¹ Khulwako nikhumala okhubalirwa obulungifu oburula khu busubiri, khuli nende omuleembe kwa Nasye, mungira ya Omwami wefwe Yeso Kirisito, ² owa khubirira muniye khwanyoola obukosia buno obwakhwemeremo mubusubiri; nende khusangaala khulwe linaaya lio luyaali lwa Nasaye. ³ Ne khasi ni ako kongene sa khaba, arali khusangalira kata nende mumanyakhano kosi; nikhumanyire mbwe amanyakhano kareraanga obwesimirisi; ⁴ ne obwesimirisi bwemekhanga omwoyo, ne okhwema khwo mwoyo khureraanga linaaya; ⁵ ne elinaaya khasi lireraanga chisoni khaba khulwo khubeera obukheeri bwa Nasaye bwamala khurebwa mumioyo kiefwe khubirira khu Roho mulafu owakhwaberesibwa. ⁶ Khulwo khuba ngolwa khwali nikhubula amaani, abikha nibiola, Kirisito yafwira bala ababulamo obunasaye. ⁷ Khubeera nibidinyu omuundu khufwira omuundu mulungifu: arali binyalikhana omuundu khuteema khufwira omundu mulayi. ⁸ Arali Nasaye yekesia obukheeri bwaye mwene khwefwe, khubeera Kirisito yarufwira, ngolwa khwali nikhusiri abakholi be chimbi. ⁹ Bulano khukhirakhoo, nikhumala khubalirwa obulungifu mumabaanga kaye, khuchia okhuonisibwa khurula mulirima khubirira muniye. ¹⁰ Khubeera nibili mbwe khwambanisibwa nende Nasaye ngolwa khwali nikhuli abasuku khubirira mukhufwa khwo mwana waye; khukhirao lukali, olunyuma lwo khwambanisibwa, khuchia khuonisibwa mubulamu bwaye. ¹¹ Ne khandi khasi ni ako kongene sa khaba, arali khusangaliraanga munasaye khubirira khu Mwami wefwe Yeso Kirisito, owo khubirira khuniye, khwanyoola obwambani buno. ¹² Khulwesio bulano, nibili mbwe imbi yengera musialo khubirira khu muundu mulala, ne eliifwa nilichira abaandu boosi, khubeera boosi bonona; ¹³ Khulwo khuba amalako nikasiri khubao, imbi yali musialo, arali imbi khasi yibalwanga owelilako libula; ¹⁴ Kata kario, eliifwa liaruka khuchaaka khu Adamu khula khu Musa, liaruka kata nende bala abarakhola imbi eyifwana nende eya Adamu, oli esifwanani sia ula ochia khwicha. ¹⁵ Arali esianwa sila khasi siali kori elibi lila khaba; khulwo khuba nibili mbwe abaandu bangi bafwa khulwe libi lio muundu mulala ula, okhirao lukali, obukoosia bwa Nasaye alala nende esianwa esili mubukoosia bwa muundu mulala oli Yeso Kirisito sikhirao khulwa baandu bangi. ¹⁶ Arali esianwa khasi sili kori kala akaruliramo muyimbi yo muundu mulala ula; khulwo khuba obukhalaki bwecha khubirira khu muundu mulala ne bwarera esinyasio; arali esianwa sio bukosia siecha khulwa mabi mangi, nisirera okhubalirwa obulungifu. ¹⁷ Khulwo khuba nibili mbwe eliifwa liaruka khulwe libi lio muundu mulala ula, okhirao lukali, bala abanyoola obukoosia mubungi alala nende esianwa sila esio bulungifu, bachia khuruka mubulamu khubirira mulala ula, Yeso Kirisito. ¹⁸ Khulwako, kori ngolwa abaandu boosi bakhalakirwa sinyasio khulwe libi lio muundu mulala, nilwo olwa abaandu boosi babalirwa obulungifu bwo bulamu khubirira esikhole silala esio bulungifu. ¹⁹ Khubeera nibili mbwe abaandu bangi bengisibwa muyimbi khulwo bukhayi bwo muundu mulala, nilwo olwa abaandu bangi bengisibwa mubulungifu khulwo khuria khwo muundu mulala. ²⁰ Arali amalako keecha mbwe elibi lila linyoole khuba likhoongo lukali; ne ngolwa imbi yachiririra okhwemeeda, obukoosia bwaba obungi lukali; ²¹ mbwe kori sa ngolwa imbi yaruka muliifwa, mungeri yene eyo obukoosia bunyoole khuruka khubirira mubulungifu mubulamu bwo bumeri khubirira khu Yeso Kirisito Omwami wefwe.