli khukhola akene ako khaba, arali ni imbi yila eyili mukari mwange. ¹⁸ Khulwo khuba esie manyire mbwe sibulao esiindu silayi esiamenya mukari mwange, mumubiri kwange; khubeera okhwenya nyenya, arali okhukhola nakhwo khasi nyala. ¹⁹ Khulwo khuba elilayi lila eliandakha, khasi nilio eliakhola; arali elibi lila eliandaradakha nilio eliakhola. ²⁰ Bulano nibili mbwe lila eliandaradakha nilio eliakhola, khasi nesie mwene olikhola, arali ni imbi yila eyili mukari mwange. ²¹ Bulano esie mbwene amalako kano, mbwe nindakha okhukhola amalayi, ne elibi nalio lili ninange. ²² Khubeera esie sangaalira amalako ko Mwami mukari mwange, ²³ arali mubidonye bio mubiri kwange mbona amalako kakabukhane, nikakhuyana nende amalako ka mapaaro kange, khandi nikamboya khu malako ke chimbi akali mubidonye bio mubiri kwange. ²⁴ Ni uuwi khwesie omumanani! Ni wina ochia khununula khurula mumubiri kwe liifwa kuno? ²⁵ Ndebasia Nasaye khubirira khu Mwami wefwe Yeso kirisito.Bulano nibili birio, esie mwene khulondana nende amapaaro kange kholera amalako ka Nasaye, arali mumubiri kwange kholeraanga amalako ke chimbi.