¹ Barumire Fibi omukhana wefwe, oui omukholi weikanisa eyili Kenikeria: ² mbwe mumufukirire mumwami kori ngolwa bikhoyeera abatakatifu, khandi mbwe mumukhonye mumirimo kioosi ekiayeenya obukhoonyi; okhuba yakhaba owobukhoonyi khu baandu bangi esie siesi nindimo. ³ Khesia prisila nende Akwila abakhonyeresi bange mu kirisito Yeso: ⁴ abara asi obulamu bwabwe khulwange: ne khasi nesie obobera orio siengane khaba, arali kata nende amakanisa kabanasialo kosi: ⁵ khandi khesia elikanisa liri munyuumba yabwe. Khesia omukheerwa wange Epaineto oli ebiamo biokhurangirira abia Akaya khu Kirisito. ⁶ Mukhesie Maria owabanyakhanira muno khulwefwe. ⁷ Khesia Andoronika nende Yunia, abekho bange, ababoywa alala nange, abamanyikhane akari wa barumwa, abandangirira mu Kirisito. ⁸ Khesia Ambuliata omukheerwa wange mu Mwami. ⁹ Kheserie Arubano omukholi wasiange mu Kirisito, nende Sitakisi omukheerwa wange. ¹⁰ Mukheserie Apele owafukirirwa mu Kirisito. Mukheeserie abaandu ba munyuumba ya Aristobulo. ¹¹ Mukheeserie Herodioni, omwikho wange, Mukheeserie abandu bomunyuumba ya Narikiso abali mu Mwami. ¹² Mukheserie Tirifiana nende Turufosa, abali nesinani mumwami. Mukheeserie Perisisi, omukheerwa owerusia muno mumwami. ¹³ Mukheeserie Rufa, omukholi mumwami, nende ngina oli mama wange siesi. ¹⁴ Kheserie Asingrito, Fulegoni, Herime, Patiroba, Herima nende abakheerwa abali alala ninabo. ¹⁵ Mukheserie Filologo nende Julia,Nerea nende omukhana waye nende Olimipa nende batakatifu boosi abali ninabo. ¹⁶ Mukhesanie mungeri yokhuchunjunana khutakatifu. Chikanisa chioosi echia Kirisito chiabakhesia. ¹⁷ Bulano basaba, abakheerwa, mumanyirisie abo abarera khukabukhana nende ebisikirasio ebikabukhane nende amekesio akamwekesibwa, mumale mubekabulekho. ¹⁸ Abafwanana ninabo khasi bali khukholeranga Omwami Yeso Kirisito, arali Chinda chiabwe bene; mumakhuwa malayi nende inomanoma yokhwefumia, bakadirisianga bala ebemioyo midekhere. ¹⁹ Esiriibwa esiamuli nasio siuliire abaandu boosi. Ndi musangaafu khulweng'we, ne ndakhekoombere mwaba bakesi mukala amalayi, ne abalolekha abasiru mukobumaanu. ²⁰ Naye Nasaye womuleembe anamuseena sietani asi wamakulu keng we mubwangu. Obukosia bwo mwami Yeso Kirisito bube ninang'we. Amina. ²¹ Timoteo omukholi wasiange abakhesia, nende Lukio, nende Yasoni, nende Sosipatiro, abekho bange. ²² Esie Teritio owandiika ibarwa ino bakhesia mu Mwami. ²³ Gayo onindire, nende abeikanisa boosi, babakhesia. Erasito omubikhi welidokho abakhesia, nende Kwarito, omusiani wefwe. ²⁴ Obukosia bwo mwami Yeso Kirisito bube ninang'we .Amina ²⁵ Bulano khwoyo oli namaani kokhubombakha khulondana nende ifanjili yange, nende okhuyaala Yeso Kirisito, okhulondana nende obufunuli bwa makhuwa kekisa, obwakisibwa okhurula esialo nisichaaka. ²⁶ Ne bulano kafunulwe, okhubirira mumaandiko ka banabii, okhulondana nende lilako lia Nasaye aralibwayo, kakholwa okhumanyikhana khu bialo bioosi ebifukirire obusuubiri: ²⁷ khu Nasaye oli namakesi yengene, oluyaali lube khuniye okhubirira khu Yeso Kirisito buli lwoosi. Amina.