¹ Paulo, omukholi wa Yeso Kirisito, owalangwa okhuba omurume, nakabulwa khulwe ifanjili ya Nasaye, ² eya yalaka khale khubirira khu banabii baye mumaandiko matakatifu, khulondana nende omwana ³ waye Yeso Kirisito omwami wefwe, owarula khulwibulo lwa Daudi khulwo mubiri; ⁴ namulolesia nende amaani okhuba omwana wa Nasaye, khulondana nende Roho wo butakatifu, khubirira khulamusibwa khurula mubafu: ⁵ khwanyola obukosia nende oburume khubirira muniye, mbwe ebialo bioosi binyoole okhuria obusubiri, khulwe liira liaye: ⁶ ne mubene abo, eng'we mwesi mwalangwa nende Yeso Kirisito. ⁷ Khu bala abakheerwa aba Nasaye abali Roma, abalangwa okhuba abatakatifu: obukosia nende mulembe khurula khu Nasaye Sefwe nende Omwami Yeso Kirisito kube ninang'we. ⁸ Ndangira khwebasi Nasaye wange khubirira khu Yeso Kirisito khulweng'we mwesi, khubeera obusubiri bweng'we bulomalomakhwo musialo siosi. ⁹ Khulwo khuba Nasaye owakholeranga muyifanjili yo mwana waye khurula mumwoyo kwange, niye muloli wange, ngolwa njiririranga okhubarumbula chinyanga chiosi mumalamo kange; ¹⁰ nisaba mbwe Nasaye nafukirira khunyalira, nyoole khwicha oweng'we eyo. ¹¹ Khubeera ndekoomba okhubabona, mbwe nyoole khubaberesia ebianwa bia Roho, khulwo khubemekha; ¹² mbwe khunyoole okhulemisania esie alala ninang'we, khubirira obusubiri bwa buli mulala, obweng'we nende obwange. ¹³ Bulano abakheerwa bange, khasi ndakha mukhaye okhumanya mbwe ndadakha okhwicha oweng'we eyo ebikha bingi,arali ndekalirwa okhuula ebikha bino, mbwe nyoolekho ebiamo okhurula akari weng'we kori ngolwa nyolaanga khurula khubanasialo bandi. ¹⁴ Ndi nende elikobi lia Abayunani alala nende abarali Abayunani, abali nende abakesi alala nende abarali nende bakesi. ¹⁵ Khulwesio, esie olwande lwange , ndi omwerekekhe khubayaalira ifanjili eng'we muli Roma mwesi. ¹⁶ Khubeera esie khasi mbonera echisoni ifanjili ya Kirisito khaba: khulwo khuba niyo amaani ka Nasaye akobuonia khu buli muundu osubira; khu Muyaudi mberi, nende khu Muyunani. ¹⁷ Khubeera obulungifu bwa Nasaye bufunulwanga khubirira muniyo, khurula khu busubiri khuchia khu busubiri, kori ngolwa kaandikwa mbwe abalungifu bachia khumenya khu busubiri. ¹⁸ Khubeera elirima lia Nasaye lifunulwe khurula mwikulu khu bala ababula bunasaye alala nende abarali abalungifu boosi, nende abaandu bekaliranga obwadieri khubirira mumabi. ¹⁹ Khulwo khuba amakhuwa ka Nasaye akamanyikhana kali abulafu hunibo. ²⁰ Khubeera amakhuwa kaye akarabonekhana khurula sialo nisilongwa kafunulwa abulafu, nende khumanyikhana khubirira mumirimo kiaye; obunyala bwaye obwo bumeri nende obunasaye bwaye; kata babula esisikirasio; ²¹ khulwo khuba, ngolwa bamanya Nasaye khasi bamufumia kori nga Nasaye khaba, kose kata okhumwebasia; arali bakora mubusiru bwa mapaaro kabwe, ne emioyo kiabwe ekiobusiru kiagengwamo esirima. ²² Bebolanga ebene mbwe bali nende amakesisi, arali bekhola abasiru; ²³ Bakalukhania oluyaali lwa Nasaye orasasikha nende ifwani ya esiliembuli sio muundu wo khusasikha, nende esia mayoni. nende esie chisolo chikeenda, nende esie biindu bimoolanga ²⁴ Khulwako Nasaye yabalekha mubwekoombi bwe mioyo kiabwe, nibalondana nende obumali, nibanyasia esiriibwa sie mibiri akari wabwe abene; ²⁵ khandi nibo abakalukhania obwadieri bwa Nasaye nende obubacha, nibenamira nende khukhalabanira ebiloonge mubweyaango bwo mulongi, owinamirwanga chinyaanga chioosi. Kabe kario. ²⁶ Khulwako Nasaye yabalekha mbwe balonde obwekoombi bwabwe obwa chisoni, kata abakhasi babwe bakalukhania okhwekhonyera khwarebwao nende khula okhurarebwa. ²⁷ Khandi mungeri yene eyo, abasaacha boosi balekha obwekhonyeri bwa bakhasi ngolwa bikhoyera, ne nibengira mukhwekoombana ebene khu bene, nibakhola kala akarakhoyera, nibamala nibanyoola mukari mwabwe omuruungo kwo bukori bwabwe okwabakhoyera okhunyoola. ²⁸ Ne kori ngolwa bakhaya okhuba nende Nasaye mumakesi kabwe, Nasaye yabalekha mbwe baloonde amakesi kabwe akachookana, mani bakhole akarenyekhana. ²⁹ Bechulamo buli makhuwa kabula obulungifu, obuyirani, obukhayi, obwekoombi, elirima, bechulamo esikhalikhali, obwiri, obukhubakhubania, obubacha, obuyingani, obumoonyi, ³⁰ abokhukhikhirao, abasuila Nasaye, abakhaabafu, abarali bedemberefu, abo khwekingula, abo khurao chingira chia mabi, abararia abebusi babwe, ³¹ abarali nende obumanyirisi, abo khufunaka amalakano, abarakheera abekho babwe, ababula esisa; ³² abamanyire bilayi obukhalaki bwo bwadieri obwa Nasaye, mbwe bakhoyera okhufwa khulondana nende kala akabakholanga, ne khandi khasi nikhukhola sa khwong'ene okhwabakholaanga, arali bafukirisanianga nende bala abakasangaliraanga.