¹ Efwe abali namani khukhoyere okhwesimirisiria abali nobudekheere ,oburesangaasia abene. ² Lekha buli mulala khwefwe asangaasie owasie khulwo bulayi bwaye nende okhumudinyisia. ³ Okhuba kirisito yesi khasi yesangaasia omwene, ne kori ngolwa kaandikwa, amajaaro ka bala abakhujaara kakwa khwesie. ⁴ Ako koosi akaandikwa mukhuchaaka Kali akokhurwekesia, mbwe efwe khubirira mubwesimirisi nende okhudinyisibwa khwa maandiko khube nendeelinaaya. ⁵ Bulano Nasaye wobwesimirisi nende okhudinyisibwa ababeresie amapaaro kafwanana mulala khu undi okhulondana nende kirisito Yeso. ⁶ Mbwe mumapaaro malala nende omunwa mulala mufumie Nasaye, oli samwana Omwami wefwe Yeso Kirisito. ⁷ Khu kario mufukirisanie bene khu bene, kori ngolwa Kirisito yesi yarufukirira muluyaali lwa Nasaye. ⁸ Bulano mboola mbwe Yeso Kirisito yali omurumwa wesikhebo khulwo bwadieri bwa Nasaye, mbwe yoleresie ako akalakwa abasefwe: ⁹ khandi mbwe abanasialo banyoole okhufumia Nasaye khulwe sisa siaye; kori ngolwa kaandikwa mbwe, khulwa kano ndakhurumbula akari wa banasialo, nange ndafumia eliira liao. ¹⁰ Khandi aboola ari, musangaale, engwe abanasialo, alala nende abaandu baye. ¹¹ Khandi mufumie Omwami, engiwe abanasialo mweesi; Khandi mumukingule, engwe mweesi. ¹² Khandi Isaaya aboloa ari, khwakhabeo omusi kwa Yese, ne yakheeme okhuruka abanasialo; ne abanasialo boosi bakhamweesike. ¹³ Bulano Nasaye we linaaya abechusie nende isangaalo yoosi, nende omuleembe mukhusubirira, mbwe mube nomwoyo kwokhwesimirisia khuliinda,khubirira mumaani ka Roho mulafu. ¹⁴ Ne siesi malire okhukakisibwa mweng'we bana befwe, mbwe mwichule obulayi, alala nende bumanyirisi bwoosi, Khandi munyale okhukerekana. ¹⁵ Kata kario, baana befwe, bandikiire mungeri yokhudinyisiakho, ndi ninang'we mumapaaro, khulwo khuboera obukoosia bwandaberesibwa nende Nasaye. ¹⁶ Mbwe mbe omukholi wa Yeso Kirisito khubesialo,ninjaala ifanjili ya Nasaye, mbwe okhwerusia khwa abanasialo khunyoole khufukirirwa, nibalabisibwa mu Roho mulafu. ¹⁷ Khu kario ndi nende esikera ndefumie okhubirira mu Yeso Kirisito mubiindu ebio ebilondana nende Nasaye. ¹⁸ Khasi nyala okhubalomalomakho khulikhuwa liosi elia Kirisito arakhola khubirira mwesie, okhukera abesialo beduduye, mulikhuwa nende mubikhole, ¹⁹ okhubirira mubilolero bikhoongo nende ebiamakana, mumaani ka Roho wa Nasaye; mbwe okhurula Yerusalemu, nende okhubodokhana Ilirikamu, ndayaala mubwichufu ifanjili ya Kirisito. ²⁰ Kario ndakhanyakhana okhuyaala ifanjili, ewa Kirisito asiri khurumbulwa, ndaroombakha khu olwalo lwo muondu uundi. ²¹ Naye kori ngolwa kaandikwa mbwe, khu bala abarabolerwa, bakhabone; naye abarabulira bakhamanyirisie. ²² Khu kene ako ndakhekalirwa makhabi mangi obureecha amuli. ²³ Naye okhuba bulano abuundu wandi mubimeka bino, nokhuba ndakhaba nende okhwekoomba Khukhoongo emiaka mingi khwicha ewamuli: ²⁴ Olwandakhabe nende olukeendo lwoosi olwokhuchia Sipania, ndakheeche ewemuli: okhuba ndekoomba okhubalola mulukeendo lwange, nende okhukeesibwa ninang'we, mbwe omwoyo kwange Kunyale khuchachayisibwakho adidi ninang'we. ²⁵ Naye Bulano njia Yerusalemu okhuyaalira abatakatifu. ²⁶ Okhuba bisangasisie abaandu ba Makedonia nende Akaaya okhurusia obusololi khu batakatifu ba Yerusalemu abareenyala. ²⁷ Bibasangasisie muno, khandi bekholere okhuba abali nelikobi khunibo, okhuba ebesialo nabasangirani mubianwa biabwe biomwoyo, bosi bayera okhubaba obiomubiri. ²⁸ Kario nindakhakhola kano, nimalire okhubarerakho esilolero esie siamo sino, ndakhababirire ninjia Sipania. ²⁹ Naye ndi nobwadieri mbwe, ninjicha ewamuli, ndakheeche mubuungi bwe chikhabi chia ifanjili ya Kirisito. ³⁰ Bulano basaba, abakheerwa, khulwo Mwami Yeso Kirisito, nende khulwo bukheeri bwa Roho mulafu, mbwe munyaakhane alala ninange mumasaayo keng'we khu Nasaye khulwange; ³¹ mbwe nunulwe khurula bala abarasuubira Buyudeeya; mbwe obukholi bwange khu batakatifu ba Yerusalemu bufukirirwe. ³² Mbwe nyale okhwicha amuli mubusangaafu khubirira mulienya lia Nasaye, nyoole okhubuluukha alala ninang'we. ³³ Bulano Nasaye womuleembe abe ninang'we mweesi. Amina.