¹ Bulano khuboole sina? khuchiririre khumenya muchimbi mbwe obukosia bwemeede khuba bungi? ² Khasi bunyailikhana! Efwe khwafwira yimbi khunamenya muchimbi khurie? ³ Khasi mumanyire mbwe efwe okhwabatisibwa mukirisito Yeso khwabatisibwa muliifwa liaye? ⁴ Bulano khwasikhwa alala ninaye khubirira mukhubatisibwa muliifwa liaye; mbwe kori ngolwa Kirisito yalamukha khurula mubafu khulwo luyalai lwa Sefwe, fwesi khukendere mubuyakha bwo bulamu. ⁵ Khulwo khuba nibili mbwe mwambanisibwa alala ninaye mufwani ye liifwa liaye, nilwo olwamuchia okhwambanisibwa nende okhulamusibwa khwaye. ⁶ nimumanyirisia likhuwa lino, mbwe imbeera yefwe eyo muundu eyikhale yabambwa alala ninaye, mbwe omubiri kwe imbi kukalukhanisibwe, mani khuhaye okhukholera imbi khandi; ⁷ Khulwo khuba ula owafwa yabalirwa obulungifu khurula muyimbi. ⁸ Arali nibili mbwe khwafwa alala nende Kirisito, khusubira mbwe khuchia okhumenya alala ninaye; ⁹ nikhumanyirisia mbwe Kirisito ngolwa yamala nalamukha khurula mabafu khasi anyala khufwa khandi, kose eliifwa khasi linyala okhumuruka khandi. ¹⁰ Khulwo khubeera khulondana nende okhufwa khwaye, yafwira imbi likhabi elala sa; arali khukhumenya khwaye, amenyeraanga Nasaye. ¹¹ Mungeri yene eyo eng'we mwesi mwebale okhuba abafu muyimbi, ne abali balamu khu Nasaye mukari mwa Kirisito Yeso. ¹² Bulano, yimbi yiraruka mumibiri kiengwe ikiokhufwa, mani mwanyola khuria obwekoombi bwakio; ¹³ kose murachiririra okhurusia ebidonye bie mibiri kieng'we khulw khwekhonyisirwa muchimbi; arali mwerusie eng'we bene khu Nasaye kori nga bala ababeresibwa obulamu khurula muliifwa, khandi murusie ebidonye bie mibiri kieng'we khu Nasaye biekhonyesirwe mubulungifu. ¹⁴ Khulwo khuba imbi khasi yichia khubaruka khaba, khubeera khasi muli asi we lilako khaba, arali muli asi obukoosia. ¹⁵ Ni sina bulano? khukhole chimbi khubeera mbwe khasi khuli asi we lilako arali khuli asi wo bukosia? Khasi binyalikhana! ¹⁶ Khasi mumanyire mbwe nimwerusia okhuba abakholi, muli abakholi aba ula owamuria kata nimuli abakholi be yimbi eyireraanga lifwa, kose nimuli abakholi bo khuria okhureraanga obulungifu? ¹⁷ Arali khwebasie Nasaye, khulwo khuba mwali abakholi be chimbi, arali mwanyoola khuria khurula mumioyo kieng'we muyifwani yila eya mekesio kamwaberesibwa; ¹⁸ ne ngolwa mwamala khubololwa khurula muchimbi, mwanyoola okhuba abakholi bo bulungifu. ¹⁹ Nomanoma kori nga omuundu khulwo khubeera obudekhere bwe mibiri kieng'we. khulwo khuba kori sa ngolwa mwarusia ebidonye bia mibiri kieng'we mbwe biekhonyesirwe mubumali nende mubukhayi nimunyoola khukhayukha, mungeri yene eyo, murusie ebidonye bie mibiri kieng'we biekhonyesirwe mubulungifu mani munyoole okhulabisibwa. ²⁰ khulwo khuba ngolwa mwali abakholi b mabi, mwali abalekhule khurula khu bulungifu. ²¹ Bulano ni ingaanga sina eyamwanyoola ebikha ebio khurula mubiindu ebia muli khubonera echisoni ebikha bino? Khubeera obumalirikhi bwa makhuwa ako ni liifwa. ²² Arali bulano ngolwa mumalire khubololwa, nende khukabulwa khurula muchimbi, ne nimukholwa okhuba abakholi ba Nasaye, muli nende ingaanga yeng'we, ne eyene eyo niyo okhulabisibwa khweng'we, khandi obumaliri bwayo ni obulamu bwo bumeri. ²³ Khulwo khuba omuruungo kwe chimbi ni lifwa; arali esianwa sia Nasaye ni obulamu bwo bumeri mukari mwa Kirisito Yeso Omwami Wefwe.