¹ Bulano omuyaudi ali nende bulayi sina okhukhira abandi? Khandi okhukhebwa khuli nende inganga yiliena? ² Bikhoyera lukali mubuli imbeera. khukhirao koosi, baberesibwa amakerako ka Nasaye. ³ Bulano ni khulwa sina abandi khu nibo khasi basubira? Okhurasubira khwabwe khuchia khukalukhania obwesikwa bwa Nasaye? ⁴ Khasi binyalikhana khaba: lekha Nasaye abe owabwadieri, katakario abaandu boosi nibaba ababacha; kori ngolwa kaandikwa mbwe,omanyikhane mbwe oli mulungifu mumakhuwakao, okhire nochia mubukhalaki. ⁵ Bulano khuboole sina nibili mbwe okhuraba nende obulungifu khwefwe khwekesia obulungifu bwa Nasaye? Khuboole mbwe Nasaye orera elirima khasi ni mulungifu khaba mboola kano ngo muundu ⁶ Khasi binyalikhana! Khulwo khuba nibiba birio, Nasaye aba anakhalakira esialo arie? ⁷ Arali nibili mbwe obwadieri bwa Nasaye buchiririre okhwekesia oluyaali lwaye khulwo khubeera obubacha bwange, ni khulwa sina esie siri khalakirwaanga okhuba omukholi we chimbi? ⁸ Khulwa sina nikhuraboola kori khwakhikhirwao, nende kori ngolwa bandi bedinya okhubola bario, khukhole amabi mbwe amalayi keeche? okhukhalakirwa khwabwe khuli nende obulungifu. ⁹ Ni sina bulano? Efwe khuli balayi khukhira bandi? khasi bili birio kata budidi. Khulwo khuba khumalire khusitaaka Abayaudi nende Abayunani mb boosi bali asi we chimbi. ¹⁰ Kori ngolwa kaandikwa mbwe, abulao omulungifu kata sa mulala. ¹¹ Abulao omanyire; abulao okonyaanga Nasaye. ¹² abaandu boosi bakora, khaandi babula ingaanga; abulao okholaanga amalayi kata sa mulala khaba. ¹³ Emiporokodo kiabwe ni ing'ani yakhakha, bekhonyera echinimi chiabwe okhubacha. Obusiba bwe chinjukha buli asi we minwa kiabwe. ¹⁴ Minwa kiabwe kiechulamo ebichubo nende obululuma. ¹⁵ Amakulu kabwe namaangu khuchukha amabaanga. ¹⁶ Obusasikha nende amanyakhano kali khu ngira chiabwe. ¹⁷ Khasi bamanya ingira yo muleembe. ¹⁸ Khuria Nasaye khubula muchimoni chiabwe. ¹⁹ Bulano khumanyire mbwe amakhuwa koosi akamalako kalomalomanga, ne kalomalomanga khu bala abali asi wa malako, mbwe buli munwa kubulere, khandi esialo siosi sibe asi wo bukhalaki bwa Nasaye; ²⁰ khulwo khuba abulao omuundu oli mumubiri ochia khubalirwa obulungifu imberi waye khurulana nende ebikhole bia malako; khubeera okhumanya imbi khuwichaanga khubirira khu malako. ²¹ Arali bulano obulungifu bwa Nasaye bubonekhane owa malako kabula; ne amalako nende abanabii baburusiria obuloli; ²² obuli obulungifu bwa Nasaye obuli mungira yo busubiri mu Yeso Kirisito khu bala boosi abasubira. Khubeera obukabukhani bubulao; ²³ Khulwo khuba abaandu boosi bakhola chimbi ne nibalemerwa oluyaali lwa Nasaye; ²⁴ arali babalirwanga obulungifu bikhaya khubirira khu bukoosia bwaye, mungira yo bununuli obuli mukari mwa Yeso Kirisito; ²⁵ owa Nasaye yamala khumurao mbwe abe omwambaani mungira yo busubiri mumabaanga kaye, mbwe anyoole khwekesia obulungifu bwaye, khulwe sifune sio khumalao echimbi chioosi echiarangira khukholwa mukhwesimirisia khwa Nasaye; ²⁶ mbwe anyoole pkhwekesia obulungifu bwaye ebikha bino, mbwe abe owo bulungifu khandi anyale khubalira obulungifu khu ula omuundu osubira Yeso. ²⁷ Bulano okhwefumia khuliena? khwikalirwe rwanyi. khubirira khu malako kaliena? Khubirira amalako ka ebikhole? Khaba dawe! Arali ni khubirira khu malako ako busubiri. ²⁸ Bulano khubona mbwe omuundu abalirwanga obulungifu khubirira obusubira obubula ebikhole bia malako. ²⁹ Kose Nasaye ni Nasaye wa Bayaudi bongene? Khasi ni Nasaye wa banasialo bosi? Ni bwadieri mbwe ni Nasaye wa banasialo bosi; ³⁰ Ne nibili mbwe ni bwadieri Nasaye ni mulala, ochia khubalira obulungifu bala abakhebwa khubirira mubusubiri, khandi bala abarakhebwa bosi achia khubabalira obulungifu khubirira mubusubiri bwene obwo. ³¹ Bulano, efwe khukalukhanie amalako khubirira mubusubiri obwo? Khasi binyalikhana! Arali efwe khwemekha amalako.