¹ Khulwako, ewe omuundu orusianga obukhalaki obula esilekhero; khulwo khuba mumakhuwa kala akokhalakiranga omuundu uundi, wekhalakiranga ewe omwene; khubeera kata ewe okhalakiranga okholanga amakhuwa kene ako. ² Arali efwe khumanyire mbwe obukhalaki bwa Nasaye ni bwo bwadieri khu bala abakholaango amakhuwa kafwana kario. ³ Khandi ewe omuundu okhalakiranga bala abakholanga amakhuwa ako, ne ewe wesi mwene okhola kene ako, opaara mbwe khasi ochia khunyoloa obukhalaki bwa Nasaye? ⁴ Kose walekeresia obungi bwa obulayi bwaye nende obwedemberefu alala nende obwesimirisi bwaye, nokhirwa okhumanyirisia mbwe obwesimirisi bwa Nasaye bukhukhwesaanga wiche wekanire? ⁵ Arali khulondana nende obwomu bwo mwoyo kwao, nende omwoyo kwao okubulamo okhwekanira, webikhiraanga elirima khu inyanga yila eye lirima nende okhufunulwa khwo bukhalaki obwo bulungifu bwa Nasaye, ⁶ ochia okhuruunga buli muundu khulondana nende ebikhole biaye; ⁷ bala abakoonyanga oluyaali, nende esiriibwa, nende oburakhafwa, mungeri yo khukhola amalayi mukhwesimirisia, bachia okhuberesibwa obulamu bwo bumeri; ⁸ arali abakhubakhubania, abararia obwadieri, abafukiriraanga kala akabulamo obunasaye, bachia khunyoola elirima nende khusandisibwa; ⁹ amanyakhano nende obudinyu khu mwoyo kwa buli muundu okholaanga amabi, khuchaakira khu Muyaudi nende muyunani yesi. ¹⁰ Arali oluyaali nende esiriibwa nende omuleembe khu buli muundu okholaanga amalayi, Muyaudi mberi nende Muyunani yesi; ¹¹ khulwo khuba Nasaye abula khukwirikhira. ¹² Khubeera bala boosi abakhola chimbi amalako nikabulao, bachia khusasikha malako nikabulao: ne bala abakhola chimbi amalako nikaliwo bachia khukhalakirwa nende amalako. ¹³ Khubeera abalungifu imberi wa Nasaye khasi nibo bala ababuliraanga amalako khaba, arali abakholanga akamalako kaboola nibo abachia khubalirwa obulungifu. ¹⁴ Khulwo khuba abaandu bo musialo ababula amalako nibakhola mungeenda yabwe kala akali mumalako, abo ababula amalako bekholere okhuba amalako mukari mwabwe abene: ¹⁵ Bekesianga emirimo kia malako akaandikwa mumioyo kiabwe, bukhalaki bwabwe nibubabolera alala nende amapaaro kabwe, kene khu kene, nikabasitaaka kose nikabakwiira; ¹⁶ inyaanga yila eya Nasaye achia khukhalakira akobwekisi ka baandu, khulondana nende ifanjili yange eya Yeso Kirisito. ¹⁷ Arali ewe nolangwa mbwe omuyaudi, newesika amalako, ne khandi welaaya munasaye, ¹⁸ nende okhumanya elienya liaye, nende khufukirira amakhuwa malayi, khandi wekesibwa amalako; ¹⁹ nende khumanyirisia obwadieri mbwe ewe mwene oli omwekesia wa baofu, obulafu bwa bala abli musirima, ²⁰ omukololosi wa basiru, omwekesia wa abana badidi, omanyire amalako mubumanyirisi nende obwadieri mumalako; ²¹ Bulano ewe owekesianga abaandu bandi, siweyekesiakho ewe mwene? ²² Ewe obolaanga mb omuundu arakhola obuyeyi, ewe mwene okholaanga buyeyi? Ewe owasuikhira ebifwanani, wibaanga muchikhekalu? ²³ Ewe owefumisirianga amalako, ofunakaanga esiriibwa sia Nasaye mukhuraloonda amalako? ²⁴ Khulwo khubeera eliira lia Nasaye linyekwaanga musialo khulwo khubera engwe, kori sa ngolwa kaandikwa. ²⁵ Khulwo khubera okhukhebwa khuli nende obukhonyi khweng'we nibili muria amalako, arali nimuraria amalako, okhukhebwa khweng'we khasi nikhukhebwa khaba. ²⁶ Bulano nibili mbwe ula orakhebwa adiira amalako, okhurakhebwa khwaye khasi khunabalwa okhuba okhukhebwa? ²⁷ Ne ula orakhebwa mukhuchaaka, niyoseresia amalako, khasi achia okhukhalakira ewe wakhebwa, ne khasi waria amalako? ²⁸ Khulw khuba omuyaudi khasi ni ula oli nende obuyaudi bwerwanya sa khaba, kose esikhebo khasi nisia erwanyi khu mubiri sa khaba; ²⁹ arali omuyaudi ni Muyaudi oli mukari, khandi esikhebo ni sio mumwoyo, muroho, ne khasi ni muliandiko khaba; ifuma yo muundu kori oyo khasi yirula khu baandu khaba arali yirula khu Nasaye.